ตติยกณฺฑ

[161, 244. ตุมฺห’มฺเหหิ นมากํฯ

เตหิ ตุมฺหอมฺเหหิ นํวจนสฺส อากํ โหติฯ

ตุมฺหากํ, อมฺหากํฯ

นมิติ กิมตฺถํ? ตุมฺเหหิ, อมฺเหหิฯ

[162, 237. วา ยฺวปฺปฐโมฯ

เตหิ ตุมฺหอมฺเหหิ โย อปฺปฐโม อากํโหติ วาฯ

ตุมฺหากํ ปสฺสามิ, ตุมฺเห ปสฺสามิ วาฯ อมฺหากํ ปสฺสสิ, อมฺเห ปสฺสสิ วาฯ

โยติ กิมตฺถํ? ตุมฺเหหิ, อมฺเหหิฯ

อปฺปฐโมติ กิมตฺถํ? คจฺฉถ ตุมฺเห, คจฺฉาม มยํฯ

วาติวิกปฺปนตฺเถน โยนํ อํ อานํ โหนฺติฯ ตุมฺหํ ตุมฺหานํฯ อมฺหํ, อมฺหานํฯ

[163, 240. สสฺสํฯ

เตหิ หุมฺหอมฺเหหิ สสฺส วิภตฺติสฺส อํ อาเทโส โหติ วาฯ

ตุมฺหํ ทียเต, ตว ทียเตฯ ตุมฺหํ ปริคฺคโห, ตว ปริคฺคโหฯ อมฺหํ ทียเต, มม ทียเตฯ อมฺหํ ปริคฺคโห, มม ปริคฺคโหฯ

สสฺเสติ กิมตฺถํ? ตุมฺเหสุ, อมฺเหสุฯ

[164, 200. สพฺพนาม’การเต ปฐโมฯ

สพฺเพสํ สพฺพนามานํ อการโต โย ปฐโม เอตฺตมาปชฺชเตฯ

สพฺเพ, เย, เต, เก, ตุมฺเห, อมฺเห, อิเมฯ

สพฺพนามาติ กิมตฺถํ? เทวา, อสุรา, นาคา, คนฺธพฺพา, มนุสฺสาฯ

อการโตติ กิมตฺถํ? อมู ปุริสา ติฏฺฐนฺติฯ

โยติ กิมตฺถํ? สพฺโพ, โย, โส, โก, อยํฯ

ปฐมคฺคหณํ อุตฺตรสุตฺตตฺถํฯ

[165, 208. ทฺวนฺทฏฺฐา วาฯ

ตสฺมา สพฺพนาม’การโต ทฺวนฺทฏฺฐา โย ปฐโม เอตฺตมาปชฺชเต วาฯ

กตรกตเม, กตรกตมา วาฯ

สพฺพนามาติ กิมตฺถํ? เทวาสุรนาค คนฺธพฺพมนุสฺสาฯ

ทฺวนฺทฏฺฐาติ กิมตฺถํ เต, สพฺเพฯ

[166, 209. นาญฺญํ สพฺพนามิกํฯ

สพฺพนามิกานํ ทฺวนฺทฏฺเฐ นาญฺญํ การิยํ โหติ,

ปุพฺพาปรานํ, ปุพฺพุตฺตรานํ, อธรุตฺตรานํฯ

[167, 210. พหุพฺพีหิมฺหิ จฯ

พหุพฺพีหิมฺหิ จ สมาเส สพฺพนามวิธานญฺจ นาญฺญํ การิยํ โหติฯ

ปิยปุพฺพาย, ปิยปุพฺพานํ, ปิยปุพฺเพ, ปิยปุพฺพสฺสฯ

เจติ กิมตฺถํ? สพฺพนามวิธานํ โหติ, ทกฺขิณ ปุพฺพสฺสํ, ทกฺขิณปุพฺพสฺสา, อุตฺตรปุพฺพสฺสํ, อุตฺตรปุพฺพสฺสาฯ

[168, 203. สพฺพโต นํ สํ สานํฯ

สพฺพโต สพฺพนามโต นํวจนสฺส สํสานํอิจฺเจเต อาเทสา โหนฺติฯ

สพฺเพสํ, สพฺเพสานํ, สพฺพาสํ, สพฺพาสานํฯ เยสํ, เยสานํ, ยาสํ, ยาสานํฯ เตสํ, เตสานํ, ตาสํ, ตาสานํฯ เกสํ, เกสานํ, กาสํ, กาสานํฯ อิเมสํ, อิเมสานํ, อิมาสํ, อิมาสานํฯ อมูสํ, อมูสานํฯ

นมิติ กิมตฺถํ? สพฺพสฺส, ยสฺส, ตสฺส, กสฺสฯ เอวํ สพฺพตฺถฯ

[169, 117. ราชสฺส ราชุ สุนํหิสุ จฯ

สพฺพสฺเสว ราชสทฺทสฺส ราชุอาเทโส โหติ สุนํหิอิจฺเจเตสุฯ

ราชูสุ, ราชูนํ, ราชูหิ, ราชูภิฯ

สุนํหิสูติ กิมตฺถํ? ราชาฯ

จคฺคหณมวธารณตฺถํฯ ราเชสุ, ราชานํ, ราเชหิ ราเชภิฯ

[170, 220. สพฺพสฺสิมสฺเส วาฯ

สพฺพสฺเสว อิมสทฺทสฺส เอกาโร โหติ วา สุนํหิอิจฺเจเตสุฯ

เอสุ, อิเมสุ, เอสํ, อิเมสํ, เอหิ, เอภิ, อิเมหิ, อิเมภิฯ

อิมสฺเสติ กิมตฺถํ? เอเตสุ, เอเตสํ, เอเตหิ, เอเตภิฯ

[171, 219. อนิมิ นามฺหิ จฯ

อิมสทฺทสฺส สพฺพสฺเสว อน อิมิอิจฺเจเต อาเทสา โหนฺติ นามฺหิ วิภตฺติมฺหิฯ

อเนน ธมฺมทาเนนฯ สุขิตา โหตุ สา ปชาฯ

อิมินา พุทฺธปูเชน, ปตฺวาน อมตํ ปทํฯ

นามฺหีติ กิมตฺถํ? อิเมสุ, อิเมสํ, อิเมหิ, อิเมภิฯ

[172, 218. อนปุํสกสฺสา ยํ สิมฺหีฯ

อิมสทฺทสฺส สพฺพสฺเสว อนปุํสกสฺส อยํอาเทโส โหติ สิมฺหิ วิภตฺติมฺหิฯ

อยํ ปุริโส, อยํ อิตฺถีฯ

อนปุํสกสฺเสติ กิมตฺถํ? อิทํ จิตฺตํ ติฏฺฐติฯ

สิมฺหีติ กิมตฺถํ? อิมํ ปุริสํ ปสฺสสิ ตฺวํฯ

[173, 223. อมุสฺส โม สํฯ

อมุสทฺทสฺส อนปุํสกสฺส มกาโร สการมาปชฺชเต วา สิมฺหิ วิภตฺติมฺหิฯ

อสุ ราชา, อสุ อิตฺถี, อมุโก ราชา, อมุกา อิตฺถีฯ

อนปุํสกสฺเสติ กิมตฺถํ? อทุํ ปุปฺผํ วิโรจติฯ

อมุสฺเสติ กิมตฺถํ? อยํ ปุริโส ติฏฺฐติฯ

สิมฺหีติ กิมตฺถํ? อมฺหํ ปุริสํ ปสฺสสิฯ

[174, 211. เอตเตสํ โตฯ

เอต ตอิจฺเจเตสํ อนปุํสกานํ ตกาโร สการมาปชฺชเต สิมฺหิ วิภตฺติมฺหิฯ

เอโส ปุริโส, เอสา อิตฺถี, โส ปุริโส, สา อิตฺถีฯ

เอตเตสมิติ กิมตฺถํ? อิตโร ปุริโส, อิตรา อิตฺถีฯ

อนปุํสกานมิติ กิมตฺถํ? เอตํ จิตฺตํ, เอตํ รูปํฯ ตํ จิตฺตํ, ตํ รูปํฯ

[157, 212. ตสฺส วา นตฺตํ สพฺพตฺถฯ

ตสฺส สพฺพนามสฺส ตการสฺส นตฺตํ โหติ วา สพฺพตฺถ ลิงฺเคสุฯ

นาย, ตาย, นํ, ตํ, เน, เต, เนสุ, เตสุ, นมฺหิ, ตมฺหิ, นาหิ, ตาหิ, นาภิ, ตาภิฯ

[176, 213. สสฺมาสฺมิํสํสาสฺวตฺตํฯ

ตสฺส สพฺพนามสฺส ตการสฺส สพฺพสฺเสว อตฺตํ โหติ วา สสฺมาสฺมิํ สํสาอิจฺเจเตสุ สพฺพตฺถ ลิงฺเคสุฯ

อสฺส, ตสฺส, อสฺมา, ตสฺมา, อสฺมิํ, ตสฺมิํ, อสฺสํ, ตสฺสํ, อสฺสา, ตสฺสาฯ

ตการสฺเสติ กิมตฺถํ? อมุสฺสํ, อมุสฺสาฯ

เอเตสฺวีติ กิมตฺถํ? เนสุ, เตสุฯ

[177, 221. อิมสทฺทสฺส จฯ

อิมสทฺทสฺส จ สพฺพสฺเสว อตฺตํ โหติ วา สสฺมาสฺมิํ สํ สาอิจฺเจเตสุ สพฺพตฺถ ลิงฺเคสุฯ

อสฺส , อิมสฺส, อสฺมา, อิมสฺมา, อสฺมิํ, อิมสฺมิํ, อสฺสํ, อิมิสฺสํ, อสฺสา, อิมิสฺสาฯ

อิมสทฺทสฺเสติ กิมตฺถํ? เอติสฺสํ, เอติสฺสาฯ

[178, 22. สพฺพโต โกฯ

สพฺพโต สพฺพนามโต กการาคโม โหติ วา สิมฺหิ วิภตฺติมฺหิฯ

สพฺพโก, ยโก, สโก, อมุโก, อสุโกฯ

วาติ กิมตฺถํ? สพฺโพ, โย, โส, โกฯ

สพฺพนามโตติ กิมตฺถํ? ปุริโสฯ

ปุน สพฺพโตคฺคหเณน อญฺญสฺมาปิ กการาคโม โหติ, หีนโก, โปตโกฯ

[179, 204. ยปโต สฺมิํสานํ สํสาฯ

สพฺพโต สพฺพนามโต ฆปสญฺญโต สฺมิํสอิจฺเจเตสํ สํสา อาเทสา โหนฺติ วา ยถาสงฺขฺยํฯ

สพฺพสฺสํ, สพฺพสฺสา, สพฺพายํ, สพฺพาย, อิมิสฺสํ, อิมิสฺสา, อิมายํ, อิมาย, อมุสฺสํ, อมุสฺสา, อมุยํ, อมุยาฯ

สพฺพนามโตติ กิมตฺถํ? อิตฺถิยํ, อิตฺถิยาฯ

สฺมิํสานมิติ กิมตฺถํ? อมุโยฯ

[180, 207. เนตาหิ สฺมิมาย ยาฯ

เอเตหิ สพฺพนาเมหิ ฆปสญฺเญหิ สฺมิํวจนสฺส เนว อาย ยาอาเทสา โหนฺติฯ

เอติสฺสํ, เอตายํ, อิมิสฺสํ, อิมายํ, อมุสฺสํ, อมุยํฯ

สฺมิํนฺติ กิมตฺถํ? ตาย อิตฺถิยา มุขํฯ

เอตาหีติ กิมตฺถํ? กญฺญาย, วีณาย, คงฺคาย, กปาลิกายฯ

[181, 95. มโนคณาทิโต สฺมิํนานมิอาฯ

ตสฺมา มโนคณาทิโต สฺมิํนาอิจฺเจเตสํ อิการอาการาเทสา โหนฺติ วา ยถาสงฺขฺยํฯ

มนสิ, มนุสฺมิํ, สิรสิ, สิรสฺมิํ, มนสา, มเนน, วจสา, วเจน, สิรสา, สิเรน, สรสา, สเรน, ตปสา, ตเปน, วยสา, วเยน, ยสสา, ยเสน, เตชสา, เตเชน, อุรสา, อุเรน, ถามสา, ถาเมนฯ

สฺมิํนานมิติ กิมตฺถํ? มโน, สิโร, ตโม, ตโป, เตโชฯ

อาทิคฺคหเณน อญฺญาสฺมาปิ สฺมิํนานํ อิการอาการาเทสา โหนฺติ, พิลสิ, พิลสา, ปทสิ, ปทสาฯ

[182, 97. สสฺส โจฯ

ตสฺมา มโนคณาทิโต สสฺส จ โอกาโร โหติฯ

มนโส, ถามโส, ตปโสฯ

[183, 48. เอเตสโม โลเปฯ

เอเตสํ มโนคณาทีนํ อนฺโต โอตฺตมาปชฺชเต วิภตฺติโลเป กเตฯ

มโนมยํ, อโยมยํ, เตโชสเมน, ตโปคุเณน, สิโรรุเหนฯ

อาทิคฺคหณํกิมตฺถํ? อญฺเญสมนฺโต โอตฺตมาปชฺชเตฯ อาโปสเมน, วาโยสเมนฯ

โลเปติ กิมตฺถํ? ปทยา, ตปสา, ยสสา, วจสา, มนสา, เอวมญฺเญปิ โยเชตพฺพาฯ

[184, 96. ส สเร วาคโมฯ

เอเตเหว มโนคณาทีหิ วิภตฺตาเทเส สเร ปเร สการาคโม โหติ วาฯ

มนสา, วจสา, มนสิ, วจสิฯ

วาติ กิมตฺถํ? มเนน, เตเชน, วเสน,

สเรติ กิมตฺถํ? มโน, เตโช, ยโสฯ

ปุน อาทิคฺคหเณน อญฺญสฺมิมฺปิ ปจฺจเย ปเร สการาคโม โหติฯ มานสิกํ, วาจสิกํฯ

[185, 112. สนฺตสทฺทสฺส โส เต โพ จนฺเตฯ

สพฺพสฺส สนฺตสทฺทสฺส สการาเทโส โหติ ภกาเร ปเร, อนฺเต จ พการาคโม โหติฯ

สพฺภิเรว สมาเสถ,

สพฺภิกุพฺเพถ สนฺถวํฯ

สตํ สทฺธมฺมมญฺญาย,

เสยฺโย โหติ น ปาปิโยฯ

ชีรนฺติ เว ราชรถา สุจิตฺตาฯ

อโถ สรีรมฺปิ ชรํ อุเปติฯ

สตญฺจ ธมฺโม น ชรํ อุเปติ,

สนฺโต หเว สพฺภิ ปเวทยนฺติฯ

สพฺภูโต, สพฺภาโวฯ

เภติ กิมตฺถํ? สนฺเตหิ ปูชิโต ภควาฯ

จคฺคหณํ กฺวจิ สการสฺเสว ปสิทฺธตฺถํฯ สกฺกาโร, สกฺกโตฯ

[196, 107. สิมฺหิคจฺฉนฺตาทีนํ นฺตสทฺโท อํฯ

สิมฺหิ คจฺฉนฺตาทีนํ นฺตสทฺโท อมาปชฺชเต วาฯ

คจฺฉํ, คจฺฉนฺโต, มหํ, มหนฺโต, จรํ, จรนฺโต, ขาทํ, ขาทนฺโตฯ

คจฺฉนฺตาทีนมิติ กิมตฺถํ? อนฺโต, ทนฺโต, วนฺโต, สนฺโตฯ

[187, 108. เสเสสุ นฺตุวฯ

คจฺฉนฺตาทีนํนฺตสทฺโทนฺตุปฺปจฺจโยว ทฏฺฐพฺโพ เสเสสุ วิภตฺติปฺปจฺจเยสุฯ

คจฺฉโต, มหโต, คจฺฉติ, มหติ, คจฺฉตา, มหตาฯ

เสเสสูติ กิมตฺถํ? คจฺฉํ, มหํ, จรํ, ขาทํฯ

[188, 115. พฺรหฺมตฺต สข ราชาทิโต อมานํฯ

พฺรหฺม อตฺต สข ราชอิจฺเจวมาทิโต อํวจนสฺส อานํ โหติ วาฯ

พฺรหฺมานํ, พฺรหฺมํ, อตฺตานํ, อตฺตํ, สขานํ, สขํ, ราชานํ, ราชํฯ

อมิติ กิมตฺถํ? ราชาฯ

[189, 113. สฺยา จฯ

พฺรหฺม อตฺต สข ราชอิจฺเจวมาทิโต สิวจนสฺส อา จ โหติฯ

พฺรหฺมา, อตฺตา, สขา, ราชา, อาตุมาฯ

[190, 114. โยนมาโนฯ

พฺรหฺมอตฺต สข ราชอิจฺเจวมาทิโต โยนํ อาโนอาเทโส โหติฯ

พฺรหฺมาโน, อตฺตาโน, สขาโน, ราชาโน, อาตุมาโนฯ

[191, 130. สขโต จาโย โนฯ

ตสฺมา สขโต จ โยนํ อาโย โน อาเทสา โหนฺติฯ

สขาโย, สขิโนฯ

โยนมิติ กิมตฺถํ? สขาฯ

[192, 135. สฺมิเมฯ

ตสฺมา สขโต สฺมิํวจนสฺส เอกาโร โหติฯ สเขฯ

[193, 122. พฺรหฺมโต คสฺส จฯ

ตสฺมา พฺรหฺมโต คสฺส จ เอกาโร โหติฯ เห พฺรหฺเมฯ

[194, 131. สขนฺตสฺสิ โน นา นํ เสสุฯ

ตสฺส สขนฺตสฺส อิกาโร โหติ โนนานํสอิจฺเจเตสุฯ

สขิโน, สขินา, สขีนํ, สขิสฺสฯ

เอเตสฺวีติ กิมตฺถํ? สขาเรหิฯ

[195, 134. อาโร หิมฺหิ วาฯ

ตสฺส สขนฺตสฺส อาโร โหติ วา หิมฺหิ วิภตฺติมฺหิฯ สขาเรหิ, สเขหิฯ

[196, 133. สุนมํสุ วาฯ

ตสฺส สขนฺตสฺส อาโร โหติ วา สุนํ อํอิจฺเจเตสุฯ

สขาเรสุ, สเขสุ, สขารานํ, สขีนํ, สขารํ, สขํฯ

[197, 125. พฺรหฺมโต ตุ สฺมิํ นิฯ

ตสฺมา พฺรหฺมโต สฺมิํวจนสฺส นิอาเทโส โหติฯ พฺรหฺมนิฯ

ตุคฺคหเณน อพฺรหฺมโตปิ สฺมิํ วจนสฺส นิ โหติฯ กมฺมนิ, จมฺมนิ, มุทฺธนิฯ

[198, 123. อุตฺตํ สนาสุฯ

ตสฺส พฺรหฺมสทฺทสฺส อนฺโต อุตฺตมาปชฺชเต สนาอิจฺเจเตสุฯ

พฺรหฺมุโน, พฺรหฺมุนาฯ

สนาสูติ กิมตฺถํ? พฺรหฺมาฯ

[199, 158. สตฺถุปิตาทีนมา สิสฺมิํสิโลโปจฯ

สตฺถุปิตุอาทีนมนฺโต อตฺตมาปชฺชเต สิสฺมิํ, สิโลโป จ โหติฯ

สตฺถา, ปิตา, มาตา, ภาตา, กตฺตาฯ

สิสฺมินฺติ กิมตฺถํ? สตฺถุสฺส, ปิตุสฺส, มาตุสฺส, ภาตุสฺส, กตฺตุสฺสฯ

[200, 159. อญฺเญสฺวารตฺตํฯ

สตฺถุปิตุอาทีนมนฺโต อญฺเญสุ วจเนสุ อารตฺตมาปชฺชเตฯ

สตฺถารํ, ปิตรํ, มาตรํ, ภาตรํ, กตฺตารํ, สตฺถาเรหิ, ปิตเรหิ, มาตเรหิ, ภาตเรหิ, กตฺตาเรหิฯ

อญฺเญสฺวีติ กิมตฺถํ? สตฺถา, ปิตา, มาตา, ภาตา, กตฺตาฯ

[201, 163. วา นํมฺหิฯ

สตฺถุปิตุอาทีนมนฺโต อารตฺตมาปชฺชเต วา นํมฺหิ วิภตฺติมฺหิฯ

สตฺถารานํ, ปิตรานํ, มาตรานํ, ภาตรานํฯ

วาติ กิมตฺถํ? สตฺถานํ, ปิตูนํ, มาตูนํ, ภาตูนํฯ

[202, 164. สตฺถุนตฺตญฺจฯ

ตสฺส สตฺถุสทฺทสฺส อนฺโต อตฺตมาปชฺชเต วา นํมฺหิ วิภตฺติมฺหิฯ

สตฺถานํ, ปิตานํ, มาตานํ, ภาตานํ, กตฺตานํฯ

วาติ กิมตฺถํ? สตฺถารานํ, ปิตรานํ, มาตรานํ, ภาตรานํ, ธีตรานํฯ

จคฺคหณํ อญฺเญสมฺปิ สงฺคหณตฺถํฯ

[203, 162. อุสสฺมิํ สโลโป จฯ

สตฺถุปิตุอิจฺเจวมาทีนมนฺตสฺส อุตฺตํ โหติ วา สสฺมิํ, สโลโป จฯ

สตฺถุ , สตฺถุสฺส, สตฺถุโน ทียเต, ปริคฺคโห วาฯ ปิตุ, ปิตุสฺส, ปิตุโน ทียเต, ปริคฺคโห วาฯ ภาตุ, ภาตุสฺส, ภาตุโน ทียเต, ปริคฺคโห วาฯ

จคฺคหณํ ทุติยสมฺปิณฺฑนตฺถํฯ

[204, 167. สกฺกมนฺธาตาทีนญฺจฯ

สกฺกมนฺธาตุอิจฺเจวมาทีนมนฺโต อุตฺตมาปชฺชเต สสฺมิํ, สโลโป จ โหติฯ

สกฺกมนฺธาตุ อิว อสฺส ราชิโน วิภโวฯ เอวํ กตฺตุ, คนฺตุ, ทาตุ อิจฺเจวมาทีฯ

ปุนารมฺภคฺคหณํ กิมตฺถํ? นิจฺจทีปนตฺถํฯ สกฺกมนฺธาตุฯ

จคฺคหณํ ทุติยสมฺปิณฺฑนตฺถํฯ

[205, 160. ตโต โยนโม ตุฯ

ตโต อาราเทสโต สพฺเพสํ โย นํ โอการาเทโส โหติฯ

สตฺถาโร, ปิตโร, มาตโร, ภาตโร, กตฺตาโร, วตฺตาโรฯ

ตุคฺคหเณน อญฺญสฺมาปิ โยนํ โอกาโร โหติฯ จตุโร ชนา, คาโว, อุโภ ปุริสาฯ

[206, 165. ตโต สฺมิมิฯ

ตโต อาราเทสโต สฺมิํวจนสฺส อิการาเทโส โหติฯ

สตฺถริ, ปิตริ, มาตริ, ธีตริ, ภาตริ, กตฺตริ, วตฺตริฯ

ปุน ตโตคหเณน อญฺญสฺมาปิ สฺมิํวจนสฺส อิกาโร โหติฯ ภุวิฯ

[207, 161. นา อาฯ

ตโต อาราเทสโต นาวจนสฺส อาอาเทโส โหติฯ

สตฺถารา, ปิตรา, มาตรา, ภาตรา, ธีตรา, กตฺตารา, วตฺตาราฯ

[208, 166. อาโร รสฺสมิกาเรฯ

อาราเทโส รสฺสมาปชฺชเต อิกาเร ปเรฯ

สตฺถริ, ปิตริ, มาตริ, ธีตริ, กตฺตริ, วตฺตริฯ

[209, 168. ปิตาทีนมสิมฺหิฯ

ปิตาทีน มาราเทโส รสฺสมาปชฺชเต อสิมฺหิ วิภตฺติมฺหิฯ

ปิตรา, มาตรา, ภาตรา, มีตรา ปิตโร, มาตโร, ภาตโร, ธีตโรฯ

อสิมฺหิคฺคหณํ โตมฺหิ ปเร อิการาเทสญาปนตฺถํฯ มาติโต, ปิติโต, ภาติโต, ทุหิติโตฯ

[210, 239. ตยาตยีนํ ตกาโร ตฺวตฺตํ วาฯ

ตยาตยิ อิจฺเจเตสํ ตกาโร ตฺวตฺตมาปชฺชเต วาฯ

ตฺวยา, ตยา, ตฺวยิ, ตยิฯ

เอเตสมิติ กิมตฺถํ? ตุวํ, ตวํฯ

อิติ นาธกปฺเป ตติโย กณฺโฑฯ

จตุตฺถกณฺฑ

[211, 126. อตฺตนฺโต หิสฺมิ’มนตฺตํฯ

ตสฺส อตฺตโน อนฺโต อนตฺตมาปชฺชเต หิมฺหิ วิภตฺติมฺหิฯ

อตฺตเนหิ, อตฺตเนภิฯ

อตฺตนฺโตติ กิมตฺถํ? ราเชหิ, ราเชภิฯ

หิสฺมินฺติ กิมตฺถํ? อตฺตโนฯ

อนตฺตมิติภาวนิทฺเทเสน อตฺตสทฺทสฺส สกาเทโส โหติ สพฺพาสุ วิภตฺตีสุฯ สโก, สกา, สกํ, สเกฯ