32. ตตฺถ วสติ วิทิโต ภตฺโต นิยุตฺโต

สตฺตมฺยนฺตา วสตีตฺเววมาทีสฺว+ตฺเถสุ ณิโก โหติฯ รุกฺขมูเล วสตีติ รุกฺขมูลิโก, อารญฺญิโก, ราชคหิโก, มาคธิโก, โสสานิโกฯ โลเก วิทิโต โลกิโกฯ จตุมหาราเชสุ ภตฺตา จาตุมฺมหาราชิกาฯ ทฺวาเร นิยุตฺโต โทวาริโก, ทสฺโสก ตทมินาทิปาฐาฯ ภณฺฑาคาริโกฯ อิเก-นวกมฺมิโก, อาทิกมฺมิโกฯ กิเย-ชาติกิโย, อนฺธกิโยฯ

33. ตสฺสิ+ทํ

ฉฏฺฐิยนฺตา อิท+มิจฺจ+สฺมิํ อตฺเถ ณิโก โหติฯ สงฺฆสฺส อิทํ สงฺฆิกํ, ปุคฺคลิกํ, สกฺยปุตฺติโก, นาฏปุตฺติโก, เชนทตฺติโกฯ กิเย-สสฺส อิทํ สกิโย, ปรกิโยฯ นิเยอตฺตนิยํฯ เก-สโก, รญฺโญ อิทํ ราชกํ ภณฺฑํฯ

34. โณ

ฉฏฺฐิยนฺตา อิท+มิจฺจ+สฺมิํ อตฺเถ โณ โหติฯ กจฺจายนสฺส อิทํ กจฺจายนํ, พฺยากรณํ, โสคตํ สาสนํ, มาหิสํ มํสาทิฯ

35. ควาทีหิ โย

ควาทีหิ ฉฏฺฐิยนฺเตหิ อิท+มิจฺจ+สฺมิํ อตฺเถ โย โหติฯ คุนฺนํ อิทํ คพฺยํ, อวง, มํสาทิฯ อิโลเป กพฺพํฯ ทุโน อิทํ ทพฺพํฯ

36. ปิติโต ภาตริ เรยฺยณ

‘‘ปิติโต มาติโต’’ติ เตน เตน สุตฺตนิปาเตเนว อุสฺส อิฯ ปิตุสทฺทา ตสฺส ภาตริ เรยฺยณฯ ปิตุ ภาตา เปตฺเตยฺโยฯ

37. มาติโต จ ภคินิยํ จฺโฉ

มาตุโต จ ปิตุโต จ เตสํ ภคินิยํ จฺโฉ โหติฯ มาตุ ภคินิ มาตุจฺฉา, ปิตุ ภคินิ ปิตุจฺฉาฯ กถํ ‘‘มาตุ ภาตา มาตุโล’’ติ, ‘‘มาตุลาทิตฺวานี’’ติ นิปาตนา ลปจฺจโยฯ

38. มาตาปิตูสฺวา+มโห

มาตาปิตูหิ เตสํ มาตาปิตูสฺวา+มโห โหติฯ มาตุ มาตา มาตามหี, มาตุ ปิตา มาตามโหฯ ปิตุ มาตา ปิตามหี, ปิตุ ปิตา ปิตามโหฯ น ยถาสงฺขฺยํ ปจฺเจกาภิสมฺพนฺธโต วิสุํ วิสุํ มาตาปิตุสทฺเทหิ เตสํ มาตาปิตุนฺนํ อตฺเถ ปจฺจโย โหติฯ

39. หิเต เรยฺยณ

มาตาปิตูหิ หิเต เรยฺยณ โหติฯ มาตุ หิโต มตฺเตยฺโย, เปตฺเตยฺโยฯ