ภิทิ วิทารเณ, ภินฺทติ, ภินฺทนฺติ อิจฺจาทิฯ
ยุช โยเค, ยุญฺชติ, ยุญฺชนฺติฯ ยุชฺชเต, ยุชฺชนฺเตฯ ยุชฺชติ, ยุชฺชนฺติฯ ยุญฺชตุฯ ยุชฺชตํฯ ยุญฺเชฯ ยุชฺเชถฯ อยุญฺชิ, อยุญฺชิํสุฯ อยุชฺชิตฺถ, อยุชฺชิฯ ยุญฺชิสฺสติ, ยุญฺชิสฺสนฺติฯ ยุชฺชิสฺสเต, ยุชฺชิสฺสนฺเตฯ ยุชฺชิสฺสติ, ยุชฺชิสฺสนฺติฯ อยุญฺชิสฺสฯ อยุชฺชิสฺสถ, อยุชฺชิสฺส อิจฺจาทิฯ
ภุช ปาลนพฺยวหรเณสุ, ภุญฺชติ, ภุญฺชนฺติ อิจฺจาทิฯ
ภวิสฺสนฺติยํ ‘‘กรสฺส สปฺปจฺจยสฺส กาโห’’ติ สุตฺเต สปฺปจฺจยคฺคหเณน ภุชโต สฺสสฺส ขาเทโส, ‘‘โก เข จา’’ติ ธาตฺวนฺตสฺส กกาโร, วุทฺธิ, โภกฺขติ, โภกฺขนฺติฯ โภกฺขสิ, โภกฺขถฯ โภกฺขามิ, โภกฺขามฯ ขาเทสาภาเว ภุญฺชิสฺสติ, ภุญฺชิสฺสนฺติ อิจฺจาทิฯ
มุจ โมจเน, มุญฺจติ, มุญฺจนฺติฯ มุจฺจเต, มุจฺจนฺเตฯ มุญฺจตุ, มุญฺจนฺตุฯ มุจฺจตํ, มุจฺจนฺตํฯ มุญฺเจ, มุญฺเจยฺย, มุญฺเจยฺยุํฯ มุจฺเจถ, มุจฺเจรํฯ อมุญฺจิ, อมุญฺจิํสุฯ อมุจฺจิตฺถฯ โมกฺขติ, โมกฺขนฺติฯ มุญฺจิสฺสติ, มุญฺจิสฺสนฺติฯ มุจฺจิสฺสเต, มุจฺจิสฺสนฺเตฯ อมุญฺจิสฺส, อมุจฺจิสฺสถ อิจฺจาทิฯ
รุธาทิคโณฯ
ทิวาทิคณ
ทิวุ กีฬาวิชิคีสาพฺยวหารชุติถุติกนฺติคตีสุฯ ปุเร วิย ธาตฺวนฺตโลปวิภตฺตุปฺปตฺติโยฯ
[510] ทิวาทิโต โยฯ
ทิวาทิโต ธาตุคณโต ยปฺปจฺจโย โหติ กตฺตริ วิหิเตสุ วิภตฺติปฺปจฺจเยสุฯ
‘‘ยคฺคหณํ, จวคฺค ยการ วการตฺตํ สธาตฺวนฺตสฺส, ปุพฺพรูป’’นฺติ จ วตฺตเตฯ
[511] ตถา กตฺตริ จฯ
ยถา ภาวกมฺเมสุ ยปฺปจฺจยสฺสาเทโส โหติ, ตถา กตฺตริปิ ยปฺปจฺจยสฺส สธาตฺวนฺตสฺส จวคฺค ยการวการาเทโส, ปุพฺพรูปญฺจ กาตพฺพานีติ ธาตฺวนฺตสฺส วการตฺตา สห เตน ยการสฺส วกาเร กเต ทฺวิภาโว, ‘‘โท ธสฺส จา’’ติ เอตฺถ จคฺคหเณน ‘‘โพ วสฺสา’’ติ วุตฺตตฺตา วการทฺวยสฺส พการทฺวยํ, ทิพฺพติ, ทิพฺพนฺติฯ ทิพฺพสิ, ทิพฺพถฯ ทิพฺพามิ, ทิพฺพามฯ
กมฺเม ทิพฺพเต, ทิพฺพนฺเตฯ ทิพฺพติ, ทิพฺพนฺติฯ ทิพฺพตุฯ ทิพฺพตํฯ ทิพฺเพฯ ทิพฺเพถฯ อทิพฺพิฯ อทิพฺพิตฺถฯ ทิพฺพิสฺสติฯ ทิพฺพิสฺสเตฯ อทิพฺพิสฺส อิจฺจาทิฯ
สิวุ ตนฺตสนฺตาเน, สิพฺพติ, สิพฺพนฺติฯ สิพฺพตุฯ สิพฺเพยฺยฯ อสิพฺพิ, สิพฺพิฯ สิพฺพิสฺสติฯ อสิพฺพิสฺส อิจฺจาทิฯ
ปท คติมฺหิ, อุปุพฺโพ ทฺวิตฺตํ, ‘‘ตถา กตฺตริ จา’’ติ สธาตฺวนฺตสฺส ยการสฺส ชกาโร, ทฺวิตฺตญฺจฯ
อุปฺปชฺชติ, อุปฺปชฺชนฺติฯ อุปฺปชฺชเต, อุปฺปชฺชนฺเต, อุปฺปชฺชเรฯ
กมฺเม ปฏิปชฺชเต, ปฏิปชฺชนฺเตฯ ปฏิปชฺชติ, ปฏิปชฺชนฺติฯ ภาเว อุปฺปชฺชเต ตยาฯ
ตถา อุปฺปชฺชตุฯ อุปฺปชฺเชยฺยฯ อุทปชฺชาฯ อุทปชฺชถฯ อุทปาทิ, อุปฺปชฺชีฯ อุปฺปชฺชิตฺถฯ อุปฺปชฺชิสฺสติฯ อุปฺปชฺชิสฺส, อุปฺปชฺชิสฺสา อิจฺจาทิฯ
พุธ อวคมเน, ยปฺปจฺจยปรตฺตา น วุทฺธิ, ฌการาเทโสว วิเสโส, ธมฺมํ พุชฺฌติ, พุชฺฌนฺติฯ พุชฺฌเต, พุชฺฌนฺเต, พุชฺฌเร วาฯ
กมฺเม พุชฺฌเต มยา ธมฺโม, พุชฺฌนฺเตฯ พุชฺฌติ, พุชฺฌนฺติฯ พุชฺฌตุฯ พุชฺเฌยฺยฯ อพุชฺฌิฯ อพุชฺฌิตฺถฯ พุชฺฌิสฺสติฯ อพุชฺฌิสฺสฯ
ยุธ สมฺปหาเร, ยุชฺฌติ, ยุชฺฌนฺติฯ
กุธ โกเป, กุชฺฌติ, กุชฺฌนฺติฯ
วิธ ตาฬเน, วิชฺฌติ, วิชฺฌนฺติ อิจฺจาทิฯ
นห พนฺธเน, ‘‘ห วิปริยโย’’ติ โยควิภาเคน วิปริยโยฯ สนฺนยฺหติ, สนฺนยฺหนฺติ อิจฺจาทิฯ
มน ญาเณ, ญาเทโสว วิเสโส, มญฺญติ, มญฺญนฺติ อิจฺจาทิฯ
ทา อาทาเน, สํอาปุพฺโพ ‘‘กฺวจิ ธาตู’’ติอาทินา ยมฺหิ ธาตฺวนฺตสฺส อิกาโร, สีลํ สมาทิยติ, สมาทิยนฺติ อิจฺจาทิฯ
ตุส ปีติมฺหิ, ยปฺปจฺจยสฺส ปุพฺพรูปตฺตํ, ตุสฺสติ, ตุสฺสนฺติ อิจฺจาทิฯ
ตถา สมุ อุปสเม, สมฺมติ, สมฺมนฺติฯ
กุป โกเป, กุปฺปติ, กุปฺปนฺติฯ
ชนชนเน, ‘‘ชนาทีนมา ติมฺหิ จา’’ติ เอตฺถ ‘‘ชนาทีนมา’’ติ โยควิภาเคน ยมฺหิ ธาตฺวนฺตสฺส อากาโรฯ ชายติ, ชายนฺติฯ ชายเต, ชายนฺเตฯ
กมฺเม ชนียติ, ชนียนฺติฯ ชายตุฯ ชาเยยฺยฯ อชายิ, อชนิฯ ชายิสฺสติ, ชนิสฺสติฯ อชายิสฺส, อชนิสฺส อิจฺจาทิฯ
ทิวาทิคโณฯ
สฺวาทิคณ
สุ สวเณ, ปุเร วิย วิภตฺตุปฺปตฺติฯ
[512] สฺวาทิโต ณุณาอุณา จฯ
สุอิจฺเจวมาทิโต ธาตุคณโต ณุ ณาอุณาอิจฺเจเต ปจฺจยา โหนฺติ กตฺตริ วิหิเตสุ วิภตฺติปฺปจฺจเยสุฯ ‘‘อญฺเญสุ จา’’ติ เอตฺถ จคฺคหเณน ณุปฺปจฺจยสฺส วุทฺธิฯ ตตฺเถวานุวตฺติตวาคฺคหเณน สฺวาทีนํ ณุณาทีสุ น วุทฺธิฯ
ธมฺมํ สุโณติ, สรโลปาทิ, สุณนฺติฯ สุโณสิ, สุโณถฯ สุโณมิ, สุโณมฯ ณาปจฺจเย สุณาติ, สุณนฺติฯ สุณาสิ, ‘‘กฺวจิ ธาตู’’ติอาทินา รสฺสตฺตํ, สุณสิ, สุณาถ, สุณถฯ สุณามิ, สุณามฯ
กมฺเม ยปฺปจฺจเย ‘‘กฺวจิ ธาตู’’ติอาทินา ทีโฆ, สูยเต, สูยนฺเตฯ สูยติ, สูยนฺติฯ ทฺวิตฺเต รสฺสตฺตํ, สุยฺยติ, สุยฺยนฺติฯ สูยฺยติ, สูยฺยนฺติ วาฯ
สุโณตุ, สุณนฺตุฯ สุโณหิ, สุโณถฯ สุโณมิ, สุโณมฯ สุณาตุ, สุณนฺตุฯ สุณ, สุณาหิ, สุณาถฯ สุณามิ, สุณามฯ
