จตุตฺถกณฺฑ

[30, 58. อํ พฺยญฺชเน นิคฺคหิตํฯ

นิคฺคหิตํ โข พฺยญฺชเน ปเร อํ อิติ โหติฯ

เอวํ วุตฺเต, ตํ สาธูติ ปฏิสฺสุณิตฺวาฯ

[31, 49. วคฺคนฺตํ วา วคฺเคฯ

วคฺคภูเต พฺยญฺชเน ปเร นิคฺคหิตํ โข วคฺคนฺตํ วา ปปฺโปติฯ

ตนฺนิจฺจุตํ, ธมฺมญฺจเร สุจริตํ, จิรปฺปวาสิํ ปุริสํฯ สนฺตนฺตสฺส มนํ โหติ, ตงฺการุณิกํ, เอวงฺโข ภิกฺขเว สิกฺขิตพฺพํฯ

วาคฺคหเณนนิคฺคหิตํ โข ลการาเทโส โหติฯ ปุคฺคลํฯ

วาติ กสฺมา? น ตํ กมฺมํ กตํ สาธุฯ

[32, 50. เอเห อุํฯ

เอการหกาเร ปเร นิคฺคหิตํ โข ญการํ ปปฺโปติ วาฯ

ปจฺจตฺตญฺเญว ปรินิพฺพายิสฺสามิ, ตญฺเญเวตฺถ ปฏิปุจฺฉิสฺสามิ, เอวญฺหิ โว ภิกฺขเว สิกฺขิตพฺพํฯ ตญฺหิ ตสฺส มุสา โหติฯ

วาติ กสฺมา? เอวเมตํ อภิญฺญาย, เอวํ โหติ สุภาสิตํฯ

[33, 50. สเย จฯ

นิคฺคหิตํ โข ยกาเร ปเร สห ยกาเรน ญการํ ปปฺโปติ วาฯ

สญฺโญโค, สญฺญุตฺตํฯ

วาติ กสฺมา? สํโยโค, สํยุตฺตํฯ

[34, 52. มทา สเรฯ

นิคฺคหิตสฺส โข สเร ปเร มการทการาเทสา โหนฺติ วาฯ

ตมหํ พฺรูมิ พฺราหฺมณํ, เอตทโวจ สตฺถาฯ

วาติ กสฺมา? อกฺโกจฺฉิ มํ อวธิ มํ, อชินิ มํ อหาสิ เมฯ

[35, 34. ย ว ม ท น ต ร ลา จาคมาฯ

สเร ปเร ยกาโร วกาโร มกาโร ทกาโร นกาโร ตกาโร รกาโร ลกาโร อิเม อาคมา โหนฺติ วาฯ

นยิมสฺส วิชฺชา, ยถยิทํ จิตฺตํฯ มิคี ภนฺตา วุทิกฺขติ, สิตฺตา เต ลหุ เมสฺสติ, อสิตฺตา เต ครุ เมสฺสติฯ อสฺโส ภทฺโร กสามิว, สมฺมทญฺญา วิมุตฺตานํฯ มนสาทญฺญา วิมุตฺตานํ, อตฺตทตฺถมภิญฺญายฯ จิรํนายติ, อิโต นายติฯ ยสฺมาติห ภิกฺขเว, ตสฺมาติห ภิกฺขเว, อชฺชตคฺเค ปาณุเปตํฯ สพฺภิเรว สมาเสถ, อารคฺเคริว สาสโป, สาสโปริว อารคฺคาฯ ฉฬภิญฺญา, สฬายตนํฯ

วาติ กสฺมา? เอวํ มหิทฺธิยา เอสา, อกฺโกจฺฉิ มํ อวธิ มํ, อชินิ มํ อหาสิ เม, อเชยฺโย อนุคามิโกฯ

จคฺคหเณน อิเธว มการสฺส ปกาโร โหติฯ จิรปฺปวาสิํ ปุริสํฯ

กการสฺส จ ทกาโร โหติฯ สทตฺถปสุโต สิยาฯ

ทการสฺส จ ตกาโร โหติ, สุคโตฯ

[36, 47. กฺวจิ โอ พฺยญฺชเนฯ

พฺยญฺชเน ปเร กฺวจิ โอการาคโม โหติฯ

อติปฺปโค โข ตาว สาวตฺถิยํ ปิณฺฑาย จริตุํฯ ปโรสหสฺสํฯ

กฺวจีกิ กสฺมา? เอถ ปสฺสถิมํ โลกํ, อนฺธีภูโต อยํ โลโกฯ

[37, 57. นิคฺคหิตญฺจฯ

นิคฺคหิตญฺจาคโม โหติ สเร วา พฺยญฺชเน วา ปเร กฺวจิฯ

จกฺขุํอุทปาทิ, อวํสิโร, ยาวญฺจิธ ภิกฺขเว ปุริมํ ชาติํ สรามิ, อณุํถูลานิ สพฺพโส, มโนปุพฺพงฺคมา ธมฺมาฯ

กฺวจีติ กสฺมา? อิเธว นํ ปสํสนฺติ, เปจฺจ สคฺเค ปโมทติ, น หิ เอเตหิ ยาเนหิ, คจฺเฉยฺย อคตํ ทิสํฯ

จคฺคหเณน วิสทฺทสฺส จ ปกาโร โหติฯ ปเจสฺสติ, วิเจสฺสติ วาฯ

[38, 53. กฺวจิ โลปํฯ

นิคฺคหิตํ โข สเร ปเร กฺวจิ โลปํ ปปฺโปติฯ

ตาสาหํ สนฺติเก, วิทูนคฺคมิติฯ

กฺวจีติ กสฺมา? อหเมว นูน พาโล เอตมตฺถํ วิทิตฺวานฯ

[39, 54. พฺยญฺชเน จฯ

นิคฺคหิตํ โข พฺยญฺชเน ปเร กฺวจิ โลปํ ปปฺโปติฯ

อริยสจฺจานทสฺสนํ, เอตํ พุทฺธานสาสนํฯ

กฺวจีติ กสฺมา? เอตํ มงฺคลมุตฺตมํ, ตํ โว วทามิ ภทฺทนฺเตฯ

[40, 55. ปโร วาสโรฯ

นิคฺคหิตมฺหา ปโร สโร โลปํ ปปฺโปติ วาฯ

ภาสิตํ อภินนฺทุนฺติ, อุตฺตตฺตํว, ยถาพีชํว, ยถาธญฺญํวฯ

วาติ กสฺมา? อหเมว นูน พาโล, เอตทโหสิฯ

[41, 56. พฺยญฺชโน จ วิสญฺโญโคฯ

นิคฺคหิตมฺหา ปรสฺมิํ สเร ลุตฺเต ยทิ พฺยญฺชโน สสญฺโญโค วิสญฺโญโค โหติฯ

เอวํส เต อาสโว, ปุปฺผํสา อุปฺปชฺชิฯ

ลุตฺเตติ กสฺมา? เอวมสฺส วิทูนคฺคมิติฯ

จคฺคหเณน ติณฺณํ พฺยญฺชนานมนฺตเร เย สรูปา, เตสมฺปิ โลโป โหติฯ อคฺยาคารํ, ปฏิสนฺถารวุตฺยสฺสฯ

อิติ สนฺธิกปฺเป จตุตฺโถ กณฺโฑฯ

ปญฺจมกณฺฑ

[42, 32. โคสเร ปุถสฺสาคโม กฺวจิฯ

ปุถอิจฺเจตสฺส อนฺเต สเร ปเร กฺวจิ คการาคโม โหติฯ

ปุถเค วฯ

[43, 33. ปาสฺส จนฺโต รสฺโสฯ

ปาอิจฺเจตสฺส อนฺเต สเร ปเร กฺวจิ คการาคโม โหติ, อนฺโต จ สโร รสฺโส โหติฯ

ปเคว วุตฺยสฺสฯ

กฺวจีติ กสฺมา? ปา เอว วุตฺยสฺสฯ

[44, 24. อพฺโภ อภิฯ

อภิอิจฺเจตสฺส สเร ปเร อพฺภาเทโส โหติฯ อพฺภุทีริตํ, อพฺภุคฺคจฺฉติฯ