เสนาปติวโธ
[1]
นิชายุธทุติยสฺส , นิกฺขมนฺตสฺส ตสฺส หิ;
ตํ ขณํ ปุรโต โก’ปิ, สงฺขสทฺโท สมุคฺคโตฯ
[2]
ตโต เนกนิมิตฺตญฺญู, กุมาโร ตํ สุณิ ตฺว โส;
นิปฺผชฺชิสฺสติ สงฺกปฺโป, ขิปฺปํ เยเวติ โมทวาฯ
[3]
ตตฺถ ตตฺถ นิยุตฺตานํ, รกฺขกานมชานตํ;
นิกฺขมิตฺวา ปุราวีต-ภโย สีหปรกฺกโมฯ
[4]
เวเคน มคฺคํ คนฺตฺวาน, ปญฺจคาวุตมตฺตกํ;
พทลตฺถลคามสฺส, ปเทเสนาติ ทูรเกฯ
[5]
คาม เมกมุปาคญฺจิ, ปิลิํ วตฺถูติ สญฺญิตํ;
ชนานํ สนฺนิปาตาย, นิชานํ โส กตาวธิฯ
[6]
นิชาคมนโต ปุพฺพํ, ปฏิมคฺเค นิสีทิตุํ;
ปฏิลทฺธนิโยคานํ, เยจิ เทวาคเต ตทาฯ
[7]
ตหิํ ฐิเต โส ปสฺสิตฺวา, เอตฺตกา กินฺนุ อาคตา;
อิติ ปุจฺฉิ กุมาโรถ, เตปิ ตํ อิท มพฺรวุํฯ
[8]
โลกปฺปวตฺติํ สกลํ, ชานนฺเตนาปิ สามินา;
กิเมว มุจฺจเต มจฺจุ-ภยํ เกสํ น วิชฺชติฯ
[9]
พาลาตานุคโต สามิ, ฐิโต วยสิ อีทิเส;
อชฺชาปิ หิ มุเข ตุยฺหํ, ขีรคนฺโธ ปวายติฯ
[10]
น เหวตฺถิ วิสุํ วิตฺต-ชาตํ สงฺคหิตํ ตว;
ตทญฺญา โจปกรณ-สามคฺคี เนว วิชฺชเตฯ
[11]
จิรมฺปริจิตตฺเตหิ, ทฬฺหํ สารุฬภตฺติหิ;
วินา’มฺเหหิ วิสุํ เกวา’นุคนฺตาโร ชนาตุวํฯ
[12]
กิญฺจาคตานมมฺหากํ, ปิตา ตุยฺหํ นริสฺสโร;
กาเรสฺสติ อิทํ นาม, สพฺพถา เนว ญายเตฯ
[13]
อมฺหากมนฺตรามคฺเค , สงฺโข นาม จมูปติ;
มหพฺพโล มหาวีโร, รชฺชสีมํ ตมาวสํฯ
[14]
ปจฺจตฺถิเต ฐเปตฺวญฺเญ, เอเต กติปยา มยํ;
อญฺญมญฺญมฺหิ นิยต-มาสงฺกี หทยา ภุสํฯ
[15]
อรุณุคฺคมเวลา จ, สมาสนฺนตราธุนา;
อิติ ภีติํ ปกาเสสุํ, ปจฺเจกํ หทยสฺสิตํฯ
[16]
นิสมฺม เตสํ วจนํ, วิธาย มธุรํ สิตํ;
วีตสงฺโก กุมาโร โส, มุขาเน’สํ วิโลกิยฯ
[17]
จริตฺวาปิ มยา สทฺธิ-เมเต’โห กาลเมตฺตกํ;
น ชานิํสุ มมํ สพฺเพ, เยสญฺหิ ภยมิทิสํฯ
[18]
อิติ วตฺวา ภยํ เตสํ, วิโนเทตุ มุปฏฺฐิตํ;
สีหนาทํ ตทา’กาสิ, มหนฺตํ สีหวิกฺกโมฯ
[19]
ติฏฺฐนฺตุ มานุสา สพฺเพ, มยิ หตฺถคตายุเธ;
สกฺโก เทวานมินฺโทปิ, กุปิโต กิํ กริสฺสติฯ
[20]
พาโลติ มํ จินฺตย ตํ, ชาตา โว กุมตีทิสี;
ปริกฺขียติ เต ชาณา, นวโย’ติ น กิํ สุตํฯ
[21]
อชฺเชว กาตุเมเกน, กมฺมุนา จินฺติเตน เม;
สเทสปร เทสฏฺฐา, ภยภตฺตี ยถามยิฯ
[22]
กริสฺสนฺติ ยถา เวทํ, ภยํ ตุมฺเห ชหิสฺสถ;
ตถา รตฺติยเมตาย, วิภาตามย ขเณน เมฯ
[23]
อุนฺนเต ทสฺสยิสฺสามิ, พุทฺธิ สาหสวิกฺกเม;
อนุธาวติ มํ ตาต, เสเตหิ ยทิ โว ภยํฯ
[24]
ปุรโต โหถ ตุมฺเหหิ, วตฺวา เต คหิตายุโธ;
สาหเสกรโส วีโร, ตมฺหา นิกฺขมฺม คามโตฯ
[25]
อุทยา’จลสีสฏฺฐํ, เชตุมาทิจฺจมณฺฑลํ;
อปรํ รวิ พิมฺพํว, ปจฺฉิมา สา มุโขทิตํฯ
[26]
เตชสา ปสรนฺเตน, ชนานํ ปวิกาสยํ;
เนตมฺพุชวนํ ปาโต, พทลตฺถลิมาคมิฯ
[27]
ชฆสงฺขสฺสเรนา’ถ, เสนา นาโถ ปพุชฺฌิย;
สญฺชาตสมฺภโม ญตฺวา, ราชปุตฺตมุปาคตํฯ
[28]
สทฺธิํ พเลน มหตา, ปธุคฺคมฺมกตาทโร;
ปณามมุจิตํ กตฺตุ-มานโต วสุธาตเลฯ
[29]
อมฺหากเมสชีวนฺโต, กิํ นามตฺถํ กริสฺสติ;
มาเรตพฺโพ’ธุเนเวติ, ปสฺสนฺเต สมุขํ ภเฏฯ
[30]
เนวา’ทิฏฺฐาปราธสฺส, มรณํ ปุริโส จิตํ;
วโธ วิโรเธ สกฺกา’ติ, อิงฺคิเตน นิวาริยฯ
[31]
เสนาปติสฺส โส หตฺถํ, คเหตฺวา สีหสนฺนิโภ;
ภาสนฺโต มธุรํ วาจํ, ตสฺเสวา’คญฺฉิ มนฺทิรํฯ
[32]
อถสฺส คมนํ รญฺโญ, ภวิตพฺพมชานตา;
สรูปํ ยาว ชานามิ, ตาวสฺเสเต สหาคตาฯ
[33]
ยถา น สหิตา โหนฺติ, ฐเปตพฺพา วิสุํ วิสุํ;
กุมาโร’ว มมาคาเร, วสตู’ติ วิจินฺติยฯ
[34]
ตถา เสนาปติ กตฺวา, วญฺเจตุํ ตํ มหามติํ;
ทสฺเสตฺวา’ติ ถีสกฺการํ, รญฺโญ ทูเต ส เปสยิฯ
[35]
กุมาโร’ถ วิทิตฺวาน, เตน ตํ วญฺจนํ กตํ;
กตฺตพฺพเมตฺถา’กตฺวาห, มุทาสีโน ภเว ยทิฯ
[36]
อิจฺฉิตตฺถสฺส นิปฺผตฺติ, น เม ชาตุ ภวิสฺสติ;
อยํ ตาวา’ธุนาวสฺสํ, มาเรตพฺโพติ จินฺติยฯ
[37]
สหาคตํ ปโยเชตฺวา, ฆาตาปยิ จมูปติํ;
หโต เสนาธินาโถ’ติ, มหนฺตํ ขุภิตํ อหุฯ
[38]
เสนานาถภโฏ เอโก, สุตฺวา เสนาปติํ หตํ;
มารณํ สามิโน มยฺหํ, กิํ นิมิตฺตมีติ พฺรวิฯ
[39]
เนตฺติํ สปาณี สหสา, กุมารํ ฐิตเมกกํ;
อภิทาวิ สสามิสฺส, ปริจตฺตตฺตชีวิโนฯ
[40]
กุมารสฺส มุขํ ทิสฺวา, เวธมาโน ภเยน โส;
ปุเร ฐาตุมสกฺโกนฺโต, ปาทมูเล ตโต สยิฯ
[41]
คณฺหเถ’ตนฺติวจนา-กุมารสฺส ปุเรตรํ;
ตสฺเสเวโก สหจโร, ภฏเมตํ วิฆาตยิฯ
[42]
นิโยคํ เม วินา เตน, กตํ กมฺมํ น ยุชฺชติ;
อิติ ทณฺฑนเมตสฺส, การาเปสิยโถจิตํฯ
[43]
อถ ตํ กาลยมฺภูต-สงฺโขภมติภิํสนํ;
ภมุกฺขิปนมตฺเตน, ราชปุตฺโต สมํ นยิฯ
[44]
วีโร ยโสธรธโน ธิติมา กุมาโร;
วีโรปการจตุโร วรกิตฺติสาโร;
เสนินฺทสญฺจิตมนปฺปธนํ ภฏานํ;
สพฺพํ วิสชฺชยิ ยถารุจิยา คเหตุํฯ
สุชนปฺปสาทสํเวคตฺถาย กเต มหาวํเส
เสนาปติวโธ นาม
ติสฏฺฐิโม ปริจฺเฉโทฯ