คพฺโพ ภิมาโน’หํกาโร, จินฺตาตุ ฌาน มุจฺจเต;
นิจฺฉโย นิณฺณโย วุตฺโต, ปฏิญฺญา ตุ ปฏิสฺสโวฯ
[172]
อวมานํ ติรกฺกาโร, ปริภโว ปฺย’ นาทโร;
ปราภโว ปฺย’ วญฺญา ถ, อุมฺมาโท จิตฺตวิพฺภโมฯ
[173]
เปมํ สิเนโห สฺเนโห ถ, จิตฺตปีฬา วิสญฺญิตา;
ปมาโท สติโวสฺสคฺโค, โกตูหลํ กุตูหลํฯ
[174]
วิลาโส ลลิตํ ลีลา, หาโว เหฬา จ วิพฺภโม;
อิจฺจาทิกา สิยุํ นาริ, สิงฺคารภาวชา กิริยาฯ
[175]
หสนํ หสิตํ หาโส, มนฺโท โส มิหิตํ สิตํ;
อฏฺฏหาโส มหาหาโส,
โรมญฺโจ โลมหํสนํฯ
[176]
ปริหาโส ทโว ขิฑฺฑา, เกฬิ กีฬา จ กีฬิตํ;
นิทฺทา ตุ สุปินํ โสปฺปํ, มิทฺธญฺจ ปจลายิกาฯ
[177]
ถิยํ นิกติ กูฏญฺจ, ทมฺโภ สาฐฺยญฺจ เกตวํ;
สภาโว ตุ นิสฺสคฺโค จ, สรูปํ ปกติตฺถิยํฯ
[178]
สีลญฺจ ลกฺขณํ ภาโว,
อุสฺสโว ตุ ฉโณ มโห [มโต (ฏี.)]ฯ
[179]
ธาเรนฺโต ชนฺตุ สสฺเนห, มภิธานปฺปทีปิกํ;
ขุทฺทกาทฺยตฺถชาตานิ [ขุทฺทกานฺยตฺถชาตานิ (ก.)], สมฺปสฺสติ ยถาสุขํฯ
สคฺคกณฺโฑ นิฏฺฐิโตฯ
2. ภูกณฺฑ
1. ภูมิวคฺค
[180]
วคฺคา ภูมิ, ปุรี, มจฺจ, จตุพฺพณฺณ, วนาทิหิ;
ปาตาเลน จ วุจฺจนฺเต, สงฺโค’ปงฺเคหิ’ธ’กฺกมาฯ
[181]
วสุนฺธรา ฉมา ภูมิ, ปถวี เมทนี มหี;
อุพฺพี วสุมตี โค กุ, วสุธา ธรณี ธรา;
ปุถวี ชคตี ภูรี, ภู จ ภูตธรา’ วนีฯ
[182]