ทสาปิเต ราชวรา สโภคา,
อุปาคมุํ มจฺจุมุขํ สโภวา;
อนิจฺจตํ โภควโต ธเน จ,
ทิสฺวา สปญฺโญ วิภวํ อิจฺเฉฯ
สุชนปฺปสาทสํเวคตฺถาย กเต มหาวํเส
ทสราชโก นาม
อฏฺฐติํสติเอมา ปริจฺเฉโทฯ
เอกูนจตฺตาลีสติม ปริจฺเฉท
ราชทฺวยทีปโน
[1]
ตโต กสฺสปนาโม โส, ปาปโก นรปาลโก;
อสฺส โค ปญฺจสูทญฺจ, เปสยิตฺวาน ภาติกํฯ
[2]
มาราเปตุํ อสกฺโกนฺโต, ภีโต สีหคิริํ คโต;
ทุราโรหํ มนุสฺเสหิ, โสธาเปตฺวา สมนฺตโตฯ
[3]
ปากาเรน ปริกฺขิปฺป, สีหากาเรน การยิ;
ตตฺถ นิสฺเสณิ เคหานิ, เตน ตํ นามโก อหูฯ
[4]
สํหริตฺวา ธนํ ตตฺถ, นิทหิตฺวา สุโคปิตํ;
อตฺตโน นิหิตานํ โส, รกฺขํ ทตฺวา ตหิํ ตหิํฯ
[5]
กตฺวา ราชฆรํ ตตฺถ, ทสฺสเนยฺยํ มโนรมํ;
ทุติยาลกมนฺทํว, กุเวโรว ตหิํ วสิฯ
[6]
มิคาโร นาม กาเรสิ, เสนาปติ สนามกํ;
ปริเวณํ ตถาเคห-มภิเสกชินิสฺส จฯ
[7]
ตสฺสาภิเสกํ ยาจิตฺวา, สิลาสมฺพุทฺธโต’ธิรํ;
อลทฺธาสามิ โน รชฺเช, ชานิสฺสามีติ สณฺฐหิฯ
[8]
หุตฺวา วิปฺปฏิสารี โส, อตฺตนา กตกมฺมนา;
มุจฺจิสฺสามิ กตํ นุ’ติ, ปุญฺญํ กาสิ อนปฺปกํฯ
[9]
มหา วตฺถุนิ กาเรสิ, ทฺวาเรสุ นครสฺส โส;
อมฺพุยฺยาเน จ กาเรสิ, ทีเป โยชน โยชเนฯ
[10]
อิสฺสรสมณารามํ, กาเรตฺวา ปุพฺพวตฺถุโต;
อธิกํ โภคคาเม จ, อธิกํ ตสฺส ทาปยิฯ
[11]
โพธิ อุปฺปลวณฺณา จ, ตสฺสาสุํ ธีตโร ทุเว;
วิหารสฺส’สฺส กาเรสิ, นามํ ตาสญฺจ อตฺตโนฯ
[12]
เทนฺเต ตสฺมิํ น อิจฺฉิํสุ, สมณา เถรวาทิโน;
‘‘ปิตุฆาติสฺส กมฺม’’นฺติ, โลกคารยฺห ภีรุโนฯ
[13]
ทาตุกาโมส เตสํ’ว, สมฺพุทฺธ ปฏิมาย’ทา;
ภิกฺขเว อธิวาเสสุํ, โภโค โน สตฺถุโน อิติฯ
[14]
กถา นิยฺยนฺติ อุยฺยาเน, สมีเป ปพฺพตสฺส โส;
การาเปสิ วิหารํ โส, เตสํ นาโม ตโต อหุฯ
[15]
อทา ธมฺมรุจินํ ตํ, สมฺปตฺต จตุปจฺจยํ;
วิหารญฺเจว อุยฺยานํ, ทิสาภาคมฺหิ อุตฺตเรฯ
[16]
ภตฺตํ สนีรปกฺกํ โส, ภุญฺชิตฺวา ทินฺนมิตฺถิยา;
สปฺปิยุตฺตํ มนุญฺเญหิ, สูเปหิ อภิสงฺขตํฯ
[17]
มนุญฺญมิทมยฺยานํ, ทสฺสเมวนฺติ ตาทิสํ;
ภตฺตํ ปาทาสิ ภิกฺขูนํ, สพฺเพสญฺจ สจีวรํฯ
[18]
อุโปสถมธิฏฺฐาสิ, อปฺปมญฺญญฺจ ภาวยิ,
สมาทิยิ ธุตงฺเค จ, ลิขาเปสิ จ โปตฺถเกฯ
[19]
ปฏิมาทาน สาลาทิํ, การาเปสิ อนปฺปกํ;
ภิโต โส ปรโลกมฺหา, โมคฺคลฺลานา จ วตฺตติฯ
[20]
ตโต อฏฺฐารเส วสฺเส, โมคฺคลฺลาโน มหาภโฏ;
อาเทเสน นิคณฺฐานํ, ทฺวาทสคฺคสหาย วาฯ
[21]
ชมฺพุทีปา อิธาคมฺม, เทเส อมฺพฏฺฐโกลเก;
กุฬารี นาเม พนฺธิตฺถ, วิหาเร พลสญฺจยํฯ
[22]
ราชา สุตฺวา คเหตฺวา ตํ, ภญฺชิสฺสามิติ นิกฺขมิ;
เนมิตฺเตหิ น สกฺกาติ, วทนฺเตปิ มหาพโลฯ
[23]
โมคฺคลฺลาโนปิ สนฺนทฺธ พโล สูรสหาย วา;
คจฺฉนฺโต สุรสงฺคามํ, เทโว วิย สุชมฺปติฯ
[24]
อญฺญมญฺญํ อุปาคมฺม, ภินฺนเวลาว สาครา;
อารภิํสุ มหายุทฺธํ, พลกายา อุโภปิ เตฯ
[25]
กสฺสโป ปุรโต ทิสฺวา, มหนฺตํ กทฺทมาสยํ;
คนฺตุมญฺเญน มคฺเคน, ปริวตฺเตสิ ทนฺตินํฯ
[26]
ทิสฺวา ตํ สามิโกโน’ยํ, ปลายติ ภเณ อิติ;
พลกาโย ปภิชฺชิตฺถ, ‘‘ทิฏฺฐํ ปิฐ’’นฺติ โฆสยุํฯ
[27]
โมคฺคลาน พลาราชา, เฉตฺวา นิกรเณน โส;
สีสํ อุกฺขิปิยา’กาสํ, ฉุริกํ โกสิยํ ขิปิฯ
[28]
กตฺวา’ฬาหน กิจฺจํ โส, ตสฺส กมฺเม ปสีทิย;
สพฺพํโส ธนมาทาย, อาคญฺฉิ นครํ วรํฯ
[29]
ภิกฺขู สุตฺวา ปวตฺติํ ตํ, สุนิวตฺถา สุปารุตา;
สมฺมชฺชิตฺวา วิหารญฺจ, อฏฺฐํสุ ปฏิปาฏิยาฯ
[30]
มหาเมฆวนํ ปตฺวา, เทวราชาว นนฺทนํ;
มหาเสน นิวตฺเตตฺวา, หตฺถิปาการโต พหิฯ
[31]
อุปสงฺกมฺม วนฺทิตฺวา, สงฺเฆ ตสฺมิํ ปสีทิย;
ฉตฺตตฺเตน สงฺฆํ ปูเชสิ, สงฺโฆ ตสฺเสว ตํ อทาฯ
[32]
ตํ ฐานํ ฉตฺตวฑฺฒีติ, โวหริํสุ ตหิํ กตํ;
ปริเวณมฺปิ ตํ นามํ, อโหสิ ปุรมาคโตฯ
[33]
วิหาเร ทฺเวปิ คนฺตฺวาน, สงฺฆํ ตตฺถา’ภิวนฺทิย;
ปาปุณิตฺวา มหารชฺชํ, โลกํ ธมฺเมน ปาลยิฯ
[34]
กุทฺโธ นีหริ ทาฐํโส, ฆาตกํ ปิตุโน มม;
อนุวตฺติตฺวา มจฺจาติ, เตน รกฺขส นาม วาฯ
[35]
อติเรกสหสฺสํ โส, อมจฺจานํ วินาสยิ;
กณฺณนาสาทิ เฉเทสิ, ปพฺพาเชสิ ตถา พหูฯ
[36]
ตโต สุตฺวาน สทฺธมฺม-มุปสนฺโน สุมานโส;
มหาทานํ ปวตฺเตสิ, เมโฆ วิย มหีตเลฯ
[37]
ผุสฺสปุณฺณมียํ ทาน-มนุวสฺสํ ปวตฺตยิ;
ตโต ปฏฺฐาย ตํ ทานํ, ทีเป อชฺชาปิ วตฺตติฯ
[38]
โสปิ สารถิโก ลาช-ทายโก ปิตุราชิโน;
อาเนตฺวา ปิตุสนฺเท สํ, โมคฺคลฺลานสฺส ทสฺสยิฯ
[39]
ตํ ทิสฺวา ปริเทวิตฺวา, ปิตุโน เปม มตฺตนี;
วณฺเณตฺวา ตสฺส ปาทาสิ, ทฺวารนายกตํ วิภูฯ
[40]
เสนาปติ มิคาโรหิ, นิเวเทตฺวา ยถา วิธิํ;
อภิเสก ชินสฺสา’กา, อภิเสกํ ยถารุจิํฯ
[41]
สีหา’จเล ทฬฺหนามํ, ทาฐา โกณฺฑญฺญกมฺปิ จ;
วิหารํ ธมฺมรุจินํ, สาคลินญฺจ ทาปยิฯ
[42]
ปพฺพตนฺตุ วิหารํโส, กตฺวา เถรสฺส ทาปยิ;
มหานามสนามสฺส, ทีฆสณฺฑ วิหารเกฯ
[43]
ราชินินามกญฺเจว, กตฺวา ภิกฺขุนุปสฺสยํ;
อทา สาคลิกานํ โส, ภิกฺขุนีนํ มหามติฯ
[44]
ลมฺพกณฺณกโคตฺโตปิ, ทาฐา ปภุติ นามโก;
กสฺสปสฺส อุปฐาเน, โกจิ นิพฺพินฺน มานโสฯ
[45]
คนฺตา เม เรลิยํ วคฺคํ,
วาสํ ตตฺเถว กปฺปยิ;
อโหสิ ปุตฺโต ตสฺเสโก,
สิลากา โลติ ปิสฺสุโตฯ
[46]
โสปิ กสฺสปโต ภีโต, ญาตเกน สห’ตฺตโน;
โมคฺคลฺลาเนน คนฺตฺวาน, ชมฺพุทีปตลํ อิโตฯ
[47]
โพธิปณฺฑวิหารมฺปิ, ปพฺพชฺชํ สมุปาคโต;
กโรนฺโต สงฺฆกิจฺจานิ, สาทโร โส สุเปสโลฯ
[48]
อมฺมํ สงฺฆสฺส ปาทาสิ, สงฺโฆ ตสฺมิํ ปสีทิย;
อาห’มฺพ สามเณโร’ติ, เตน ตํ นามโก อหุฯ
[49]
โส เกสธาตุวํสมฺหิ, วุตฺเตน วิธินา ตโต;
เกสธาตุํ ลภิตฺวาน, ตสฺส รชฺเช อิธา’นยิฯ
[50]
ตสฺส กตฺวาน สกฺการํ, คเหตฺวา เกส ธาตุโย;
มหคฺเฆ นิทหิตฺวาน, กรณฺเฑ ผลิกุมฺภวฺเหฯ
[51]
ทีปงฺกรสฺส นาถสฺส, ปฏิมาย ฆเร วเร;
วฑฺเฒตฺวา ปริหาเรน, มหาปูชํ ปวตฺตยิฯ
[52]
มาตุลํ ภริยญฺจ’สฺส, กตฺวา โสวณฺณยํ ตหิํ;
ฐเปสิ ปฏิมาโย จ, อสฺส พิมฺพญฺจ จารุกํฯ
[53]
เกสธาตุกรณฺฑญฺจ , ฉตฺตํ รตนมณฺฑปํ;
สาวกคฺคยุํคํ วาฬ-พีชนิญฺจ สการยิฯ
[54]
ปริหารญฺจ ตสฺส’ทา, ราชา อธิกมตฺตโน;
สิลากาฬ มสิคฺคาหํ, กตฺวา รกฺขาย โยชยิฯ
[55]
อสิคฺคาหสิลากาโฬ, อิติ เตนา’สิ วิสฺสุโต;
ภคินิญฺจ’สฺส ปาทาสิ, สทฺธิํ โภเคน ภูมิโปฯ
[56]
วุตฺโต’ยมติ สงฺเขโป, วิตฺถาโร ปน สพฺพโส;
เกสธาตุกวํสมฺหา, คเหตพฺโพ วิภาวินาฯ
[57]
พนฺธิตฺวา สาครา รกฺขํ, ทีปญฺจ กาสินิพฺภยํ;
ธมฺมกมฺมน โสเธสิ, สธมฺมํ ชินสาสนํฯ
[58]
เสนาปติส นามํ’กา, ปธานฆร มุตฺตโร;
กตฺวา’ฏฺฐารสเม วสฺเส, โส ปุญฺญานิ ขยํ คโตฯ
[59]
กสฺสปโต ชิโต อติพลิ ปุญฺญกฺขเย สงฺขเต;
เชตุํ โน วิสหิตฺถ มจฺจุมุปคํ โส เยวทาโสวิย;
ตสฺมา มจฺจุพลํ นิหจฺจ สุขิโน เหสฺสนฺติ เมธาวิโน;
นิพฺพานํ ปรมจฺจุตํ สิวปทํ ปตฺตพฺพมตฺตญฺญุนาฯ
สุชนปฺปสาท สํเวคตฺถาย กเต มหาวํเส
ราชทฺวยทีปโน นาม
เอกูนจตฺตาลีสติโม ปริจฺเฉโทฯ
จตฺตาลีสติม ปริจฺเฉท
อฏฺฐราชโก
[1]
ตสฺสจฺจเย กุมาราทิ-ธาตุเสโนติ วิสฺสุโต;
อหุ ตสฺส สุโต ราชา, เทวรูโป มหาพโลฯ
[2]
การิเต ปิตรา’กาสิ, วิหาเร นวกมฺมกํ;
กาเรตฺวา ธมฺมสงฺคีติํ ปริโสเธติ สาสนํฯ
[3]