5. ตทฺธิตกปฺป

อฏฺฐมกณฺฑ

[344, 361. วาณ’ปจฺเจ ฯ

ณปจฺจโย โหติ วา ‘‘ตสฺสาปจฺจ’’ มิจฺเจตสฺมิํ อตฺเถฯ

วสิฏฺฐสฺส อปจฺจํ วาสิฏฺโฐ, วสิฏฺฐสฺส อปจฺจํ วา, วสิฏฺฐสฺส อปจฺจํ วาสิฏฺฐี, วสิฏฺฐสฺส อปจฺจํ วาสิฏฺฐํฯ เอวํ ภารทฺวาโช, ภารทฺวาชี, ภารทฺวาชํฯ โคตโม, โคตมี, โคตมํฯ วาสุเทโว, วาสุเทวี, วาสุเทวํฯ พาลเทโว, พาลเทวี, พาลเทวํฯ เวสามิตฺโต, เวสามิตฺตี เวสามิตฺตํฯ

[345, 366. ณายน ณาน วจฺฉาทิโตฯ

ตสฺมา วจฺฉาทิโต โคตฺตคณโต ณายนณานปจฺจยา โหนฺติ วา ‘‘ตสฺสาปจฺจ’’มิจฺเจตสฺมิํ อตฺเถฯ

วจฺฉสฺส อปจฺจํวจฺฉายโน, วจฺฉาโน, วจฺฉสฺส อปจฺจํ วา, วจฺฉสฺส อปจฺจํ วจฺฉายนี, วจฺฉานี, วจฺฉสฺส อปจฺจํ วจฺฉายนํ, วจฺฉานํฯ