เมนู

[237] ‘‘เณร วิธวาทิโต’’ติ เณโร, สามเณโรฯ

สํสฏฺฐาทิอเนกตฺถตทฺธิต

[238] ‘‘เยน วา สํสฏฺฐํ ตรติ จรติ วหติ ณิโก’’ติ ณิโกฯ วากาเรน เนกตฺเถเนกปจฺจยา จฯ ฆเตน สํสฏฺโฐ ฆาติโก, โอทโนฯ อุฬูเปน ตรตีติ โอฬูปิโก, อุฬูปิโก วา, น ปกฺเข วุทฺธิฯ

สกเฏน จรตีติ สากฏิโกฯ สีเสน วหตีติ สีสิโก, น วุทฺธิฯ

อิตฺถิลิงฺคโต เอยฺยโก, ณโก จฯ จมฺปายํ ชาโต จมฺเปยฺยโกฯ เอวํ พาราณเสยฺยโกฯ ณโก – กุสินารายํ วสตีติ โกสินารโกฯ ชนปทโต ณโก จ – มคเธสุ วสติ, เตสํ อิสฺสโร วา มาคธโกฯ

ตชฺชาติยา วิสิฏฺฐตฺเถ อาชานีโยฯ อสฺสชาติยา วิสิฏฺโฐ อสฺสาชานีโยฯ โญ - อคฺคนฺติ ชานิตพฺพํ อคฺคญฺญํ, ทฺวิตฺตํฯ

[239] ตมธีเต เตน กตาทิสนฺนิธานนิโยคสิปฺปภณฺฑ ชีวิกตฺเถสุ จฯ

ตํ อธีเต อิจฺจาทีสฺวตฺเถสุ อาทิสทฺเทน หตาทีสุ จ ณิโก วา โหติฯ อภิธมฺมมธีเตติ อาภิธมฺมิโก, อภิธมฺมิโก วา, น ปกฺเข วุทฺธิฯ วจสา กตํ กมฺมํ วาจสิกํฯ เอวํ มานสิกํ, เอตฺถ –

‘‘ส สเร วาคโม’’ตีหานุวตฺติตาทิสทฺเทน สาคโมฯ

สรีเร สนฺนิธานา เวทนา สารีริกาฯ ทฺวาเร นิยุตฺโต โทวาริโก, เอตฺถ- ‘‘มายูนมาคโม ฐาเน’’ติ วการโต ปุพฺเพ โอการาคโมฯ

สิปฺปนฺติ คีตาทิกลา, วีณา อสฺส สิปฺปนฺติ เวณิโก, อตฺร วีเณติ วีณาวาทนํฯ คนฺโธ อสฺส ภณฺฑนฺติ คนฺธิโก, มเค หนฺตฺวา ชีวตีติ มาควิโก, วการาคโมฯ ชาเลน หโต ชาลิโก, สุตฺเตน พทฺโธ สุตฺติโก, จาโป อสฺส อายุธนฺติ จาปิโก, วาโต อสฺส อาพาโธ อตฺถีติ วา วาติโก, พุทฺเธ ปสนฺโน พุทฺธิโก, วตฺเถน กีตํ ภณฺฑํ วตฺถิกํฯ

กุมฺโภ อสฺส ปริมาณํ, ต มรหติ, เตสํ ราสิ วา กุมฺภิโกฯ อกฺเขน ทิพฺพตีติ อกฺขิโก, มคเธสุ วสติ, ชาโตติ วา มาคธิโก อิจฺจาทิฯ

[240] ณ ราคา เตน รตฺตํ ตสฺเสทมญฺญตฺเถสุ จฯ

เตน รตฺตํ ตฺยาทฺยตฺเถสุ โณ วา โหติฯ กสาเวน รตฺตํ กาสาวํฯ

เอวํ นีลํ ปีตมิจฺจาทิฯ น วุทฺธิ, มหิสสฺส อิทํ มาหิสํ, สิงฺคํฯ

เอวํ ราชโปริสํ, เอตฺถ ‘‘อยุวณฺณานญฺจา’’ โท ปุน วุทฺธิคฺคหเณน อุตฺตรปทสฺส วุทฺธิฯ มคเธหิ อาคโต, ตตฺร ชาโต, เตสํ อิสฺสโร, เต อสฺส นิวาโสติ วา มาคโธ, กตฺติกาทีหิ ยุตฺโต กตฺติโก, มาโสฯ

พุทฺโธ อสฺส เทวตาติ พุทฺโธฯ พฺยากรณํ อเวจฺจ อธีเตติ เวยฺยากรโณฯ เอตฺถ ‘‘มายูนมา’’ทินา ยการโต ปุพฺเพ เอ อาคโม, ยสฺส ทฺวิตฺตํฯ สคเรหิ นิพฺพตฺโต สาคโรอิจฺจาทิฯ

[241] ชาตาทีนมิมิยา จฯ

ชาตาทีสุ อิโม อิโย จ โหติ, จสทฺเทน กิโย จฯ ปจฺฉา ชาโต ปจฺฉิโม, มนุสฺสชาติยา ชาโต มนุสฺสชาติโยฯ อนฺเต นิยุตฺโต อนฺติโม, อนฺติโยฯ

เอวํ อนฺธกิโยฯ ปุตฺโต อสฺส อตฺถีติ ปุตฺติโม, ปุตฺติโยฯ เอวํ กปฺปิโยฯ

[242] ‘‘ตทสฺสฏฺฐานมีโย เจ’’ติ อีโย, จกาเรน หิตาทฺยตฺเถปิ, พนฺธนสฺส ฐานํ พนฺธนียํ, จงฺกมนสฺส หิตํ จงฺกมนียํฯ

[243] ‘‘อาลุ ตพฺพหุเล’’ติ อาลุฯ อภิชฺฌาพหุโล อภิชฺฌาลุฯ

วิเสสตทฺธิต

[244] วิเสเส ตรตมิสฺสิกิยิฏฺฐาฯ

อติสยตฺเถ ตราทโย โหนฺติฯ