เมนู

93. โส โลมาติ

โลมา โส, ปหูตา โลมา อสฺส อตฺถีติ โลมโส, โลมสา กญฺญาฯ

94. อิมิ+ยาติ

อิม+อิยา โหนฺติ, ปุตฺโต อสฺส อตฺถีติ ปุตฺติโม, กิตฺติโม, ปุตฺติโย, กปฺปิโย, ชฏิโย, หานภาคิโย, เสนิโยฯ (อตฺถฺยตฺถตทฺธิตํ)ฯ

95. โต ปญฺจมฺยา

ปญฺจมฺยนฺตา พหุลํ โต โหติ วาฯ โตอาทิปจฺจยนฺตา นิปฺผนฺนนิปาตา, เตหิ ปราสํ วิภตฺตีนํ ‘‘อสํขฺเยหิ สพฺพาสํ’’ติ โลโปวฯ คามโต อาคจฺฉตีติ คามสฺมา อาคจฺฉติ, โจรโต ภายตีติ โจเรหิ ภายติ, สตฺถโต ปริหีโน สตฺถา ปริหีโนฯ เอวํ ปุริสโต, ราชโต, อคฺคิโต, หตฺถิโต, เหตุโต, ยุตฺติโต, อิตฺถิโต, ภิกฺขุนิโต, ยาคุโต, ชมฺพุโต, จิตฺตโต, อายุโตฯ สพฺพาทิโต-สพฺพโต, ยโต, ตโต อิจฺจาทิฯ

96. อิโต+เต+ตฺโต กุโต

โตมฺหิ อิมสฺส ฏิ นิปจฺจเต เอตสฺส ฏ+เอฏ กิํ สทฺทสฺส กุตฺตญฺจฯ อิโต อิมสฺมา, อโต เอตฺโต เอตสฺมา, กุโต กสฺมาฯ

97. อภฺยาทีหิติ

โตฯ อภิโต, ปริโต, ปจฺฉโต, เหฏฺฐโตฯ

98. อาทฺยาทีหิติ

สตฺตมฺยนฺเตหิ โต โหติฯ อาโท อาทิโต, มชฺฌโต, อนฺตโต, ปิฏฺฐิโต, ปสฺสโต, มุขโตฯ ปฐมนฺตา ยโต+ทกํ ต+ทาทิตฺตํ, ยํ อุทกํ, ตเทวา+ทิตฺตนฺติ อตฺโถฯ

99. สพฺพาทิโต สตฺตมฺยา ตฺร+ตฺถา

สพฺพาทีหิ สตฺตมฺยนฺเตหิ ตฺร+ตฺถา วา โหนฺติฯ สพฺพตฺร สพฺพตฺถ สพฺพสฺมิํ, ยตฺร ยตฺถ, ตตฺร ตตฺถ อิจฺจาทิฯ พหุลาธิการา น ตุมฺหอมฺเหหิฯ

100. กตฺเถ+ตฺถ+กุตฺรา+ตฺร กฺเว+หิ+ธ

เอเตหิ ‘‘สพฺพาทิโต’’ติอาทินา ตฺร+ตฺถาฯ เสสาเทสา จ ปจฺจยา จ อิมินาว นิปจฺจนฺเตฯ อิมินา กิสฺส ก+กุ จ, เอตสฺส เฏ+ฏา จ, วปจฺจเย กิสฺส อิโลโป จ, ห+ธปจฺจเยสุ อิมสฺส ฏิ จ นิปจฺจเตฯ กสฺมิํ กตฺถ กุตฺร กฺว, เอตสฺมิํ เอตฺถ อตฺร, อิมสฺมิํ อิห อิธฯ

101. ธิ สพฺพา วาติ

สพฺพสฺมา ธิ วาฯ สพฺพสฺมิํ สพฺพธิ สพฺพตฺรฯ

102. ยา หินฺติ

ยสทฺทา หิํ, ยสฺมิํ ยหิํ ยตฺรฯ

103. ตา หญฺจติ

ตสทฺทา หํ โหติ หิญฺจฯ ตหํ ตหิํ ตตฺรฯ