เมนู

สุภทฺทกจฺจาน มโนมรูปินิํ;

มเหสีภาเว อภิสิญฺจิย’ตฺตโน;

สหคตา ตาย ปทาสิ อตฺตนา;

สหาคตานํ วสิ ภูมิโป สุขนฺตีฯ

สุชนปฺปสาท สํเวคตฺถาย กเต มหาวํเส

ปณฺฑุวาสุเทวาภิเสโก นาม

อฏฺฐโม ปริจฺเฉโทฯ

นวม ปริจฺเฉท

อภยาภิเสโก

[1]

มเหสี ชนยี ปุตฺเต, ทส เอกญฺจ ธีตรํ;

สพฺพเชฏฺโฐ’ภโย นาม, จิตฺตานาม กนิฏฺฐิกาฯ

[2]

ปสฺสิตฺวา ตํ วิยากํสุ, พฺราหฺมณา มนฺตปารคา;

‘‘รชฺชเหตุ สุโต อสฺสา, ฆาตยิสฺสติ มาตุเล’’ฯ

[3]

ฆาเตสฺสามิ กนิฏฺฐินฺติ, นิจฺฉิเต ภาตรา’ภโย;

วาเรสิ กาเล วาเสสุํ, เคหํ ตํ เอกถุณิเกฯ

[4]

รญฺโญ จ สิริคพฺเภน, ตสฺส ทฺวารมการยุํ;

อนฺโต ฐเปสุํ เอกญฺจ, ทาสิํ นรสตํ พหิฯ

[5]

รูเปนุ’มฺมาทยี นเร, ทิฏฺฐมตฺตาว สายโต;

ตโต อุมฺมาทจิตฺตา’ติ, นามํ โสปปทํ ลภิฯ

[6]

สุตฺวาน ลํกาคมนํ, ภทฺทกจฺจานเทวิยา;

มาตรา โจทิตา ปุตฺตา, ฐเปตฺเว’กญฺจ อาคมุํฯ

[7]

ทิสฺวาน เต ปณฺฑุวาสุ-เทวํ ลงฺกินฺทมาคตา;

ทิสฺวาน ตํ กนิฏฺฐิญฺจ, โรทิตฺวา สห ตาย จฯ

[8]

รญฺญา สุกตสกฺการา, รญฺโญ’นุญฺญาย จาริกํ;

จริํสุ ลํกาทีปมฺหิ, นิวสุญฺจ ยถารุจิํฯ

[9]