ปุตฺเตน สห สมาโส, คมกตฺตาฯ คมกตฺตมฺปิ สมาสสฺส นิพนฺธนํฯ ตตฺถ ครุโน ปุตฺโตติ วิคฺคโห, เอวมญฺญตฺรฯ

[217] รูเป สญฺญา รูปสญฺญาฯ

กฺวจิ นินฺทายํ - กูเป มณฺฑูโก วิย กูปมณฺฑูโกฯ เอวํ นครกาโก อิจฺจาทิฯ อตฺโรปมาย นินฺทา คมฺยเตฯ

อนฺเตวาสิโก ตฺยาโท วิภตฺตฺยโลโปฯ

พหุพฺพีหิสมาส

[218] อญฺญปทตฺเถสุ พหุพฺพีหิฯ

อปฺปฐมนฺตาน มญฺเญสํ ปทานํ อตฺเถสุ ทฺเว วา พหูนิ วา นามานิ ยทา สมสฺยนฺเต, ตทา โส สมาโส พหุพฺพีหิ นามฯ

อาคตา สมณา ยํ สา อาคตสมโณ, วิหาโรฯ

[219] ชิตานิ อินฺทฺริยานิ เยน โส ชิตินฺทฺริโย, ภควาฯ อาหิโต อคฺคิ เยน โส อาหิตคฺคิฯ อคฺยาหิโต วาตฺยาโท ยเถจฺฉํ วิเสสนสฺส ปรตาฯ

[220] กรเณ ตุ-ฉินฺโน รุกฺโข เยน โส ฉินฺนรุกฺโข, ผรสุฯ

[221] ทินฺโน สุงฺโก ยสฺส โส ทินฺนสุงฺโก, ราชาฯ

[222] นิคฺคตา ชนา ยสฺมา โส นิคฺคตชโน, คาโมฯ

[223] ทส พลานิ ยสฺส โส ทสพโล, ภควาฯ นตฺถิ สโม ยสฺส โส อสโมฯ เอตฺถ ‘‘อตฺตนฺนสฺสา’’ติ โยควิภาเคน นสฺส อฯ

ปหูตา ชิวฺหา ยสฺส โส ปหูตชิวฺโห, มหนฺตี ปญฺญา ยสฺส โส มหาปญฺโญฯ ทฺวีสุ ‘‘อิตฺถิยมฺภาสิตปุมิตฺถีปุมาว เจ’’ติ ปุมฺภาวาติเทสา ปุพฺพุตฺตรปเทสุ อาอีปฺปจฺจยานมภาโวฯ

[224] ‘‘กฺวจิ สมาสนฺตคตานมการนฺโต’’ติ อนฺตสฺส อตฺตํฯ การคฺคหเณน อา อิ จฯ อิตฺถิยมิวณฺณนฺตา, ตฺวนฺเตหิ จ กปฺปจฺจโยปิฯ ยถา - วิสาลํ อกฺขิ ยสฺส โส วิสาลกฺโข, ปจฺจกฺขธมฺมา, สิโลโปฯ

โสภโน คนฺโธ ยสฺส โส สุคนฺธิฯ พหุกนฺติโก, พหุนทิโก, สมุทฺโทฯ เอตฺถ ยทาทินา รสฺโสฯ พหุกตฺตุโกฯ มตฺตา พหโว มาตงฺคา ยสฺมิํ ตํ มตฺตพหุมาตงฺคํ, วนํฯ

ตุลฺยาธิกรโณฯ

[225] สุวณฺณสฺส วิย วณฺโณ ยสฺส โส สุวณฺณวณฺโณฯ วชิรํ ปาณิมฺหิ ยสฺส โส วชิรปาณิฯ อุรสิ โลมานิ ยสฺส โส อุรสิโลโมฯ เอตฺถ วิภตฺยโลโปฯ

‘‘อตฺเถสู’’ติ พหุตฺตคฺคหเณน กฺวจิ ปฐมนฺตานมฺปิฯ สห เหตุนา โย วตฺตเต โส สเหตุโก, ‘‘ยทา’’ ทินา สหสฺส โสฯ

[226] สตฺต วา อฏฺฐ วา สตฺตฏฺฐ, มาสา, เอตฺถญฺญปทตฺโถ วา สทฺทสฺสตฺโถฯ ทกฺขิณสฺสา จ ปุพฺพสฺสา จ ทิสาย ยํ อนฺตราลํ, สา ทกฺขิณปุพฺพา, ทิสาฯ

ภินฺนาธิกรโณฯ

อปฺปฐมนฺตานนฺติ กิํ, เทสิโต พุทฺเธน โย ธมฺโมฯ

ทฺวนฺทสมาส

[227] นามานํ สมุจฺจโย ทฺวนฺโทฯ