โภโค อนิจฺจา สห ชีวิเตน;

ปเคว เต พนฺธุชนา สหายา;

นราธีปํ ปสฺสถ เอกเมว;

สมาคตํ มจฺจุมุขํ สุโฆรํฯ

สุชนปฺปสาทสํเวคตฺถาย กเต มหาวํเส

เอก ราชโก นาม

อฏฺฐจตฺตาลีสติโม ปริจฺเฉโทฯ

เอกูนปญฺญาสติม ปริจฺเฉท

ราชทฺวยทีปโน

[1]

เอวํ ตสฺมิํ มเต ตสฺส, กาตพฺพํ สาธุการิย;

มหาทีปาโท เสนวฺโห, อาทาย พลวาหนํฯ

[2]

อาคมฺม นครํ ราชา, อโหสิ ธรณี ตเล;

อาทิกปฺปมฺหิ ราชูนํ, ทสฺสนฺโต จริยํ ปิยฯ

[3]

สทฺโธ มหาธโน สูโร, มุตฺตจาคี นิราลโย;

ยาจโยโค มหาโภโค, สมฺปนฺนพลวาหโนฯ

[4]

กิตฺติยา’มลภูตาย, ตถา เตโช คุเณน จ;

สนฺนิปาตํว โส จนฺท-สูริยานํ นิทสฺสยิฯ

[5]

อสงฺกิณฺณ คุณากิณฺโณ, สุวิจิณฺณ คุณาคุโณ;

นิตฺถิณฺณปาโป นิพฺพิณฺณ-สํสาโร สารทสฺสโนฯ

[6]

ภริยา ตสฺส ยา อาสิ, สงฺฆาตํ โส ภิเสจยิ;

มเหสีภาเว ทตฺวาน, ปริหารํ ยถาภตํฯ

[7]

มหินฺทํ นาม สปฺปญฺญํ, กณิฏฺฐํ ภาตรํ สกํ;

ทตฺวา ทกฺขิณภาคํ โส, โอปรชฺเช’ภิเสจยิฯ

[8]

อนฺเตปุเร’ปรชฺฌิตฺวา, โส รญฺญา อวธาริเต;

สปุตฺตทาโร วุฏฺฐาย, อญฺญาโต มลยํ อคาฯ

[9]

อุปฺปชฺชิตฺถ ตทา ปุตฺโต, รญฺโญ สงฺฆาย เทวิยา;

ทสฺเสนฺโต’ว ปนาทสฺส, กุมาร รูปมตฺตโนฯ

[10]

ราชา ตํ ชาตมตฺตํ’ว, ทิสฺวา สนฺถุฏฺฐมานุโส;

สิทฺธตฺถํ ลุมฺพินีชาตํ, ราชา สุทฺโธทโน วิยฯ

[11]

ธญฺญปุญฺญคุณูเปโต, ฐเปตฺวา ทีปเมกกํ;

ชมฺพุทีเป’ปิ กสิเณ, รชฺชโยคฺโคติ เม สุโตฯ

[12]

นามทาน ทิเนเยว, ปริหาเรน สพฺพโส;

โอปรชฺเช ภิสิญฺจิตฺวา, ทกฺขิณํ เทสมสฺส’ทาฯ

[13]

ยุวราชาปิ มลเย, วสนฺโต’ว มหีปติํ;

อาราเธตฺวา อุปาเยน, อนุญฺญโต สภาตราฯ

[14]

นิกายตฺตย วา สีหิ, สทฺธิํ ภิกฺขูหิ อาคโต;

ทิสฺวา ราชานเมตฺเถว, สนฺธีํ’กาสิ อกุปฺปิยํฯ

[15]

ยา ตสฺส ยุวราชสฺส, ภริยา ติสฺสา นามิกา;

ราชินี สา วิชายิตฺถ, ธีตรํ สงฺฆนามิกํฯ

[16]

กิตฺตินามา’ปรายา จ, ภริยา สาปิ โข ปน;

วิชายิ ปุตฺเต จตฺตาโร, ตถา เอกญฺจ ธีตรํฯ

[17]

ตทา ราชาปิ จินฺเตตฺวา, เอวํ สติ กณิฏฺฐโก;

นิสฺสงฺโก มยิ โหตีติ, สมฺมา มนฺตีหิ มนฺติยฯ

[18]

ธีตรํ ยุวราชสฺส, สุรูปิํ รูปนามิกํ;

กสฺสปสฺส’ตฺต ปุตฺตสฺส, วิวาหํ การยิ พุโธฯ

[19]

ทกฺขิณํ เทสมสฺเสว, กณิฏฺฐสฺส สทาปยิ;

ราชปุตฺตสฺส ปาทาปิ, ปจฺเจกํ โภคมตฺตโนฯ

[20]

รชฺชมฺหิ สพฺพํ ตสฺเสว, ปริโภคาย ทาปยิ;

เกวลนฺตุ วิจาเรสิ, ทีปํ ทีป หิตาวโหฯ

[21]

เตสํ สํวาสมนฺวาย, อุภินฺนํ ปุญฺญกมฺมินํ;

ธญฺญปุญฺญคุณูเปตา, วิชาตา ปุตฺตธีตโรฯ

[22]

กตฺวา สพฺโพปหาเรน, ทาฐาธาตุ มหามหํ;

อารุยฺห วรปาสาทํ, รตนวฺหํ มหีปติฯ

[23]

ตทา โสวณฺณยสฺสาปิ, สมฺพุทฺธสฺส ปุรา ฐิตํ;

สุญฺญํ ปิฏฺฐํ สยํ ทิสฺวา, กสฺมา เอวนฺติ สํวทิฯ

[24]

ตโต อมจฺจา อาหํสุ, นาชานาสิ มหีปติ;

มหาปิตุนรินฺทสฺส, กาเล ตว นริสฺสรํฯ

[25]

ปณฺฑุราชา อิธาคมฺม, ทีปเมตํ วินาสิย;

สพฺพํ สารคตํ ทีเป, สมาทาย คโต อิติฯ

[26]

ตํ สุตฺวา ลชฺชิโต ราชา, สยํ วิย ปราชิโต;

ตทเหว นิโยเชสิ, อมจฺเจ พลสงฺคเหฯ

[27]

ตทา’ว กิร อาคญฺฉิ, ปณฺฑุราชกุมารโก;

ปริภูโต สราเชน, รชฺชตฺถํ กต นิจฺฉโยฯ

[28]

ราชา ทิสฺวา’ติ สนฺตุฏฺโฐ, กตฺตพฺพํ ตสฺส การิย;

มหาติตฺถ มุปาคมฺม, ปฏฺฏนํ เสมตฺรโสฯ

[29]

มหนฺตํ พลกายญฺจ, ตสฺโสปกรณานิ จ;

อนุนํ ปฏิยาเทตฺวา, เทวเสนํว สชฺชิตํฯ

[30]

ปณฺฑุราชกุมาเรน, สทฺธิํ เสนาปติ สกํ;

คนฺตฺวา ตํ ปณฺฑุราชานํ, หนฺตฺวานิกมิโต ปุราฯ

[31]

รตนํ สพฺพมาทาย, ทตฺวา รชฺชํ อิมสฺส จ;

น จิเรเนว เอหีตี, อุยฺโยเชสิ มหายโสฯ

[32]

โสปิ เอวํ กโรมีติ, ปฏิสฺสุตฺวา มหีปติํ;

วินฺทิตฺวา พลมาทาย, นามมารุยฺห ตํ ขเณฯ

[33]

ปรตีรํ ตโต คนฺตฺวา, สํวุฬห พลวาหโน;

วินาสยนฺโต ปจฺจนฺตํ, วาเรสิ มธุรํ ปุรํฯ

[34]

ทฺวารานิ ปิทหิตฺวาน, ปจฺฉินฺทิตฺถ คตาคตํ;

ตโต อคฺคิํ ขิปาเปสิ, โคปุรฏฺฏาล โกฏฺฐเกฯ

[35]

เอวํ สีหฬเสนาย, ปวิฏฺฐาย สกํ ปุรํ;

สพฺพํ วิลุมฺปมานาย, เสนงฺคํ ฆาตยนฺติยาฯ

[36]

ปณฺฑุราชา นิสมฺเมตํ, สมาทาย สกํ พลํ;

เวคสา ตํ สมาคมฺม, ยุทฺธํ กาตุํ สมารภิฯ

[37]

อสมฺปุณฺณ พลตฺตา โส, วิทฺโธ สลฺเลน ภูปติ;

หตฺถิกฺขนฺธคโตเยว, วิหาย ปุรมตฺตโนฯ

[38]

ปลายิตฺวา คตฐาเน, ชีวิตํ นิชเมสฺสชิ;

ภริยาว’สฺส เตนาสิ, สมฺปตฺตา ชีวิตกฺขยํฯ

[39]

ตโต สีหฬเสนาสา, ปวิฏฺฐา นิพฺภยา ปุรํ;

ตตฺถ สพฺพํ วิลุมฺปิตฺถ, เทวา’สิรปุรํ ยถาฯ

[40]

เสนาปติ ตโต ราช-เคเห ภตฺตํ สเมกฺขิย;

ทีปานิตมิมมฺหา จ, ตตฺรฏฺฐญฺจ มหารหํฯ

[41]

สารํ สพฺพํสมาทาย, เทเส จ นคเร ฐิตํ;

กตฺวา อิสฺสริยํ ตตฺถ, วเสวตฺติย อตฺตโนฯ

[42]

ปณฺฑุราช กุมารํ ตุ, ตตฺถ รชฺเช’ภิ สิญฺจิย;

กาเรตฺวา ปริหารญฺจ, เทสํ ตสฺส สมปฺปิยฯ

[43]

ยถารุจิํ คเหตฺวาน, หตฺถิอสฺเส นเร’ปิ จ;

ตตฺถ ตตฺถ ยถา กามํ, วสนฺโต อกุโต ภโยฯ

[44]

สมุทฺท ตฏมาคมฺม, ฐตฺวา ตตฺถ ยถาสุขํ;

กีฬนฺโต วิย นาวํ โส, สมารุยฺห วิสารโทฯ

[45]

มหาติตฺถ มุปาคมฺม, วนฺทิตฺวา ธรณี ปติํ;

ตํ สาสนํ นิเวเทตฺวา, สารํ ทสฺเสสิ อาหฏํฯ

[46]

ราชา สาธูติ วตฺวาน, กาเรตฺวา ตสฺส สงฺคหํ;

สทฺธิํ เสนาย อาคนฺตฺวา, ปกฏฺฐาย สกํ ปุรํฯ

[47]

ชยปานํ ปิวิตฺวาน, กตฺวา วิชยมงฺคลํ;

มหาธาคํ ปวตฺเตตฺวา, ยาจกานํ ยถา รุจิํฯ

[48]

สพฺพํ ปากติกํ กาสิ, สารํ ทีเป นิราลโย;

โสวณฺณ ปฏิมาโย จ, ยถาฐาเน ฐปาปยิฯ

[49]

สุญฺญํ รตนปาสาเท, ปิฏฺฐํ ปูเรสิ สตฺถุโน;

กาสิ รกฺขปิธาเนน, นิพฺภยํ ธรณีตลํฯ

[50]

ตโต ปฏฺฐาย ทีปํโส, อรีนํ ทุปฺปธํสิยํ;

กตฺวา วฑฺเฒสิ โภเคหิ, อุตฺตราทิกุรุํ ปิยฯ

[51]

ขินฺนา ปุพฺพสฺส ราชสฺส, กาเล ทีปมฺหิ ปาณิโน;

นิพฺพุตา ตํ สมาคมฺม, ฆมฺมา วิย วลาหกาฯ

[52]

ตสฺส วีสติเม วสฺเส, วิหาเร อภยุตฺตเร;

นิกฺขมิตฺวา คตา เหสุํ, ปํสุกูลิก ภิกฺขโวฯ

[53]

ยุวราชา มหินฺโท โส, ธุมราชสฺส สตฺถุโน;

การาปยิ ฆรํ รมฺมํ, ทสฺสเนยฺยํ มโนรมํฯ

[54]

โพธิเคหํ กโรนฺโต ตํ, ทิสฺวา วฑฺฒกีโน ตทา;

วํเสน สาขํ อาหจฺจ, ภิชฺชนฺตํ วรโพธิยาฯ

[55]

กินฺตุ กาตพฺพเมตฺถาติ, ยุวราชํ นิเวทยุํ;

โส ตํ ตํ มุปสํกมฺม, มหาปูชาย ปูชิยฯ

[56]

สเจ สตฺถา, หิตตฺถาย, สมฺภูโต สพฺพปาณินํ;

ลทฺธุํ ปุญฺญสฺส’นคฺฆสฺส, ฆรสฺส กรเณติ’ธฯ

[57]

สาขา คจฺฉํ ตุ อุทฺธํว, กาตุํ สกฺกา ยถาฆรํ;

เอวมาราธยิตฺวาน, วนฺทิตฺวา สงฺฆรํ คโตฯ

[58]

ตทา สาขา ทุมินฺทสฺส, รตฺติยํ อุทฺธมุคฺคมิ;

ตโต กมฺมกรา สพฺพํ, อาโรเจสุํ สสามิโนฯ

[59]

ยุวราชา’ติ สนฺตุฏฺโฐ, ภาตุรญฺโญ นิเวทิย;

มหาปูชาย ปูเชสิ, วิสฺสชฺชิย พหุธนํฯ

[60]

ตถา มหินฺทเสนวฺหํ, ปริเวณญฺจ การิย;

สงฺฆสฺสา’ทา สโภคํ โส, ปุญฺญา ปุญฺญานิจาจีนิฯ

[61]

อทา สปริสํ ภตฺตํ, วตฺถํ ฉตฺตมุปาหนํ;

ตถา คมิยภตฺตญฺจ, นหานญฺจ สภตฺตกํฯ

[62]

เอวํ ขุทฺทานุ ขุทฺทานิ, กตฺวา ปุญฺญานิ โส วิภู;

รญฺโญ เตตฺติํสวสฺสมฺหิ, ยถากมฺมมุปาคมิฯ

[63]

อถ ราชา มเตตสฺมิํ, กณิฏฺฐมุทยํ สกํ;

ตสฺส ฐาเน ฐเปตฺวาน, สพฺพํ ตสฺเสว ตสฺสทาฯ

[64]

ตุลาภารสฺส ทาเนน, ทีนานาเถ สตปฺปยิ;

ธมฺมกมฺเมน โสเธสิ, นิกายตฺตยเมกโตฯ

[65]

โสณฺณถาลีสหสฺสํ โส, มุตฺตาหิ ปริปูริย;

ฐเปตฺวา มณิเมเกกํ, ตสฺโสปริ มหารหํฯ

[66]

พฺราหฺมณานํ สหสฺสสฺส, สุทฺเธ รตนภาชเน;

โภเชตฺวา ขีรปายาสํ, ทาเปตฺวา เหมสุตฺตกํฯ

[67]

ตถา นเวหิ วตฺเถหิ, อจฺฉาเทตฺวา ยถารุจิํ;

สนฺตปฺเปสิ มหนฺเตน, ปริหาเรน ปุญฺญวาฯ

[68]

ภิกฺขูนํ ทีปวาสีนํ, อทาสิ จ ติจีวรํ;

อทา สพฺพาสมิตฺถีนํ, วตฺถญฺจ สุมโนหรํฯ

[69]

กาเรตฺวา โลหปาสาทํ, เวชยนฺตสริกฺขกํ;

วฑฺเฒสิ ปฏิมํ ตตฺถ, สุวณฺณฆฏโกฏฺฏิมํฯ

[70]

สุตฺวา อุโปสถาคาร-ภาวํ สพฺพ มเหสีนํ;

ตุจฺโฉ ยํ เนว โหตูติ, วาสํ สงฺฆสฺส ตํ อกาฯ

[71]

โภคคาเม จ ตสฺสทา, รกฺขเก จ นิโยชยิ;

ภิกฺขู ทฺวตฺติํสมตฺตาหิ, วสนฺตูติ นิยามยิฯ

[72]

คงฺคาย มริยาทํ โส, กาเรสิ มณิเมขลํ;

โตยนิทฺธมนญฺจากา, มณิหีรกวาปิยาฯ

[73]

กฏฺฐุนฺตนคเร เจว, กาณวาปิํจ พนฺธยิ;

เวชฺชสาลญฺจ กาเรสิ, เจติยมฺหิ คิริมฺหิ โสฯ

[74]

พุทฺธคามวิหารญฺจ, วิหารํ มหิยงฺคณํ;

กูฏติสฺส วิหารญฺจ, โภคคาเม น วฑฺฒยิฯ

[75]

มณฺฑลสฺส คิริสฺสา’ทา, วิหารสฺส สคามเก;

อุตฺตราฬฺเห จ กาเรสิ, ปาสาทํ ปริเวณเกฯ

[76]

มหาเสนสฺส พุทฺธสฺส, คามํ ทตฺวาน รกฺขเก;

ทาสิ โสพฺภวิหาเร จ, กาเรสิ ปฏิมาฆรํฯ

[77]

โพธิสตฺเต จ วฑฺเฒสิ, ปาสาเท มณิเมขเล;

สีลามยมุนินฺทสฺส, ชิณฺณเคหมฺปิ การยิฯ

[78]

ราช ตํ โพธิสตฺตญฺจ, สฆรํ ตตฺถ สนฺนหิ;

อาลวาลํ ทุมินฺทสฺส, คนฺธิตฺวา กา มหามหํฯ

[79]

ลิขิตฺวา เหมปฏฺฏมฺหิ, สพฺพรตนสุตฺตกํ;

มหาปูชมกา ตสฺส, อภิธมฺมํ กถาปยิฯ

[80]

อานนฺทปฏิมํ เนตฺวา, ปุรํ กตฺวา ปทกฺขิณํ;

ปริตฺตํ ภิกฺขุสงฺเฆน, ภณาเปตฺวา ยถาวิธิํฯ

[81]

ปริตฺโตทกเสเกน, ชนํ กตฺวา นิราตุรํ;

ราชา โรคภยํ เปวํ, นีหริตฺถ สเทสโตฯ

[82]

อภิเสกํ คเหตฺวาน, เหมวาลุก เจติเย;

อนุสํวจฺฉรํ กาตุํ, ตํ จาริตฺตํ ลิขาปยิฯ

[83]

อทา มาสสฺส จตูสุ, อุโปสถทิเนสุ โส;

จตุนฺนญฺจ สหสฺสานํ, วตฺถทานํ สภตฺตกํฯ

[84]

เวสาขกีฬํ กีฬิตฺถ, สทฺธิํ ทุคฺคตเกหิ โส;

อนฺนํ ปานญฺจ วตฺถญฺจ, เตสํ ทตฺวา ยถารุจิํฯ

[85]

ภิกฺขุสงฺฆสฺส ทีปมฺหิ, นิจฺจทานํ ปวตฺตยิ;

สนฺตปฺเปสิ จ ทาเนน, กปณทฺธิกวณิพฺพเกฯ

[86]

ตสฺส รญฺโญ มเหสี จ, สงฺฆนามา อการยิ;

ปพฺพตํ สงฺฆเสนวฺหํ, สโภคมภยุตฺตเรฯ

[87]

นีลจูฬามณิญฺจากา, สิลามย มเหสิโน;

ปูชํ สพฺโพปหาเรหิ, กาสิ สตฺถุสฺส สพฺพทาฯ

[88]

ตสฺส เสนาปติจา’กา, เสนเสนาปติวฺหยํ;

ปริเวณํ มหาโภคํ, สูโร ตุฏฺฐกนามโกฯ

[89]

เอวํ สปริโส กตฺวา, สปุญฺญานิ มหายโส;

ปญฺจติํสติเม วสฺเส, เทวโลกมุปาคมิฯ

[90]

ตโต ตสฺสา’นุโช อาสิ, อุทโย นาม ขตฺติโย;

ราชา สพฺพปฺปโยเคหิ, หิเตสี ทีปวาสีนํฯ

[91]

หุตฺวา โส สยํ ราชา, กณิฏฺฐํ สกภาตรํ;

มหาทีปาทฐานมฺหิ, ฐปิ กสฺสปนามกํฯ

[92]

ราชา จินฺติย ญาตีนํ, กาตพฺโพ สงฺคโห อิติ;

เอวํ กสฺสปนามสฺส, ภาตุปุตฺตสฺส ธีตรํฯ

[93]

ยุวราชสฺส ตสฺสา’กา, ภริยํ เสนนามิกํ;

ธาเรสิจ สยํ ราชา, อปรํ ติสฺสสวฺหยํฯ

[94]

มหินฺทสฺสุปราชสฺส, ราชธีตาย กิตฺติยา;

ปุตฺโต กิตฺตคฺคโพธีติ, อาทิปาโท วิพุทฺธิโกฯ

[95]

โจโร หุตฺวา มหารญฺโญ, นิกฺขมิตฺวาน รตฺติยํ;

เอโก อญฺญาตเวเสน, สมุปาคมฺมโรหณํฯ

[96]

ชนํ หตฺตคตํ กตฺวา, เทสํ สพฺพํ วินาสิย;

ฆาตาปยิตฺถ ตตฺรฏฺฐํ, โส ตํ มาตุลมตฺตโนฯ

[97]

ตํ สุตฺวา ธรณีปาโล, ตสฺมิํ’ตีว ปกุปฺปิย;

อาเนตุํ ตมุปายํ โส, คเวสนฺโต ตถา ตถาฯ

[98]

ภาตุปุตฺตํ ตมาหุย, ยุวราชํ สกสฺสปํ;

อามนฺเตสิ มหาปุญฺญ, สหาโย โหติ เม อิติฯ

[99]

กิํ เม กตฺตพฺพ’มิจฺจาห, ปจฺจาห ธรณีปติ;

ปุตฺโต ตว มหินฺโท โส, วุทฺธิปฺปตฺโต มหาพโลฯ

[100]

ลาภี โรหณเทสสฺส, มาติโต ปิติโต’ปิ จ;

สูโร สพฺพสโห วีโร, กุสโล กตูปาสโนฯ

[101]

สงฺคามโยคฺโค มติมา, นิปุโณ นยโกวิโท;

ตํ เปเสตฺวา นยิสฺสาม, ปาปํ มาตุลฆาตกํฯ

[102]

ตํ สุตฺวา วจนํ รญฺโญ, กสฺสโป ภาสิ สาทโร;

เทว เทเวน วุตฺโต’หํ, คจฺเฉยฺยํ กินฺตุ เม สุโตฯ

[103]

วํโส เม ปาลิโต โหติ, ปสาโท จ ตวาธิป;

ตสฺมา กาลมหาเปตฺวา, ยํ อิจฺฉสิ ตถา กุรุฯ

[104]

สุตฺวา อตีวสนฺตุฏฺโฐ, นรินฺโท ตสฺส ตํ วโจ;

มหนฺถํ พลกายํ โส, สพฺพโส ปฏิยาทิยฯ

[105]

มหตา ปริหาเรน, มหินฺทํ ราชโปตกํ;

รกฺขิตุํ ตํ นิโยเชตฺวา, วชิรคฺคญฺจ นายกํฯ

[106]

ตุจฺฉํ วิย ปุรํ กตฺวา, สพฺพญฺจ พลวาหนํ;

สพฺโพปกรณญฺเจว, อนูนํ ตสฺส ทาปิยฯ

[107]

สยํ ตมนุคจฺฉนฺโต, ปทสา’ว นริสฺสโร;

อุยฺโยเชสิ มหาปุญฺญ, คจฺฉ รุกฺขาติ เมทินิํฯ

[108]

มหินฺโท โส มหินฺโท’ว, เทวเสนา ปุรกฺขโต;

คจฺฉนฺโต สุวีโรจิตฺถ, เทวาสุรมหาหวํฯ

[109]

ตโต คนฺตฺวา น จิเรน, คุตฺตสาลมุปาคมิ;

ตโต ชานปทา สพฺเพ, มณฺฑลิกา จ รฏฺฐิยาฯ

[110]

เตน มาตุลฆาเตน, ปาปเกน อุปทฺทุตา;

คนฺตฺวา ตํ ปริวาเรสุํ, ลทฺโธ โน สามิโก อิติฯ

[111]

ปตนฺโต โสปิ โข โจโร, ฐิโตว คิริมณฺฑเล;

สพฺพํ หตฺถคตํ กตฺวา, ราชภณฺฑํ มหคฺฆิยํฯ

[112]

หตฺถี อสฺเสจ อาทาย, คนฺตฺวา มลยมารุหิ;

มหินฺทเสนา ฆาเตนฺตี, ตสฺส เสนํ ตหิํ ตหิํฯ

[113]

ปทานุปทมสฺเส’ว, คจฺฉนฺติ หตฺถิอสฺสเก;

ทิสฺวา มลยปาทมฺหิ, คเหตฺวา เอตฺถ โส อิติฯ

[114]

ตตฺถ ปาวิสิมทฺทนฺตี, สพฺพํ มลยกานนํ;

นทีโย ปลฺลเล เจว, กโรนฺติ มคฺคสาทิเสฯ

[115]

พาลโกว ชนํ ทิสฺวา, สพฺพํ รตนมตฺตโน;

โกธาภิภูโต ฉฑฺเฑสิ, นที โสพฺภตฏาทีสุฯ

[116]

เอกโกว นิลียิตฺถ, วเน ปพฺพตกนฺทเร;

คเวสนฺโต ชโน ทิสฺวา, ตมคฺคหิ นราธมฺมํฯ

[117]

ตมาทาย’ติ ตุฏฺโฐ โส, ชโน อาคมฺม สชฺชุกํ;

มหินฺทมุปทสฺเสสิ, นิสินฺนํ คุตฺตสาลเกฯ

[118]

โส ตํ ทิสฺวา หสิตฺวาน,

ภุตฺโต กิํ โรหโณ’’อิติ;

นายกสฺส นิยฺยาเตตฺวา,

วชิรคฺคสฺส ราชิโนฯ

[119]

สยํ เสนํ สมาทาย, มหาคามมุปาคโต;

โรหณา ธิปติ หุตฺวา, กโรนฺโต โลกสงฺคหํฯ

[120]

ชนํ ปากติกํ กตฺวา, พาลเกน วิพาธิตํ;

สาสนญฺจ ยถาฐาเน, ฐเปตฺวา เตน นาสิตํฯ

[121]

ปุปฺผาราเม ผลาราเม, การยิตฺวา ตหิํ ตหิํ;

วาปิโย’ปิ จ คณฺหิตฺวา, พนฺธาเปตฺวา มหานทิํฯ

[122]

สพฺพตฺถ สุลภํ กตฺวา, สงฺฆสฺส จตุปจฺจยํ;

ทุฏฺเฐ จ ปฏิพาเหตฺวา, มณฺฑลีเก จ รฏฺฐิเยฯ

[123]

โจเร จ ปริโสเธตฺวา, กตฺวา วิคตกณฺฏกํ;

โตสยนฺโต’ขิลํ โลกํ, จาคโภคสมปฺปิโตฯ

[124]

อุปาสนิโย วิญฺญูหิ, เสวนีโย ธนตฺถีหิ;

กปฺปรุกฺขูปโม สพฺพ-ยาจกานํ หิตาวโหฯ

[125]

หิตฺวา ทุพฺพินยํ เทเส, ปุพฺพเกหิ ปวตฺติตํ;

สมาจรนฺโต ธมฺมญฺจ, วาสํ ตตฺเถว กปฺปยิฯ

[126]

อาทิปาทํ คเหตฺวาน, วชิรคฺโค วินายโก;

อนุราธมุปาคมฺม, ราชานมภิทสฺสยิฯ

[127]

ราชาปิ ทิสฺวา ตํ กุทฺโธ, ขิปฺปํ ปกฺขิปฺป จารเก;

รกฺขาวรณมสฺสาทา, วิเหเฐสิ จ สพฺพาโสฯ

[128]

อทาสิ จ ตุลาภารํ, ติกฺขตฺตุํ โส มหายโส;

ถูปารามมฺหิ ถูปญฺจ, เหมปฏฺเฏน ฉาทยิฯ

[129]

กตฺวา ตตฺเถว ปาสาทํ, ภิกฺขุสงฺฆํ นิวาสิย;

วิหาเร นคเร เจว, ปฏิสงฺขาสิ ชิณฺณกํฯ

[130]

กทมฺพนทียา’กาสิ, นิชฺฌรํ ถิรพนฺธนํ;

มริยาทํ ปวฑฺเฒสิ, วาปิยํ โส มเยตฺติยํฯ

[131]

ตตฺถ นิทฺธมนํจา’กา, อนุวสฺสมฺปิ ภูมิโป;

จีวรตฺถํ สุวตฺถานิ, สุสณฺหานิ จ ทาปยิฯ

[132]

ทุพฺภิกฺเข ทานสาลาโย, กาเรตฺวา สพฺพปาณินํ;

มหาทานํ ปวตฺเตสิ, มหาปาฬิญฺจ วฑฺฒยิฯ

[133]

ทธิภตฺตญฺจ ทาเปสิ, นิกายตฺตยวาสินํ;

นิจฺจํ ทุคฺคตภตฺตญฺจ, ยาคุญฺเจว สขชฺชกํฯ

[134]

เอวมาทีนิ ปุญฺญานิ, กตฺวา โสวคฺคิยานิ โส;

เอกาทสหิ วสฺเสหิ, คโต เทวสหพฺยตํฯ

[135]

ตสฺเสกาทสวสฺเสสุ, วิสฺสฏฺฐํ โสณฺณเมว ตุ;

อหุ สตสหสฺสานํ, ตโย ทสหิ สมฺมิตํฯ

[136]

สุทุชฺชยํ ปณฺฑุนราธิราช,

เมโกปโร โรหณมุคฺคทุคฺคํ;

กตฺวา’ปิ เอเต สวเส นรินฺทา,

สยํ วสํ มจฺจุมุปาคมิํสุฯ

สุชนปฺปสาท สํเวคตฺถาย กเต มหาวํเส

ราชทฺวยทีปโน นาม

เอกูนปญฺญาสติโม ปริจฺเฉโทฯ

ปญฺญาสติม ปริจฺเฉท