สุภทฺทกจฺจาน มโนมรูปินิํ;
มเหสีภาเว อภิสิญฺจิย’ตฺตโน;
สหคตา ตาย ปทาสิ อตฺตนา;
สหาคตานํ วสิ ภูมิโป สุขนฺตีฯ
สุชนปฺปสาท สํเวคตฺถาย กเต มหาวํเส
ปณฺฑุวาสุเทวาภิเสโก นาม
อฏฺฐโม ปริจฺเฉโทฯ
นวม ปริจฺเฉท
อภยาภิเสโก
[1]
มเหสี ชนยี ปุตฺเต, ทส เอกญฺจ ธีตรํ;
สพฺพเชฏฺโฐ’ภโย นาม, จิตฺตานาม กนิฏฺฐิกาฯ
[2]
ปสฺสิตฺวา ตํ วิยากํสุ, พฺราหฺมณา มนฺตปารคา;
‘‘รชฺชเหตุ สุโต อสฺสา, ฆาตยิสฺสติ มาตุเล’’ฯ
[3]
ฆาเตสฺสามิ กนิฏฺฐินฺติ, นิจฺฉิเต ภาตรา’ภโย;
วาเรสิ กาเล วาเสสุํ, เคหํ ตํ เอกถุณิเกฯ
[4]
รญฺโญ จ สิริคพฺเภน, ตสฺส ทฺวารมการยุํ;
อนฺโต ฐเปสุํ เอกญฺจ, ทาสิํ นรสตํ พหิฯ
[5]
รูเปนุ’มฺมาทยี นเร, ทิฏฺฐมตฺตาว สายโต;
ตโต อุมฺมาทจิตฺตา’ติ, นามํ โสปปทํ ลภิฯ
[6]
สุตฺวาน ลํกาคมนํ, ภทฺทกจฺจานเทวิยา;
มาตรา โจทิตา ปุตฺตา, ฐเปตฺเว’กญฺจ อาคมุํฯ
[7]
ทิสฺวาน เต ปณฺฑุวาสุ-เทวํ ลงฺกินฺทมาคตา;
ทิสฺวาน ตํ กนิฏฺฐิญฺจ, โรทิตฺวา สห ตาย จฯ
[8]
รญฺญา สุกตสกฺการา, รญฺโญ’นุญฺญาย จาริกํ;
จริํสุ ลํกาทีปมฺหิ, นิวสุญฺจ ยถารุจิํฯ
[9]
ราเมน วุสิตฐานํ, รามโคณนฺติ วุจฺจติ;
อุรุเวลา’นุราธานํ, นิวาสา จ ตถา ตถาฯ
[10]
ตถา วิชิตทีฆายุ-โรหณานํ นิวาสกา;
วิชิตคาโม ทีฆายุ-โรหณนฺติ จ วุจฺจติฯ
[11]
กาเรสิ อนุราโธ โส, วาปิํ ทกฺขิณโต ตโต;
การาเปตฺวา ราชเคหํ, ตตฺถ วาสมกปฺปยีฯ
[12]
มหาราชา ปณฺฑุวาสุ-เทโว ชฏฺฐสุตํ สกํ;
อภยํ อุปรชฺชมฺหิ, กาเล สมภิเสจยิฯ
[13]
ทีฆายุสฺส กุมารสฺส, ตนโย ทีฆคามณิ;
สุตฺวา อุมฺมาทจิตฺตํ ตํ, ตสฺสํ ชาตกุตูหโลฯ
[14]
คเหตฺวา’ปติสฺส คามํ, ตํ อปสฺสิ มนุชาธิปํ;
อทา สโหปราเชน, ราชุปฏฺฐานมสฺสโสฯ
[15]
ควกฺขาภิมุขฏฺฐาเน, ตํ อุเปจฺจ ฐิตํ ตุสา;
ทิสฺวาน คามิณิํ จิตฺตา, รตฺตจิตฺตา’ห ทาสิกํฯ
[16]
‘‘โก เอโส’’ติ ตโต สุตฺวา,
มาตุลสฺส สุโตอิติ;
ทาสิํ ตตฺถ นิโยเชสิ,
สทฺธิํกตฺวาน โส ตโตฯ
[17]
ควกฺขมฺหิ ฑสาเปตฺวา, รตฺติํ กกฺกฏยนฺตกํ;
อารุยฺห ฉินฺทยิตฺวาน, กวาฏํ เตน ปาวิสิฯ
[18]
ตาย สทฺธิํ วสิตฺวาน, ปจฺจูเสเยว นิกฺขมิ;
เอวํ นิจฺจํ วสี ตตฺถ, ฉิทฺทาภาวา อปากโฏฯ
[19]
สา เตน อคฺคหี คพฺภํ, คพฺเภ ปริณเต ตโต;
มาตุ อาโรจยี ทาสี, มาตา ปุจฺฉิย ธีตรํฯ
[20]
รญฺโญ อาโรจยี ราชา, อมนฺเตตฺวา สุเต’พฺรหฺมา;
โปสิโยโส’ปิ อมฺเหหิ, เทว ตสฺเสว ตํ อิติฯ
[21]
ปุตฺโต เจ มารยิสฺสาม, ต’นฺติ ตสฺส อทํสุ ตํ;
สา สูติกาลสมฺปตฺเต, สูติ เคหญฺจ ปาวิสิํฯ
[22]
สงฺกิตฺวา โคปกํ จิตฺตํ, กาลเวลญฺจ ทาสกํ;
ตสฺมิํ กมฺเม นิสฺสายา’ติ, คามณิ ปริจารเกฯ
[23]
เต ปฏิญฺญํ อเทนฺเต เต, ราชปุตฺตา อฆาตยุํ;
ยกฺขา หุตฺวาน รกฺขิํสุ, อุโภ คพฺเภ กุมารกํฯ
[24]
อญฺญํ อุปวิชญฺญํ สา, สลฺลกฺขา เปสิ ทาสิยา;
จิตฺตา สา ชนยี ปุตฺตํ, สา อิตฺถิ ปน ธีตรํฯ
[25]
จิตฺตํ สหสฺสํ ทาเปตฺวา, ตสฺสา ปุตฺตํ สกมฺปิ จ;
อาณาเปตฺวา ธีตรํ ตํ, นิปชฺชาเปสิ สนฺติเกฯ
[26]
ธีตา ลทฺธา’ติ สุตฺวาน, ตุฏฺฐา ราชสุตา อหุํ;
มาตา จ มาตุมาตา จ, อุโภ ปน กุมารกํฯ
[27]
มาตามหสฺส นามญฺจ, เชฏฺฐสฺส มาตุลสฺส จ;
เอกํ กตฺวา ตมกรุํ, ปณฺฑุกาภยนามกํฯ
[28]
ลํกา ปาโล ปณฺฑุวาสุ-เทโว รชฺชมการยิ;
ติํส วสฺสมฺหิ ชาตมฺหิ, มโต โส ปณฺฑุกาภเยฯ
[29]
ตสฺมิํ มตสฺมิํ มนุชาธิปสฺมิํ,
สพฺเพ สมาคมฺม นรินฺทปุตฺตา;
ตสฺสาภยสฺสาภยทสฺส ภาตุ,
ราชาภิเสกํ อกรุํ อุฬาราติฯ
สุชนปฺปสาท สํเวคตฺถาย กเต มหาวํเส
อภยาภิเสโก นาม
นวโม ปริจฺเฉโทฯ
ทสม ปริจฺเฉท