อนุราธปุราภิคมโน
[1]
ยุวราชปเท ตสฺส, ฐิตสฺสา’ถ นยญฺญุโน;
อหู วิชยพาหูติ, นามํ สพฺพตฺถ ปากฏํฯ
[2]
มหาญฺญโณ นิชาณาย, ตตฺถ เภริํ จราวิย;
ฐเปนฺโต สจิเว’เนเก, ปติรูเป ปทนฺตเรฯ
[3]
โจฬานํ มทฺทนตฺถาย, ราชรฏฺฐาธิวาสินํ;
จตุโร จตุโรปาเย, โย ชยํ ตตฺถ โส วสีฯ
[4]
โจฬราชา สุณิตฺวา ตํ, ปุฬตฺถินคเร ฐิตํ;
เสนาปติม เปเสสิ, ทตฺวาน พลวาหนํฯ
[5]
เสนินฺทํ กาชรคฺคาม-สมีปํ สมุปาคตํ;
ทุปฺปสยฺหํ วิทิตฺวาน, คิริทุคฺคมคา ตโตฯ
[6]
เสนินฺโท กาชรคฺคามํ, วิลุมฺปิตฺวาน เวคสา;
ตตฺถ วตฺถุมสกฺโกนฺโต, สเทสํ ปุน ราคมิฯ
[7]
ตโต มหาทิปาโท’ปิ, อาคมฺม มลยา ลหุํ;
มหตา พลกาเยน, สิปฺปตฺถลกมาวสิฯ
[8]
ราชา รามญฺญวิสเย, ราชิโน สนฺติกํ ชเน;
เปเสสิ พหุเกสารํ, ธนชาตญฺจ’นปฺปกํฯ
[9]
วิจิตฺตวตฺถกปฺปูร-จนฺทนาทีหิ วตฺถูหิ;
ปริปุณฺณา จ นาวาโย, เนกาติตฺเถ สโมสฏาฯ
[10]
ธนชา เตหิ เนเกหิ, กโรนฺโต ภฏสงฺคหํ;
ตโต ตมฺพลคามมฺหิ, นิวสิตฺถ มหพฺพโลฯ
[11]
อญฺญมญฺญวิรุทฺธตฺตา, ราชารฏฺฐาธิวาสิโน;
อุปคฺคมฺม ชนา สพฺเพ, กรํ โน เทนฺติ สพฺพโสฯ
[12]
วิปกฺขาโจฬราชสฺส, ภินฺทนฺตา’ณํ มทุทฺธตา;
อายุตฺตเก วิหิํเสนฺโต, ยถากามํ จรนฺติ จฯ
[13]
ตํ สุตฺวา โจฬภูปาโล, สมฺปโกปวสีกโต;
เสนํ มหนฺติํ ทตฺวาน, เปเสสิ สจิวํ นิชํฯ
[14]
มหาติตฺเถ’วหิณฺโณ โส, ตตฺถ ตตฺถ พหูชเน;
ฆาเตนฺโต สวเส กตฺวา, ราชารฏฺฐาธิวาสิโนฯ
[15]
อนุกฺกเมน คนฺตฺวาน, ขราโณ โรหณํ ตทา;
อชฺโฌตฺถริ สเสโน ส, ภินฺโน เวโลวสาคโรฯ
[16]
รญฺโญ ปจฺจตฺถิกา หุตฺวา, รวิเทวจลวฺหยา;
อุโภ ทมิฬเสนินฺท-วสํ ยาตา มหพฺพลาฯ
[17]
มหาปกฺขพโลเปเต, เต ปสฺสิย จมูปติ;
โรหณํ สกลํ ขิปฺปํ, มญฺญิตฺถ สกหตฺถคํฯ
[18]
เอกาทสมฺหิ โส วสฺเส, ราชา โจฬาภิภูติยา;
ปลุฏฺฐปพฺพเต ทุคฺคํ, ปวิธาย ตหิํ วสีฯ
[19]
โจฬเสนา ตทาเสลํ, สมนฺตา สมฺปริกฺขิปิ;
ตตฺโถ’ภเยสํ เสนาน-มหู ภิํสนกํ รณํฯ
[20]
รญฺโญ ภฏา วินาเสตฺวา, สพฺพํ ตํ ทมิฬํ พลํ;
ปลายนฺตํ มหาโจฬ-สามนฺตญฺจานุพนฺธิยฯ
[21]
คเหตฺวาน สิรํ ตสฺส, คามสฺมิํ ตมฺพวิฏฺฐิเก
สทฺธิํ วาหนยาเนหิ, สารภูตธเนหิ จฯ
[22]
ตหิํ ตํ สกลํ ภณฺฑํ, เนตฺวา รญฺโญ ปทสฺสิย;
ปุฬตฺถินครํ คนฺตุํ, กาโล อิติ สมพฺรวุํฯ
[23]
มหีปาโลปิ ตํ สุตฺวา, สจิวานํ วโจ ตทา;
มหตา พลกาเยน, ปุลตฺถินครํ คโตฯ
[24]
ปวตฺติเมตํ สกลํ, สุตฺวา โจฬนริสฺสโร;
ติพฺพโกปวสํยาโต, ภูปาลคหณตฺถิโกฯ
[25]
สามํ ขิปฺปํ สมาคมฺม, วีโร สาครปฏฺฏนํ;
ภิยฺโยปิ มหติํ เสนํ, ลํกาทีปมเปสยีฯ
[26]
ตํ วิชานิย ภูมินฺโท, เสนินฺทํ เปสยี สกํ;
พลํ มหนฺตํ ทตฺวาน, โจฬเสนาย ยุชฺฌิตุํฯ
[27]
คจฺฉมาโน จมูนาโถ, โส’นุราธปุรนฺติเก;
สทฺธิํ ทมิฬเสนาย, วตฺเตสิ ตุมุลํ รณํฯ
[28]
ปติํสุ ตสฺมิํ สงฺคาเม, ภูปาลสฺส นรา พหู;
ภิยฺโยปิ ทมิฬายตฺตา, ชาตา ตํ รฏฺฐวาสิโนฯ
[29]
วิหาย ธรณีปาโล, ปุลตฺถินครํ ตทา;
วิลฺลิกาพาณกํ รฏฺฐํ, สมฺปาปุณิย เวคสาฯ
[30]
นิหจฺจามจฺจยุคลํ, ตํ รฏฺฐาธิฏฺฐิตํ ตทา;
ตหิํ วาสมกปฺเปสิ, สภเฏ สนฺนิปาตยํฯ
[31]
อตฺตานมนุพนฺธนฺตํ, สุตฺวา โจฬจมูปติํ;
คนฺตฺวา วาตคิริํ นาม, สมยญฺญู สิลุจฺจยํฯ
[32]
อุปจฺจกาย เสลสฺส, ตตฺถ ทุคฺคํ นิเวสิย;
รณํ กโรนฺโต เตมาสํ, ทมิเฬ ปฏิพาหยิฯ
[33]
เกสธาตุกนาถสฺส, มาริตสฺส ปุรารเณ;
ภาตา กณิฏฺโฐ สมฺปตฺต, มหาปกฺขพโล ตทาฯ
[34]
มารณํ สกภาตุสฺส, สรนฺโต รุฏฺฐมานโส;
สกลํ ปริวตฺเตสิ, คุตฺตหาลกมณฺฑลํฯ
[35]
อโถ ลํกิสฺสโร ตตฺถ, ขิปฺปํ คนฺตฺวา มหพฺพโล;
ฐาเน มจฺจุตฺถเล นาม, ขนฺธาวารํ นิพนฺธิยฯ
[36]
ขทิรงฺคณิทุคฺคมฺหา, ปลาเปตฺวาน ตํ รเณ;
ฐานา กุพุลคลฺลา จ, ยุชฺฌนฺโต ตํ ปลาปยิฯ
[37]
วิหาย ปุตฺตทาราทิ-สพฺพํ เนกธนํ พลํ;
ปลายมาโน โส รฏฺฐํ, โจฬายตฺต มคาลหุํฯ
[38]
ตทา นริสฺสโร ตต, ตสฺส สพฺพํ สมาทิย;
คนฺตฺวา ตมฺพลคามมฺหิ, นวํ ทุคฺคํ นิเวสิยฯ
[39]
อนุกฺกเมน คนฺตฺวาน, มหานาคหุลวฺหเย;
ปุเรวสี สุสชฺเชนฺโต, พลํ โจเฬหิ ยุชฺฌิตุํฯ
[40]
ตโต ราชา สมวฺหาย, สจีเว ทฺเว มหพฺพเล;
เปเสสิ ทิกฺขิณํ ปสฺสํ, วสํ เนตุํ ตหิํ ชเนฯ
[41]
สมฺเปเสสิ มหามจฺจ-ยุคลํ กกฺขลํ วิภู;
โจฬทปฺปวินาสาย, ตโต เวลา มหาปเถฯ
[42]
เปสิตา ทกฺขิณํ ปสฺสํ, อมจฺจา’เม มหพฺพลา;
มุหุนฺนรุคฺคมทุคฺคํ, พทฬตฺถลเมว จฯ
[43]
วาปีนครทุคฺคญฺจ , พุทฺธคามกเมว จ;
ติลคุลฺลํ มหาคลฺลํ, มณฺฑคลฺลกเมว จฯ
[44]
อนุราธปุรญฺจาติ, คเหตฺวาน กเมน เต;
วตฺเตนฺตา สวเส รฏฺฐํ, มหาติตฺถมุปาคตาฯ
[45]
เปสิตา สจิวาทฺเวตุ, ตโต เวลา มหาปเถ;
วิลุมฺปนฺตา ฉคามาทิ-ขนฺธาวาเร ตหิํ ตหิํฯ
[46]
ปุลตฺถินคราสนฺนํ, กเมนา’คมฺม เปสยุํ;
ทูเต ราชนฺติกขิปฺป-มาคนฺตุํ วฏฺฏตีติหฯ
[47]
ทิสาสา ทฺวีสุ ยาเนหิ, สจิเวหิ ปวตฺติตํ;
วิกฺกมาติ สยํ สุตฺวา, กาลญฺญู โส มหีปหิฯ
[48]
สีฆํ สนฺนยฺห เสนงฺคํ, สมคฺคํ วิทิโกวิโท;
อุมฺมูลนายโจฬานํ, ปุราตมฺหา’ภินิกฺขมิฯ
[49]
คจฺฉํ คงฺคาย มหิย-งฺคณถูปนฺติเก วิภู;
เสนานิเวสํ กาเรตฺวา กญฺจิกาลํ ตหิํ วสีฯ
[50]
กเมนาคมฺม ฐานญฺญู, ปุฬตฺถินครนฺติเก;
พนฺธาเปสิ มหาวีโร, ขนฺธาวารํ ถิรํ วรํฯ
[51]
ตตฺถ ตตฺถ ฐิตา สูรา, โจฬา เย กกฺขลา’ขิลา;
ปุลตฺถินคเร ยุทฺธํ, กาตุํ สนฺนิปติํสุ เตฯ
[52]
นิกฺขมฺม นครา คนฺตฺวา, โจฬา พหิ มหารณํ;
กตฺวา ปราชิตา ภีตา, ปวิสฺส นครํ สกํฯ
[53]
คุตฺตา เสสปุรทฺวารา, โคปุรฏฺฏาลนิสฺสิตา;
มหาหวํ พหุสฺสาหา, ปวตฺเตสุํ ภยาวหํฯ
[54]
ทิยฑฺฒมาสํ ยุชฺฌนฺติ, นครํ ตมุปรุนฺธิย;
สาเธตุํ เนวสา’สกฺขิ, ภูปาลสฺส มหาจมูฯ
[55]
มหารญฺโญ มหาวีรา, มหาสูรา มหพฺพลา;
มหาภฏา มหามานา, รวิเทวจลาทโยฯ
[56]
อุลฺลงฺฆิตฺวาน ปาการํ, ปวิสฺส สหสา ปุรํ;
ขเณน ทมิเฬ สพฺเพ, มูลฆจฺจมฆาตยุํฯ
[57]
เอวํ ลทฺธชโย ราชา, ตทา วิชยพาหุโส;
จราเปสิ นิชาณาย, เภริํ ภูริมติปุเรฯ
[58]
ตํ สุตฺวา สกเสนาย, วินาสํ โจฬภูปติ;
สีหฬา พลวนฺโตติ, ภิยฺโย เสนํ น ปาหิณิฯ
[59]
วีโร อเสสนิหตุทฺธฏ โจฬเสฏฺโฐ;
วิญฺญู สุสาธุฏฺฐปิตาขิลราชรฏฺโฐ;
อิฏฺฐนฺนุราธปุรเสฏฺฐมตีว หฏฺโฐ;
วสฺสมฺหิ ปญฺจทสเม คมิ ราชเสฏฺโฐฯ
สุชนปฺปสาทสํเวคตฺถาย กเต มหาวํเส
อนุราธปุราภิคมโน นาม
ฉปฺปญฺญาสติโม ปริจฺเฉโท
สตฺตปญฺญาสติม ปริจฺเฉท
สํคหกรโณนาม
[1]
ลงฺการกฺขาย สจิเว, พลิโน โยธสมฺมเต;
ปฏิปาฏิํ สมุทฺทิสฺส, สมนฺตา สนฺนิโยชยิฯ
[2]
อภิเสกมงฺคลตฺถาย, ปาสาทาทิมเนกตํ;
กิจฺจํ สมฺปาทนียนฺติ, สจิวํ สนฺนิโยชิยฯ
[3]
วนฺทนีเย’ภิวนฺทนฺโต, ปเทเสเนกเกตหิํ;
เนตฺวา มาสตฺตยํ คญฺฉิ, ปุลตฺถินครํ ปุนฯ
[4]
วิสฺสุโต อาทิมลย-นาเมน พลนายโก;
อุชุปจฺจตฺถิโก หุตฺวา, มหีปาลสฺส สพฺพโสฯ
[5]
คงฺคา มตฺถยุ’ปาคญฺฉิ, พลํ สพฺพํ สมาทิย;
อนฺทูติ วิสฺสุตํ มนฺท-ปญฺโญ คามํ ปุรนฺติเกฯ
[6]
ลํกิสฺสโร ตหิํ คนฺตฺวา, อุทฺธริตฺวา ตมุทฺธตํ;
ปุลตฺถินครํ คญฺฉิ, วเส วตฺติย ตํ พลํฯ
[7]
ยุวราชปทํเยว, สิโต สนฺโต ลิขาปยิ;
โส สตฺตรสวสฺสานิ, สปฺปญฺโญ นรสตฺตโมฯ
[8]