ติติกฺขติ , ชิคุจฺฉติ, วีมํสติ, สมุทฺทายติ, ปุตฺตียติ, กาเรติ, ปาเจติฯ

[456, 430. กตฺตริ ปรสฺสปทํฯ

กตฺตริ ปรสฺสปทํ โหติฯ

กโรติ, ปจติ, ปฐติ, คจฺฉติฯ

[457, 424. ภูวาทโย ธาตโวฯ

ภูอิจฺเจวมาทโย เย สทฺทคณา, เต ธาตุสญฺญา โหนฺติฯ

ภวติ, ภวนฺติ, จรติ, จรนฺติ, ปจติ, ปจนฺติ, จินฺตยติ, จินฺตยนฺติ, โหติ, โหนฺติ, คจฺฉติ, คจฺฉนฺติฯ

อิติ อาขฺยาตกปฺเป ทุติโย กณฺโฑฯ

ตติยกณฺฑ

[458, 461. กฺวจาทิวณฺณานเมกสฺสรานํ ทฺเวภาโวฯ

อาทิภูตานํ วณฺณานํ เอกสฺสรานํ กฺวจิ ทฺเวภาโว โหติฯ

ติติกฺขติ , ชิคุจฺฉติ, ติกิจฺฉติ, วีมํสติ, พุภุกฺขติ, ปิวาสติ, ททฺทลฺลติ, ททาติ, ชหาติ, จงฺกมติฯ

กฺวจีติ กิมตฺถํ? กมฺปติ, จลติฯ

[459, 462. ปุพฺโพ’พฺภาโสฯ

ทฺเวภูตสฺส ธาตุสฺส โย ปุพฺโพ, โส อพฺภาสสญฺโญ โหติฯ

ทธาติ, ททาติ, พภูวฯ

[460, 506. รสฺโสฯ

อพฺภาเส วตฺตมานสฺส สรสฺส รสฺโส โหติฯ ทธาติ, ชหาติฯ

[461, 464. ทุติยจตุตฺถานํ ปฐมตติยาฯ

อพฺภาสคตานํ ทุติยจตุตฺถานํ ปฐมตติยา โหนฺติฯ

จิจฺเฉท, พุภุกฺขติ, พภูว, ทธาติฯ

[462, 476. กวคฺคสฺส จวคฺโคฯ

อพฺภาเส วตฺตมานสฺส กวคฺคสฺส จ วคฺโค โหติฯ

จิกิจฺฉติ , ชิคุจฺฉติ, ชิฆจฺฉติ, ชิคีสติ, ชงฺคมติ, จงฺกมติฯ

[463, 532. มานกิตานํ วตตฺตํ วาฯ

มานกิตอิจฺเจเตสํ ธาตูนํ อพฺภาสคตานํ วการ ตการตฺตํ โหติ วา ยถาสงฺขฺยํฯ

วีมํสติ, ติกิจฺฉติฯ

วาติ กิมตฺถํ? จิกิจฺฉติฯ

[464, 504. หสฺส โชฯ

อพฺภาเส วตฺตมานสฺส หการสฺส โช โหติฯ

ชหาติ, ชุหฺวติ, ชุโหติ, ชหารฯ

[465, 463. อนฺตสฺสิวณฺณากาโร วาฯ

อพฺภาสสฺส อนฺตสฺส อิวณฺโณ โหติ, อกาโร วาฯ

ชิคุจฺฉติ, ปิวาสติ, วีมํสติ, ชิฆจฺฉติ, พภูว, ทธาติฯ

วาติ กิมตฺถํ? พุภุกฺขติฯ

[466, 489. นิคฺคหิตญฺจ ฯ

อพฺภาสสฺส อนฺเต นิคฺคหิตาคโม โหติ วาฯ

จงฺกมติ, จญฺจลติ, ชงฺคมติฯ

วาติ กิมตฺถํ? ปิวาสติ, ททฺทลฺลติฯ

[467, 533. ตโต ปามานานํ วา มํ เสสุฯ

ตโต อพฺภาสโต ปามานอิจฺเจเตสํ ธาตูนํ วามํอิจฺเจเต อาเทสา โหนฺติ ยถาสงฺขฺยํ สปจฺจเย ปเรฯ

ปิวาสติ, วีมํสติฯ

[468, 462. ฐา ติฏฺโฐฯ

ฐาอิจฺเจตสฺส ธาตุสฺส ติฏฺฐาเทโส โหติ วาฯ

ติฏฺฐติ, ติฏฺฐตุ, ติฏฺเฐยฺย, ติฏฺเฐยฺยุํฯ

วาติ กิมตฺถํ? ฐาติฯ

[469, 494. ปา ปิโวฯ

ปาอิจฺเจตสฺส ธาตุสฺส ปิวาเทโส โหติ วาฯ

ปิวติ, ปิวตุ, ปิเวยฺย, ปิเวยฺยุํฯ

วาติ กิมตฺถํ? ปาติฯ

[470, 514. ญาสฺส ชา ชํ นาฯ

ญาอิจฺเจตสฺส ธาตุสฺส ชา ชํ นาอาเทสา โหนฺติ วาฯ

ชานาติ, ชาเนยฺย, ชานิยา, ชญฺญา, นายติฯ

[471, 483. ทิสสฺส ปสฺส ทิสฺส ทกฺขา วาฯ

ทิสอิจฺเจตสฺส ธาตุสฺส ปสฺส ทิสฺส ทกฺขอิจฺเจเต อาเทสา โหนฺติ วาฯ

ปสฺสติ, ทิสฺสติ, ทกฺขติ, อทกฺขฯ

วาติ กิมตฺถํ? อทฺทสฯ

[472, 531. พฺยญฺชนนฺตสฺส โจ ฉปจฺจเยสุ จฯ

พฺยญฺชนนฺตสฺส ธาตุสฺส โจ โหติ ฉปจฺจเยสุ ปเรสุฯ

ชิคุจฺฉติ, ติกิจฺฉติ, ชิฆจฺฉติฯ

[473, 529. โก เข จฯ

พฺยญฺชนนฺตสฺส ธาตุสฺส โก โหติ ขปจฺจเย ปเรฯ

ติติกฺขติ , พุภุกฺขติฯ

[474, 535. หรสฺส คีเสฯ

หรอิจฺเจตสฺส ธาตุสฺส สพฺพสฺเสว คีอาเทโส โหติ สปจฺจเย ปเรฯ

ชิคีสติฯ

[475, 565. พฺรูภูนมาหภูวา ปโรกฺขายํฯ

พฺรูภูอิจฺเจเตสํ ธาตูนํ อาหภูวอิจฺเจเต อาเทสา โหนฺติ ยถาสงฺขฺยํ ปโรกฺขายํ วิภตฺติยํฯ

อาห, อาหุ, พภูว, พภูวุฯ

ปโรกฺขายมิติ กิมตฺถํ? อพฺรจุํฯ

[476, 442. คมิสฺสนฺโต จฺโฉ วา สพฺพาสุฯ

คมุอิจฺเจตสฺส ธาตุสฺส อนฺโต มกาโร จฺโฉ โหติ วา สพฺพาสุ ปจฺจยวิภตฺตีสุฯ

คจฺฉมาโน, คจฺฉนฺโตฯ คจฺฉติ, คเมติฯ คจฺฉตุ, คเมตุฯ คจฺเฉยฺยฯ คเมยฺยฯ อคจฺฉา, อคมาฯ อคจฺฉี, อคมีฯ คจฺฉิสฺสติ, คมิสฺสติฯ อคจฺฉิสฺสา, อคมิสฺสาฯ

คมิสฺเสติ กิมตฺถํ? อิจฺฉติฯ

[477, 479. วจสฺสชฺชตนิมฺหิ มกาโร โอฯ

วจอิจฺเจตสฺส ธาตุสฺส อกาโร โอตฺตมาปชฺชเต อชฺชตนิมฺหิ วิภตฺติมฺหิฯ

อโวจฯ อโวจุํฯ

อชฺชตนิมฺหีติ กิมตฺถํ? อวจ, อวจูฯ

[478, 438. อกาโร ทีฆํ หิ มิ เมสุฯ

อกาโร ทีฆมาปชฺชเต หิมิมอิจฺเจเตสุ วิภตฺตีสุฯ

คจฺฉาหิ, คจฺฉามิ, คจฺฉาม, คจฺฉามฺเหฯ

มิการคฺคหเณน หิวิภตฺติมฺหิ อกาโร กฺวจิ น ทีฆมาปชฺชเตฯ คจฺฉหิฯ

[479, 452. ห โลปํ วาฯ

หิวิภตฺติ โลปมาปชฺชเต วาฯ

คจฺฉ, คจฺฉาหิ, คม, คมาหิ, คมย, คมยาหิฯ

หีติ กิมตฺถํ? คจฺฉติ, คมยติฯ

[480, 490. โหติสฺสเรโหเห ภวิสฺสนฺติมฺหิสฺสสฺส จฯ

หูอิจฺเจตสฺส ธาตุสฺส สโร เอ ห โอห เอตฺตมาปชฺช เต ภวิสฺสนฺติมฺหิ, สฺสสฺส จ โลโป โหติ วาฯ

เหหิติ, เหหินฺติ, โหหิติ, โหหินฺติ, เหติ, เหนฺติ, เหหิสฺสติ, เหหิสฺสนฺติ, โหหิสฺสติ, โหหิสฺสนฺติ, เหสฺสติ, เหสฺสนฺติฯ

หูติ กิมตฺถํ? ภวิสฺสติ, ภวิสฺสนฺติฯ

ภวิสฺสนฺติมฺหีติ กิมตฺถํ? โหติฯ

[481, 524. กรสฺส สปจฺจยสฺส กาโหฯ

กรอิจฺเจตสฺส ธาตุสฺส สปจฺจยสฺส กาหาเทโส โหติ วา ภวิสฺสนฺติมฺหิ วิภตฺติมฺหิ, สสฺส จ นิจฺจํ โลโป โหติฯ

กาหติ, กาหิติ, กาหสิ, กาหิสิ, กาหามิ, กาหามฯ

วาติ กิมตฺถํ? กริสฺสติ, กริสฺสนฺติฯ

สปจฺจยคฺคหเณน อญฺเญหิปิ ภวิสฺสนฺติยา วิภตฺติยา ขามิ ขาม ฉามิ ฉามอิจฺจาทโย อาเทสา โหนฺติฯ วกฺขามิ, วกฺขาม, วจฺฉามิ, วจฺฉามฯ

อิติ อาขฺยาตกปฺเป ตติโย กณฺโฑฯ

จตุตฺถกณฺฑ

[482, 508. ทาทนฺตสฺสํ มิ เมสุฯ

ทาอิจฺเจตสฺส ธาตุสฺส อนฺตสฺส อํ โหติ มิมอิจฺเจเตสุฯ

ทมฺมิ, ทมฺมฯ

[483, 527. อสํโยคนฺตสฺส วุทฺธิ การิเตฯ

อสํโยคนฺตสฺส ธาตุสฺส การิเต วุทฺธิ โหติฯ

กาเรติ, กาเรนฺติ, การยติ, การยนฺติ, การาเปติ, การาเปนฺติ, การาปยติ, การาปยนฺติฯ

อสํโยคนฺตสฺเสติ กิมตฺถํ? จินฺตยติ, มนฺตยติฯ

[484, 542. ฆฏาทีนํ วาฯ

ฆฏาทีนํ ธาตูนํ อสํโยคนฺตานํ วุทฺธิ โหติ วา การิเตฯ

ฆาเฏติ, ฆเฏติ, ฆาฏยติ, ฆฏยติ, ฆาฏาเปติ, ฆฏาเปติ, ฆาฏาปยติ, ฆฏาปยติ, คาเมติ, คเมติ, คามยติ, คมยติ, คามาเปติ, คมาเปติฯ คามาปยติ, คมาปยติฯ

ฆฏาทีนมิติ กิมตฺถํ? กาเรติฯ