ตตฺถ มาสํ วสิตฺวาน, เชฏฺฐมาสสฺสุ’ โปสเถ;
เถโร จตูหิ เถเรหิ, สุมเนนา’ถ ภณฺฑุนาฯ
[19]
สทฺธิํ เตน คหฏฺเฐน, น รโต ญาติเหตุนา;
ตสฺมา วิหารา อากาสํ, อุคฺคนฺตฺวา โส มหิทฺธิโกฯ
[20]
ขเณเนว อิธาคมฺม, รมฺเม มิสฺสก ปพฺพเต;
อฏฺฐาสิ วิลุกูฏมฺหิ, รุจิรมฺพตฺถเล วเรฯ
[21]
ลํกาปสาท คุเณน วิยากโต โส;
ลํกาหิตาย มุนินา สยิเตน อนฺเต;
ลํกาย สตฺถุสทิโส หิตเหตุ ตสฺสา;
ลํกามรูหิ มหิโต’ภินิสีทิ ตตฺตาติฯ
สุชนปฺปสาทสํเวคตฺถาย กเต มหาวํเส
มหินฺทาคมโน นาม
เตรสโม ปริจฺเฉโทฯ
จุทฺทสม ปริจฺเฉท
นครปฺปเวสโน
[1]
เทวานํปิยติสฺโส โส, ราชา สลิลกีฬิตํ;
ทตฺวา นครวาสีนํ, มิควํ กีฬิตุํ อคาฯ
[2]
จตฺตาลีสสหสฺเสหิ, นเรหิ ปริวาริโต;
ธาวนฺโต ปทสาเยว, อคมา มิสฺสกํ นคํฯ
[3]
เถเร ทสฺเสตุมิจฺฉนฺโต, เทโว ตสฺมิํ มหีธเร;
คุมฺภํภกฺขยมาโน’ว, อฏฺฐา โคกณฺณรูปวาฯ
[4]
ราชา ทิสฺวา ‘‘ปมตฺตํ ตํ, น ยุตฺตํ วิชฺฌิตุํ’’ อิติ;
ชิยา สทฺทมกาธาปิ, โคกณฺโณ ปพฺพตนฺตรํฯ
[5]
ราชา’นุธาวิ โสธิํ, เถรานํ สนฺติกํ คโต;
เถเร ทิฏฺเฐ นรินฺเทน, สยมนฺตรธายิโสฯ
[6]
เถโร ‘‘พหูสุ ทิฏฺเฐสุ, อติภายิสฺสตี’’ ติโส;
อตฺตานเมว ทสฺเสสิ, ปสฺสิตฺวา ตํ มหีปติํฯ
[7]
ภีโต อฏฺฐาสิ ตํ เถโร, ‘‘เอหิ ติสฺสาติ อพฺรวิ;
ติสฺสา’ติ วจเนเนว, ราชา ยกฺโข’’ติ จินฺตยีฯ
[8]
สมณา มยํ มหาราช, ธมฺมราชสฺส สาวกา;
ตเมว อนุกมฺปาย, ชมฺพุทีปา อิธาคตาฯ
[9]
อิจฺจาห เถโร ตํ สุตฺวา, ราชา วีตภโย อหุ;
สริตฺวา สขีสนฺเทสํ, ‘‘สมาณา’’ อิติ นิจฺฉิโตฯ
[10]
ธนุํ สรญฺจ นิกฺขิปฺป, อุปสงฺกมฺม ตํ อิสิํ;
สมฺโมทมาโน เถเรน, โส นิสีทิ ตทนฺติเกฯ
[11]
ตทา ตสฺส มนุสฺสา เต, อาคมฺม ปริวารยุํ;
ตทา เสเส ฉ ทสฺเสสิ, มหาเถโร สหาคเตฯ
[12]
เต ทิสฺวา อพฺรวี ราชา, ‘‘กทา’’ เม อาคตา อิติ;
‘‘มยา สทฺธิํ’’ติ เถเรน, วุตฺเต ปุจฺฉิ อิทํ ปุนฯ
[13]
‘‘สนฺติ อีทิสกา อญฺเญ, ชมฺพุทีเป ยตี’’ อิติ;
อาห ‘‘กาสาวปชฺโช โต, ชมฺพุทีโป ตหิํ ปนฯ
[14]
เตวิชฺชา อิทฺธิปฺปตฺตา จ, เจโตปริยโกวิทา;
‘‘ทิพฺพโสตา’รหนฺโต จ, พหู พุทฺธสฺส สาวกา’’ฯ
[15]
ปุจฺฉิ ‘‘เกนาคตตฺถา’’ติ, น ถเลน น วารินา;
อาคตมฺหา’’ติ วุตฺเต โส, วิชานิ นภสาคมํฯ
[16]
วีมํสํโส มหาปญฺโญ, กณฺหํ ปญฺหมปุจฺฉิตํ;
ปุฏฺโฐ ปุฏฺโฐ วิยากาสิ, ตํตํ ปญฺหํ มหีปติฯ
[17]
รุกฺโขยํ ราชกินฺนาโม, อญฺโญ นาม อยํ ตรุ;
อิมํ มุญฺจิย อตฺถ’มฺโพ, สนฺติ อมฺพตรู พหุํฯ
[18]
อิมญฺจ อมฺพํ เตจ’มฺเพ, มุญฺจิยตฺถิ มหีรุหา;
สนฺติ ภนฺเต พหุ รุกฺขา, อนมฺพาปน เต ตรุฯ
[19]
อญฺเญ อมฺเพ อนมฺเพ จ, มุญฺจิย’ตฺถิ มหีรุหา;
อยํ ภนฺเต อมฺพรุกฺโข, ปณฺฑิโต’สิ นริสฺสรฯ
[20]
สนฺติ เต ญาตกา ราช, สนฺติ ภนฺเต พหุชฺชนา;
สนฺติ อญฺญาตกา ราช, สนฺติ เต ญาติโต พหูฯ
[21]
ญาตเก เต จ อญฺเญ จ, มุญฺจิย’ญฺโญปิ อตฺถิ นุ;
‘‘ภนฺเต’’ หเมว สาธุ ตฺวํ, ปณฺฑิโต’สิ นริสฺสรฯ
[22]
ปณฺฑิโต’ติ วิทิตฺวาน, จูฬหตฺถิปโทปมํ;
สุตฺตนฺตํ เทสยี เถโร, มหีปสฺส มหามตีฯ
[23]
เทสนาปริโยสาเน, สทฺธิํ เตหิ นเรหิ โส;
จตฺตาลีสสหสฺเสหิ, สรเณสุ ปติฏฺฐหิฯ
[24]
ภตฺตา’ภีหารํ สายนฺเห, รญฺโญ อภิหรุํ ตทา;
‘‘น ภุญฺชิสฺส’’นฺติ ทานิ เม, อิติ ชนมฺมิ ภูปติฯ
[25]
ปุจฺฉิตุํเยว ยุตฺตนฺติ, ภตฺเตนา’ปุจฺฉิเต อิสิ;
น ภุญฺชาม อิทานี’ติ, วุตฺเต กาลญฺจ ปุจฺฉิโสฯ
[26]
กาลํ วุตฺเต’พฺรวิ เอวํ, ‘‘คจฺฉาม นครํ’’อิติ;
ตุวํ คจฺฉ มหาราช, วสิสฺสาม มยํ อิธฯ
[27]
เอวํ สติ กุมาโร’ยํ, อมฺเหหิ สห คจฺฉตุ;
อยญฺหิ อาคตผโล, ราช วิญฺญาตสาสโนฯ
[28]
อเปกฺขมาโน ปพฺพชฺชํ, วสต’มฺหากมนฺติเก;
อิทานิ ปพฺพเชสฺสาม, อิมํ ตฺวํ คจฺฉ ภูมิปฯ
[29]
ปาโต รถํ เปสยิสฺสํ, ตุมฺเห ตตฺถ ฐิตา ปุรํ;
ยาถา’ติ เถเร วนฺทิตฺวา, ภณฺฑุํเนตฺว’ก มนฺตกํฯ
[30]
ปุจฺฉิ เถราธิการํโส, รญฺโญ สพฺพมภาสิ โส;
เถรํ ญตฺวา’ติ ตุฏฺโฐโส, ‘‘ลาภา เม’’อิติ จินฺตยิฯ
[31]
ภณฺฑุสฺส คีหิภาเวน, คตาสงฺโก นริสฺสโร;
อญฺญาสิ นรภาวํ โส, ‘‘ปพฺพาเชม อิมํ’’ อิติฯ
[32]
เถโร ตํ คามสีมายํ, ตสฺมิํเยว ขเณ อกา;
ภณฺฑุกสฺส กุมารสฺส, ปพฺพชฺชมุปสมฺปทํฯ
[33]
ตสฺมิํเยว ขเณ โส จ, อรหตฺตมปาปุณิ;
สุมนํ สามเณรํ ตํ, เถโร อามนฺตยี ตโตฯ
[34]
ธมฺมสวนกาลํ ตฺวํ, โฆเสหี’’ติ อปุจฺฉิโส;
สาเวนฺโต กิตฺตกํ ฐานํ, ภนฺเต โฆเสม’หํ อิติฯ
[35]
‘‘สกลํ ตมฺพปณฺณี’’ติ, วุตฺเต เถเรน อิทฺธิยา;
สาเวนฺโต สกลํ ลํกํ, ธมฺมกาลมโฆสยีฯ
[36]
ราชา นาคจตุตฺเตโส, โสณฺณิปสฺเส นิสีทิย;
ภุญฺชนฺโต ตํ รวํ สุตฺวา, เถรนฺติก มเปสยิฯ
[37]
‘‘อุปทฺทโว นุ อตฺถี’’ติ, อาห นตฺถิ อุทฺทโว;
โสตุํ สมฺพุทฺธวจนํ, กาโล โฆสาปิโต อิติฯ
[38]
สามเณร รวํ สุตฺวา, ภุมฺมาเทวา อโฆสยุํ;
อนุกฺกเมน โส สทฺโท, พฺรหฺมโลกํ สมารุหิฯ
[39]
เตน โฆเสน เทวานํ, สนฺนิปาโต มหา อหุ;
สมจิตฺตสุตฺตํ เทเสสิ, เถโร ตสฺมิํ สมาคเมฯ
[40]
อสํขิยานํ เทวานํ, ธมฺมาภิสมโย อหุ;
พหู นาคา สุปณฺณา จ, สรเณสุ ปติฏฺฐยุํฯ
[41]
ยเถทํ สาริปุตฺตสฺส, สุตฺตํ เถรสฺส ภาสโต;
ตถา มหินฺทตฺเถรสฺส, อหุ เทวสมาคโมฯ
[42]
ราชา ปภา เต ปาเหสิ, รถํ สารถิ โส คโต;
‘‘อาโรหถ รถํ ยาม, นครํ’’ อิติ เต’พฺรวิฯ
[43]
นา’โรหาม รถํ คจฺฉ, คจฺฉาม ตว ปจฺฉโต;
อิติ วตฺวาน เปเสตฺวา, สารถิํ สุมโนรถํฯ
[44]
เวหาสมพฺภุคนฺตฺวา, เต นครสฺส ปุรตฺถโต;
ปฐมตฺถูปฏฺฐานมฺหิ, โอตริํสุ มหิทฺธิกาฯ
[45]
เถเรหิ ปฐโมติณฺณ-ฐานมฺหิ กตเจติยํ;
อชฺชาปิ วุจฺจเต เตน, เอวํ ปฐมเจติยํฯ
[46]
รญฺญา เถรคุณํ สุตฺวา, สพฺพา อนฺเตปุริตฺถิโย;
เถรทสฺสนมิจฺฉิํสุ, ยสฺมา ตสฺมามหีปติฯ
[47]
อนฺโต’ว ราชวตฺถุสฺส, รมฺมํ กาเรสิ มณฺฑปํ;
เสเตหิ วตฺถปุปฺเผหิ, ฉาทิตํ สมลงฺกตํฯ
[48]
อุจฺจเสยฺยาวิรมณํ, สุตตฺตา เถรสนฺติเก;
กงฺขี ‘‘อุจฺจาสเน เถโร, นิสีทิเทยฺยนุโนติ จฯ
[49]
ตทนฺตเร สารถิ โส, เถเร ทิสฺวา ตหิํ ฐิเต;
จีวรํ ปารุปนฺเต เต, อติวิมฺหิต มานโสฯ
[50]
คนฺตฺวา รญฺโญ นิเวเทสิ, สุตฺวา สพฺพํ มหีมติ;
‘‘นิสชฺชํ น กริสฺสนฺติ, ปีฐเกสู’’ติ นิจฺฉิโตฯ
[51]
‘‘สุสาธุ ภุมฺมตฺถรณํ, ปญฺญาเปถา’’ติ ภาสิย;
คนฺตฺวา ปฏิปถํ เถเร, สกฺกจฺจํ อภิวาทิยฯ
[52]
มหามหินฺทตฺเถรสฺส, หตฺถโต ปตฺตมาทิย;
สกฺการปูชาวิธินา, ปุรํ เถรํ ปเวสยิฯ
[53]
ทิสฺวา อาสนปญฺญตฺติํ, เนมิตฺตา พฺยากรุํ อิติ;
‘‘คหิตา ปถวี’เมหิ, ทีเป เหสฺสนฺติ อิสฺสราฯ
[54]
นรินฺโท ปูชยนฺโต เต, เถเร อนฺเตปุรํ นยิ;
ตตฺถ เต ทุสฺสปีเฐสุํ, นิสีทิํสุ ยถารหํฯ
[55]
เต ยาคุขชฺชโภชฺเชหิ, สยํ ราชา อตปฺปยิ;
นิฏฺฐิเต ภตฺตกิจฺจมฺหิ, สยํ อุปนิสีทิยฯ
[56]
กนิฏฺฐสฺโสปราชสฺส, มหานาคสฺส ชายิกํ;
วสนฺติํ ราชเคเห’ว, ปกฺโกสา เปสิจา’นุลํฯ
[57]
อาคมฺม อนุลาเทวี, ปญฺจ อิตฺถิสเตหิ สา;
เถเรวนฺทิย ปูเชตฺวา, เอกมนฺตมุปาวิสิฯ
[58]
เปตวตฺถุํ วิมานญฺจ, สจฺจสํยุตฺตเมว จ;
เทเสสิ เถโร ตา อิตฺถี, ปฐมํ ผลมชฺฌคุํฯ
[59]
หิยฺโย ทิฏฺฐมนุสฺเสหิ, สุตฺวา เถรคุเณ พหู;
เถรทสฺสนมิจฺฉนฺตา, สมาคนฺตฺวาน นาคราฯ
[60]
ราชทฺวาเร มหาสทฺทํ, อกรุํ ตํ มหีปติ;
สุตฺวา ปุจฺฉิย ชานิตฺวา, อาห เตสํ หิตตฺถิโกฯ
[61]
สพฺเพสํ อิธ สมฺพาโธ, สาลามงฺคลหตฺถิโน;
โสเธถ ตตฺถ ทกฺขนฺติ, เถเร’เม นาครา’อิติฯ
[62]
โสเธตฺวา หตฺถิสาลํ ตํ, วิตานาทีหิ สชฺชุกํ;
อลงฺกริตฺวา สยเน, ปญฺญเปสุํ ยถารหํฯ
[63]
สเถโร ตตฺถ คนฺตฺวาน, มหาเถโร นิสีทิย;
โส เทวทูตสุตฺตนฺตํ, กเถสี กถิโก มหาฯ
[64]
ตํ สุตฺวาน ปสีทิํสุ, นครา เต สมาคตา;
เตสุ ปาณสหสฺสํตุ, ปฐมํ ผลมชฺฌคาฯ
[65]
ลํกาทีเป โส สตฺถุกปฺโป อกปฺโป;
ลํกาธิฏฺฐาเน ทฺวีสุ ฐาเนสุ เถโร;
ธมฺมํ ภาสิตฺวา ทีปภาสาย เอวํ;
สทฺธมฺโม ตารํ การยี ทีปทีโปติฯ
สุชนปฺปสาทสํเวคตฺถาย กเต มหาวํเส
นครปฺปเวสโน นาม
จุทฺทสโม ปริจฺเฉโทฯ
ปญฺจทสม ปริจฺเฉท
มหาวิหาร ปฏิคฺคหโก
[1]
หตฺถิสาลาปิ สมฺพาธา, อิติ ตตฺถ สมาคตา;
เต นนฺทนวเน รมฺเม, ทกฺขิณทฺวารโต พหิฯ
[2]
ราชุยฺยาเน ฆนจฺฉาเย, สีตเล นีลสทฺทเล;
ปญฺญาเปสุํ อาสนานิ, เถรานํ สาทรา นราฯ
[3]
นิกฺขมฺม ทกฺขิณทฺวารา, เถโร ตตฺถ นิสีทิ จ;
มหากุลีนา จา’คมฺม, อิตฺถิโย พหุกา ตหิํฯ
[4]