เมนู

88. ปฺเย สิสฺสา

สิสฺส อา โหติ ปฺยาเทเสฯ นิสฺสยนํ กตฺวา นิสฺสายฯ ปุพฺพรูเป วิภชฺช วิภชิยฯ ทิส=อติสชฺชเน, อุทฺทิสฺสฯ ปวิสฺส ปวิสิย ปวิสิตฺวา, อุปนย, อติเสยฺย อติสยิตฺวา, โอหาย โอหิตฺวาฯ อาทาย, ทาสฺสิ+ยง, อาทิยฯ ปฏฺฐาย, วิเจยฺย, วิญฺญาย วิชานิตฺวา, สมาเสติ กิํ, ปตฺวาฯ กฺวจา+ สมาเสปิ พหุลาธิการา, ลตํ ทนฺเตหิ ฉินฺทิยฯ ตถา ภุญฺชิตฺวาฯ

165. ตุํ+ยานา

ตฺวาสฺส วา ตุํ+ยานา โหนฺติ สมาเส กฺวจิฯ อภิหรณํ กตฺวา อภิหฏฺฐุํ, อภิหริตฺวา, ปาทิสมาโส, ‘‘ปุจฺฉาทิโต’’ติ ตสฺส โฐ ปรรูปาทิ จฯ อนุโมทนํ กตฺวา อนุโมทิยาน อนุโมทิตฺวา วา, กานุพนฺเธปิ ‘‘วา กฺวจี’’ติ วิกปฺปตฺตา ‘‘ลหุสฺสุปนฺตสฺสา’’ติ โอกาโรฯ กฺวจา+สมาเสปิ พหุลาธิการา, ทฏฺฐุํ, ทิสโต ตฺวาสฺส ตุมาเทเส ทิสสฺส ทสฯ อญฺญตฺร ‘‘ทิสา วาน+วา ส จา’’ติ ตฺวาสฺส วาน+วา ส โหนฺติ, ทิสฺวาฯ เอวํ ลภนํ กตฺวา ลทฺธา ธนํติอาทีสุ ตสฺส โธ ภวติฯ

อิติ ปโยคสิทฺธิยํ ขาทิกณฺโฑ สตฺตโมฯ

ปโยคสิทฺธิ นิคมนํ

[1]

เย นนฺตตนฺตรตนากรมนฺถเนน,

มนฺถาจโลลฺลสิตญาณวเรน ลทฺธา;

สารามตา+ติสุขิตา สุขยนฺติ จ+ญฺเญ,

เต เม ชยนฺติ คุรโว คุรโว คุเณหิฯ

[2]

ยสฺส สาธุคุณุพฺภูต-กิตฺติ สพฺพตฺต ปตฺถฏา;

โมคฺคลฺลาโน มหาปญฺโญ, ชยตี โส ห สพฺพทาฯ

[3]

ปรมปฺปิจฺฉตา+เนก-สนฺโตสูปสเมสินํ;

สุจิสเลขวุตฺตีนํ, สทา+รญฺญนิวาสินํฯ

[4]

สาสนุโชตการีน+มาเจรตฺต+มุปาคตํ;

อุทุมฺพรคิรีขฺยาตา+ยตนํ ยติปุงฺควํฯ

[5]

เมธงฺกโรติ อาขฺยาต-นามเธยฺยํ ตโปธนํ;

เถรํ ถิรทยา เมธา-นิธานํ สาธุ ปูชิตํฯ

[6]

สิสฺสํ สหาย+มาคมฺม, กลฺยาณมิตฺต+มตฺตโน;

โสเธตุํ สาสนํ สตฺถุ, ปรกฺกม+มกาสิ โยฯ

[7]

สงฺฆรกฺขิตนาเมน, มหาเถเรน ธีมตา;

นิวาสภูเตนา+เนก-คุณาน+ปฺปิจฺฉตาทินํฯ

[8]

โมคฺคลฺลานพฺยากรณ-ปโยคกฺกมสาธกา;

เอตฺตาวตา กตา เอสา, ปโยคสิทฺธิ นิฏฺฐิตาฯ

[9]

เตเนว รจิตา สาธุ, สาสโนทยการินา;

ขุทฺทสิกฺขาย ฏีกา จ, ตถา สมฺพนฺธจินฺตนาฯ

[10]

สุสทฺทสิทฺธิํ โย โยค-นิจฺฉยํ สพฺภิ วณฺณิตํ;

อกา สุโพธาลงฺการํ, ตถา สมฺพนฺธจินฺตนํฯ

[11]

สตฺถสญฺจิตปุญฺเญน, นิพฺพานสาธกํ หิตํ;

สาเธนฺโต โลกนาถสฺส, สทฺธมฺโม ติฏฺฐตํ จิรนฺติฯ

อิติ สงฺฆรกฺขิตมหาสามิเถรปาทวิรจิตา

ปโยคสิทฺธิ นิฏฺฐิตาฯ

(วิเสสลกฺขณํ)ฯ ยถาวุตฺตานํ ปน ปโยคสิทฺธินิคมน คาถานํ เอกาทสนฺนํ ปุพฺเพเยว วกฺขมานา อิมา คาถาโย ทิสฺสนฺติ โปราเณ สีหฬมูลปโยคสิทฺธิปาเฐฯ ตา จ คาถาโย ปจฺฉา สีหฬมูลปโยคสิทฺธิสํโสธเกน เมธงฺกโรติ ครูหิ คหิตนามเธยฺเยน เถเรน ปกฺขิตฺตาติ เวทิตพฺพา, ตสฺมา มยํ ตา คาถาโย สพฺพปจฺฉาเยว อิมสฺมิํ-ฐาเน ฐเปมฯ ตา ปน คาถาโย กตมาติ เจ –

[1]

จาควิกฺกมสทฺธานุ-สมฺปนฺนคุณสามิโน;

ปรกฺกมนรินฺทสฺส, สีหฬินฺทสฺส ธีมโตฯ

[2]

อตฺรเชนา+นุชาเตน, ภูปาลกุลเกตุนา;

ทิสนฺตปตฺถโฏทาร-วิกฺกเมน ยสสฺสินาฯ

[3]

ภุวเนกภุชวฺเหน, มหาราเชน ธีมตา;

จตุปจฺจยทาเนน, สตตํ สมุปฏฺฐิโตฯ

[4]

‘‘ชมฺพุโทณี’’ติ วิขฺยาตา –

วาเส นิวสโต สโต;

สุมงฺคลมหตฺเถร –

สามิโน สุจิวุตฺติโนฯ

[5]

วํเส วิสุทฺเธ สํชาโต,

ปนฺถเสนาสเน รโต;

ปริยตฺติมหาสินฺธุ –

นิยฺยามกธุรนฺธโรฯ

[5]

อปฺปิจฺฉาทิคุณูเปโต, ชินสาสนมามโก;

วเนรตมหตฺเถโร, เมธงฺกรสมวฺหโยฯ

[6]

ปาฏวตฺถาย ภิกฺขูนํ, วินเย สุวิสารโท;

ปโยคสิทฺธิํ โสธยิ, สทา สปฺปญฺญโคจรํฯ

[7]

อิมํ ลิขิตปุญฺเญน, เมตฺเตกฺยํ อุปสํกมิ;

ปติฏฺฐหิตฺวา สรเณ, สุปฺปติฏฺฐามิ สาสเนติฯ

ปโยคสิทฺธิสิทฺธํฯ