70. อิโย หิเตติ

หิตตฺเถ อิโยฯ อุปาทานานํ หิตํ อุปาทานิยํฯ

71. จกฺขาทิโต สฺโสติ

หิตตฺเถ สฺโสฯ จกฺขุโน หิตํ จกฺขุสฺสํ, อายุสฺสํฯ

72. ณฺโย ตตฺถ สาธุ

สตฺตมฺยนฺตา ตตฺถ สาธูติ อสฺมิํ อตฺเถ ณฺโย โหติฯ สาธูติ กุสโล โยคฺโค หิโต วาฯ สภายํ กุสโล สพฺโภ, อาการโลโปฯ ปริสายํ สาธุ ปาริสชฺโช, ‘‘โกสชฺชา’’ทินา ชาคเม อการวุทฺธิฯ เมธาย หิตํ เมชฺฌํ ฆตํฯ ปาทานํ หิตํ ปชฺชํ เตลํฯ ‘‘อญฺญสฺมิํ’’ติ ณฺโย, รถํ วหตีติ รจฺฉาฯ

73. กมฺมา นิย+ญฺญาติ

กมฺมสทฺทา สาธฺวตฺเถ นิย+ญฺญา โหนฺติฯ กมฺเม สาธุ กมฺมนิยํ กมฺมญฺญํฯ

74. กถาทิตฺวิ+โกติ

อิโกฯ กถายํ กุสโล กถิโกฯ ธมฺมกถิโก, สงฺคามิโก, ปวาสิโก, อุปวาสิโกฯ

75. ปถาทีหิ เณยฺโยติ

เณยฺโยฯ ปเถ หิตํ ปาเถยฺยํ, สปติสฺมิํ หิตํ สาปเตยฺยํ ธนํฯ ปทีเปยฺยํ เตลํฯ