126. นามฺห+นิ+มิ

อิมสทฺทสฺส อนิตฺถิยํ นามฺหิ อน+อิมิอิจฺจาเทสา โหนฺติฯ ‘‘อเต+นา’’ติ เอเน อเนน อิมินาฯ หิมฺหิ –

125. อิมสฺสา+นิตฺถิยํ เฏ

อิมสฺสา+นิตฺถิยํ เฏ โหติ วา สุ+นํ+หิสุฯ ‘‘นามคฺคหเณ ลิงฺควิสิฏฺฐสฺสาปิ คหณํ’’ติ ญายา ‘อนิตฺถิยํ’ติ อิตฺถิลิงฺคนิเสธา อิมสฺสาติ นามคฺคหณวิสเย ลิงฺควิเสสิตสฺส อิมสทฺทสฺสาปิ คหณํฯ ตสฺส ผลํ ‘‘ตตสฺส โน สพฺพาสุ’’ ตฺยาโท ลิงฺคตฺตเย การิยสิทฺธิฯ เอหิ เอภิ อิเมหิ อิเมภิฯ ‘‘ฏ สสฺมาสฺมิ’’มิจฺจาทินา สพฺพสฺสิ+มสฺส วา ฏาเทเส อสฺส อิมสฺส, วา เฏ เอสํ เอสานํ อิเมสํ อิเมสานํฯ อมฺหา อสฺมา อิมมฺหา อิมสฺมาฯ อมฺหิ อสฺมิํ อิมมฺหิ อิมสฺมิํ, เอสุ อิเมสุฯ

อิตฺถิยํ อยํ, อิมา อิมาโยฯ อิมํ, อิมา อิมาโยฯ นา ‘‘สฺสา วา เต+ติ+มา+มูหี’’ติ สฺสา วา, วา ฏาเทเส ‘‘สฺส’’ มิจฺจาทินา อิอาเทเส จ กเต อสฺสา อิมิสฺสา อิมาย, อิมาหิ อิมาภิฯ อสฺสา อิมิสฺสา อสฺสาย อิมิสฺสาย อิมายฯ นํวจนสฺส ส+มาเทเส อิมสฺส จ วา ฏาเทเส อสฺส ‘‘สุนํหิ สู’’ติ ทีเฆ จ กเต อาสํ, อญฺญตฺร อิมาสํ อิมาสานํฯ สตฺตมิยํ อสฺสํ อิมิสฺสํ อสฺสา อิมิสฺสา อิมายํ อิมาย, อิมาสุฯ

นปุํสเก –

201. อิมสฺสิ+ทํ วา

อํสิสุ สห เตหิ อิมสฺสิ+ทํ โหติ วา นปุํสเกฯ อิทํ อิมํ, อิเม อิมานิฯ อิทํ อิมํ, อิเม อิมานิฯ อเนน อิมินา อิจฺจาทิ ปุลฺลิงฺคสมํฯ

197. อิเม+ตาน+เมนา+นฺวาเทเส ทุติยายํ

อิมเอตสทฺทานํ กถิตานุกถนวิสเย ทุติยาย+เมนาเทโส โหติฯ อิมํ ภิกฺขุํ วินย+มชฺฌาปย, อโถ เอนํ ธมฺม+มชฺฌาปยฯ อิเม ภิกฺขู วินย+มชฺฌาปย, อโถ เอเน ธมฺม+มชฺฌาปยฯ เอว+เมตสฺส จ โยชนียํฯ

อมุ สิ,

129. มสฺสา+มุสฺส

อนปุํสกสฺสา+มุสฺส มการสฺส โส โหติ สิมฺหิฯ อสุ, โย –

86. โลโป+มุสฺมา

นิยมสุตฺต+มิทํ, อมุสทฺทโต โยนํ โลโป โหติ นิจฺจํ ปุลฺลิงฺเคฯ ทีเฆ อมูฯ ฌลโต โยนํ ‘‘โลโป’’ติ โลเป สิทฺเธปิ โว+ปวาโท+ย+มารมฺโภฯ

อารมฺโภ วจนมฺปตฺติ, ลกฺขณํ โยคลกฺขณํ;

วากฺยํ สตฺถญฺจ อิจฺจาทิ, สุตฺตาน+มภิธายกาฯ

อมุํ, อมูฯ อมุนา, อมูหิ อมูภิฯ