นิวิฏฺฐเปโม ตสฺมิํ โส, ราชา’ติ ตุริโต ตโต;
ปกฺโกสาเปสิ ตํ โส ตุ, สนฺตวุตฺตี อุปาคมิฯ
[65]
นิสิท ตาตา’นุรูเป, อาสเน ตา’ห ภูปติ;
อทิสฺวา ภิกฺขุมญฺญํ โส, สีหาสนมุปาคมิฯ
[66]
ตสฺมิํ ปลฺลงฺกมายาเต, ราชาอิติ วิจินฺตยิ;
อชฺชา’ยํ สามเณโร เม, ฆเร เหสฺสติ สามิโกฯ
[67]
อาลมฺพิตฺวา กรํ รญฺโญ, โส ปลฺลงฺเก สมารุหิ;
นิสีทิ ราชปลฺลงฺเก, เสตจฺฉตฺตสฺส เหฏฺฐโตฯ
[68]
ทิสฺวา ตถา นิสินฺนํ ตํ, อโสโก โส มหีปติ;
สมฺภาเวตฺวาน คุณโต, ตุฏฺโฐ’ตีว ตทา อหุฯ
[69]
อตฺตโน ปฏิยตฺเตน, ขชฺชโภชฺเชน ตปฺปิย;
สมฺพุทฺธเทสิตํ ธมฺมํ, สามเณรมปุจฺฉิตํฯ
[70]
ตสฺส’ปฺปมาทวคฺคํ โส, สามเณโร อภาสถ;
ตํ สุตฺวา ภูมิปาโล โส, ปสนฺโน ชินสาสเนฯ
[71]
อฏฺฐ เต นิจฺจภตฺตานิ, ทมฺมิ ตาตา’ติ อาห ตํ;
อุปชฺฌายสฺส เม ราช, ตานิ ทมฺมีติ อาห โสฯ
[72]
ปุน อฏฺฐสุ ทินฺเนสุ, ตาน’ทา จริยสฺส โส;
ปุน อฏฺฐสุ ทินฺเนสุ, ภิกฺขุสงฺฆสฺส ตาน’ทาฯ
[73]
ปุน อฏฺฐสุ ทินฺเนสุ, อธิวาเสสิ พุทฺธิมา;
ทฺวตฺติํสภิกฺขู อาทาย, ทุติยทิวเส คโตฯ
[74]
สหตฺถา ตปฺปิโต รญฺญา, ธมฺมํ เทสิย ภูปติํ;
สรเณสุ จ สีเลสุ, ฐเปสิ สมหาชนํฯ
นิคฺโรธสามเณรทสฺสนํ
สาสนปฺปเวส
[75]
ตโต ราชา ปสนฺโน โส, ทิคุเณน ทิเน ทิเน;
ภิกฺขู สฏฺฐิสหสฺสานิ, อนุปุพฺเพนุ’ปฐหิฯ
[76]
ตตฺถิยานํ สหสฺสานิ, นิกฑฺฒิตฺวาน สฏฺฐิโส;
สฏฺฐิภิกฺขุสหสฺสานิ, ฆเร นิจฺจมโภชยิฯ
[77]
สฏฺฐิภิกฺขุสหสฺสานิ , โภเชตุํ ตุริโต หิ โส;
ปฏิยาทาปยิตฺวาน, ขชฺชโภชฺชํ มหารหํฯ
[78]
ภูสาเปตฺวาน นครํ, คนฺตฺวา สงฺฆํ นิมนฺติย;
ฆรํ เนตฺวาน โภเชตฺวา, ทตฺวา สามณกํ พหุํฯ
[79]
สตฺถารา เทสิโต ธมฺโม, กิตฺตโกติ อปุจฺฉถ;
พฺยากาสิ โมคฺคลิปุตฺโต, ติสฺสตฺเถโร ตทสฺสตํฯ
[80]
สุตฺวาน จตุราสีติ, ธมฺมกฺขนฺธา’ติ โส’พฺรวิ;
ปูเชมิ เต’หํ ปจฺเจกํ, วิหาเรนา’ติ ภูปติฯ
[81]
ทตฺวา ตทา ฉนฺนวุติ-ธนโกฏิํ มหีปติ;
ปุเรสุ จตุราสีติ-สหสฺเสสุ มหีตเลฯ
[82]
ตตฺถ ตตฺเถ’ว ราชูหิ, วิหาเร อารภาปยิ;
สยํ อโสการามํ ตุ, การาเปตุํ สมารภิฯ
[83]
รตนตฺตยนิคฺโรธ-คิลานานนฺติ สาสเน;
ปจฺเจกํ สตสหสฺสํ, โส ทาเปสิ ทิเน ทิเนฯ
[84]
ธเนน พุทฺธทินฺเนน, ถูปปูชา อเนกธา;
อเนเกสุ วิหาเรสุ, อเนเก อกรุํ สทาฯ
[85]
ธเนน ธมฺมทินฺเนน, ปจฺจเย จตุโร วเร;
ธมฺมธรานํ ภิกฺขูนํ, อุปเนตุํ สทา นราฯ
[86]
อโนตตฺโตทกาเชสุ, สงฺฆสฺส จตุโร อทา;
เต ปิฏกานํ เถรานํ, สฏฺฐิเย’กํ ทิเน ทิเนฯ
[87]
เอกํ อสนฺธิมิตฺตาย, เทวิยา ตุ อทาปยิ;
สยํ ปน ทุเวเยว, ปริภุญฺชิ มหีปติฯ
[88]
สฏฺฐิภิกฺขุสหสฺสานํ, ทนฺตกฏฺฐํ ทิเน ทิเน;
โสฬสิตฺถิสหสฺสานํ, อทา นาคลตาวฺหยํฯ
[89]
อเถกทิวสํ ราชา, จตุสมฺพุทฺธทสฺสินํ;
กปฺปายุกํ มหากาฬํ, นาคราชํ มหิทฺธิกํฯ
[90]
สุณิตฺวา ตมาเนตุํ, โสณฺฑสงฺขลิพนฺธนํ;
เปสยิตฺวา ตมาเนตฺวา, เสตจฺฉตฺตสฺส เหฏฺฐโตฯ
[91]
ปลฺลงฺกมฺหิ นิสีเทตฺวา, นานาปุปฺเผหิ ปูชิย;
โสฬสิตฺถิสหสฺเสหิ, ปริวาริย อพฺรวิฯ
[92]
สทฺธมฺมจกฺกวตฺติสฺส , สมฺพุทฺธสฺส มเหสิโน;
รูปํ อนนฺตญาณสฺส, ทสฺเสหิ มม โภ อิติฯ
[93]
ทฺวตฺติํสลกฺขณูเปตํ, อสีติพฺยญฺชนุชฺชลํ;
พฺยามปฺปภาปริกฺขิตฺตํ, เกตุมาลาหิ โสภิตํฯ
[94]
นิมฺมาสิ นาคราชา โส, พุทฺธรูปํ มโนหรํ;
ตํ ทิสฺวา’ติ ปสาทสฺส, วิมฺหยสฺส จ ปูริโตฯ
[95]
เอเตน นิมฺมิตํ รูปํ, อีทิสํ กีทิสํ นุโข;
ตถาคตสฺส รูปนฺติ, อาสิ ปิตุนฺนตุนฺนโตฯ
[96]
อกฺขิปูชนฺติ สญฺญาตํ, ตํ สตฺตาหํ นิรนฺตรํ;
มหามหํ มหาราช, การาเปสิ มหิทฺธิโกฯ
[97]
เอวํ มหานุภาโว จ, สทฺโธ จาปิ มหีปติ;
เถโร จ โมคฺคลิปุตฺโต, ทิฏฺฐา ปุพฺเพ วสีหิ เตฯ
สาสนปฺปเวโส นิฏฺฐิโตฯ
โมคฺคลิปุตฺตติสฺสเถราทโย
[98]
ทุติเย สงฺคเห เถรา, เปกฺขนฺตา’นาคเตหิ เต;
สาสโนปทฺทวํ ตสฺส, รญฺโญ กาลมฺหิ อทฺทสุํฯ
[99]
เปกฺขานฺตา สกเล โลเก, ตทุปทฺทวฆาตกํ;
ติสฺสพฺรหฺมานมทฺทกฺขุํ, อจิรฏฺฐายิ ชีวิตํฯ
[100]
เตสํ สมุปสงฺกมฺม, อายาจิํสุ มหาปติํ;
มนุสฺเสสุ’ปปชฺชิตฺวา, ตทุปทฺทวฆาตนํฯ
[101]
อทา ปฏิญฺญํ เตสํ โส, สาสนุชฺโชตนตฺถิโก;
สิคฺควํ จณฺฑวชฺชิญฺจ อโวจุํ ทหเร ยติฯ
[102]
อฏฺฐารสาทิกา วสฺส-สตา อุปริ เหสฺสติ;
อุปทฺทโว สาสนสฺส, น สมฺโภสฺสาม ตํ มยํฯ
[103]
อิมํ ตุมฺหา’ธิกรณํ, โนปคญฺฉิตฺถ ภิกฺขโว;
ทณฺฑกมฺมารหา ตสฺมา, ทณฺฑกมฺมปทญฺหิ โวฯ
[104]
สาสนุชฺโชตนตฺถาย, ติสฺสพฺรหฺมา มหาปติ;
โมคฺคลิพฺราหฺมณฆเร, ปฏิสนฺธิํ คเหสฺสติฯ
[105]