ตตฺถ เจติยฐานมฺหิ, สสงฺโฆว นิสีทิย;

สมาธิํ อปฺปยี นาโถ, ฐานาคารวปตฺติยาฯ

[80]

ตโต วุฏฺฐาย ฐานมฺหา, ฐานาฐาเนสุ โกวิโท;

มหาเมฆวนาราม-ฐานมาค มหามุนิฯ

[81]

มหาโพธิฐิตฐาเน, นิสีทิตฺวา สสาวโก;

สมาธิํ อปฺปยี นาโถ, มหาถูปฐิเต ตถาฯ

[82]

ถูปารามมฺหิ ถูปสฺส, ฐิตฐาเน ตเถว จ;

สมาธิโต’ถ วุฏฺฐาย, สิลาเจติยฐานโคฯ

[83]

สหาคเต เทวคโณ, คณี สมนุสาสิย;

ตโต เชตวนํ พุทฺโธ, พุทฺธสพฺพตฺถโก อคาฯ

[84]

เอวํ ลงฺกาย นาโถ, หิตมมิตมตี อายติํ เปกฺขมาโน;

ตสฺมิํ กาลมฺหิ ลํกาสุรภุชคคณาทีนมตฺถญฺจ ปสฺสํ;

อาคา ติกฺขตฺตุเมตํ อติวิปุลทโย โลกทีโป สุทีปํ;

ทีโป เตนายมาสิ สุชนพหุมโน ธมฺมทีปาว ภาสีติฯ

กลฺยาณาคมนํ

สุชนปฺปสาทสํเวคตฺถาย กเต มหาวํเส

ตถาคตาภิคมนํ นาม

ปฐโม ปริจฺเฉโทฯ

ทุติยปริจฺเฉท

มหาสมฺมตวํส

[1]

มหาสมฺมต ราชสฺส, วํสโช หิ มหามุนิ;

กปฺปสฺสาทิมฺหิ ราชา’สิ, มหาสมฺมตนามโกฯ

[2]

โรโช จ วรโรโช จ, ตถา กลฺยาณกา ทุเว;

อุโปสโถ จ มนฺธาตา, จรโก’ปจรา ทุเวฯ

[3]

เจตีโย มุจโล เจว, มหามูจลนามโก;

มุจลินฺโท สาคโร เจว, สาคโร เทว วนามโกฯ

[4]

ภรโต ภคีรโถ เจว, รุจิ จ สุรุจิ ปิจ;

ปตาโป มหาปตาโป, ปนาทา จ ตถา ทุเวฯ

[5]

สุทสฺสโน จ เนรุ จ, ตถา เอว ทุเว ทุเว;

ปจฺฉิมา จา’ติ ราชาโน, ตสฺส ปุตฺตปปุตฺตกาฯ

[6]

อสํขิยายุกา เอเต, อฏฺฐวีสติ ภูมิปา;

กุสาวติํ ราชคหํ, มิถิลญฺจาปิ อาวสุํฯ

[7]

ตโต สตญฺจ ราชโน, ฉปฺปญฺญาส จ สฏฺฐิ จ;

จตุราสีติ สหสฺสานิ, ฉตฺติํสา จ ตโต ปเรฯ

[8]

ทฺวตฺติํส อฏฺฐวีสา จ, ทฺวาวีสติ ตโต ปเร;

อฏฺฐารส สตฺตรส, ปญฺจทส จตุทฺทสฯ

[9]

นว สตฺต ทฺวาทส จ, ปญฺจวีส ตโตปเร;

ปญฺจวีสํ ทฺวาทส จ, ทฺวาทสญฺจ นวา ปิจฯ

[10]

จตุราสีติสหสฺสานิ, มขาเทวาทิกาปิ จ;

จตุราสีติสหสฺสานิ, กฬาราชนกาทโยฯ

[11]

โสฬส ยาว โอกฺกาตํ, ปปุตฺตา ราสิโต อิเม;

วิสุํ วิสุํ ปุเร รชฺชํ, กมโต อนุสาสิสุํฯ

[12]

โอกฺกามุโข เชฏฺฐปุตฺโต, โอกฺกากสา’สิ ภูปติ;

นิปุโร จนฺทีมา จนฺทํ-มุโข จ สิวิ สญฺชโยฯ

[13]