ปญฺจราชโก
[1]
อจฺจเย ปิตุโน ราชา, อุปราชา อโหสิ โส;
สมตฺโถ สกฺกุมิตฺตานํ, กาตุํ นิคฺคห สํคเหฯ
[2]
เสนา นามสิ สปฺปญฺญา, มเหสี ตสฺส ราชิโน;
ขุทฺทปุตฺตา ปียา’ตีว, รญฺโญ กลฺยาณทสฺสนาฯ
[3]
อทาสิ ยุวราชตฺตํ, เชฏฺฐปุตฺตสฺส อตฺตโน;
อาทิปาเท’ปเรกาสิ, ราชินีปิ จ ธีตโรฯ
[4]
ทตฺวา ฐานนฺตรํ ราชา, เตสํ เตสํ ยถารหํ;
ชนํ สงฺคหวตฺถูหิ, สงฺคเหสิ จตูหิปิฯ
[5]
อถ เกนาปิ โส คนฺตฺวา, เหตุนา มณิหีรกํ;
วสนฺโต กิร อสฺโสสิ, ปจฺจนฺโต กุปิโต อิติฯ
[6]
ตโต เสนาปติญฺเจว, เชฏฺฐปุตฺตญฺจ อตฺตโน;
คนฺตฺวา สาเธถ ตํ เทส-มีติ เปเสสิ สชฺชุกํฯ
[7]
เตสุ ตตฺโถปยาเตสุ, ปิสุนา เภทจินฺตกา;
วตฺวา ยํกิญฺจิ ภินฺทิํสุ, เต อุโภปิ นราธิเปฯ
[8]