หานิํ ทิสฺวาน สตฺตานํ, ตทา ภิกฺขู สมาคตา;

จิรฏฺฐิตตฺถํ ธมฺมสฺส, โปตฺถเกสุ ลิขาปยุํฯ

[104]

วฏฺฏคามณิ อภโย, ราชา รชฺชมการยิ;

อิติ ทฺวาทสวสฺสานิ, ปญฺจมาเสสุ อาทิโตฯ

[105]

อิตี ปรหิต มตฺตโน หิตญฺจ,

ปฏิลภิยิสฺสริยํ กโรติ ปญฺโญ;

วิปุลมปิ กุพุทฺธิลทฺธโภวํ,

อุภยหิตํ น กโรติ โภคลุทฺโธ’ติฯ

สุชนปฺปสาทสํเวคตฺถาย กเต มหาวํเส

ทสราชโก นาม

เตตฺติํสติโม ปริจฺเฉโทฯ

จตุตฺติํสติม ปริจฺเฉท

เอกาทสราชทีปโน

[1]

ตทจฺจเย มหาจูลี-มหาติสฺโส อการยิ;

รชฺชํ จุทฺทสวสฺสานิ, ธมฺเมน จ สเมน จฯ

[2]

สหตฺเถน กตํ ทานํ, โส สุตฺวาน มหปฺผลํ;

ปฐเมเยว วสฺสมฺหิ, คนฺตฺวา อญฺญาตเวสวาฯ

[3]

กตฺวาน สาลิลวนํ, ลทฺธาย ภติยา ตโต;

ปิณฺฑปาตํ มหาสุมฺม-เถรสฺสา’ทา มหีปติฯ

[4]

โสณฺณคิริมฺหิ ปุน โส, ตีณิวสฺสานิ ขตฺติโย;

คุฬยนฺตมฺหิ กตฺวาน, ภติํลทฺธา คุเฬ ตโตฯ

[5]

เต คุเฬ อาหราเปตฺวา, ปุรํ อาคมฺม ภูปติ;

ภิกฺขุสงฺฆสฺส ปาทาสิ, มหาทานํ มหีปติฯ

[6]

ติํสภิกฺขุสหสฺสสฺส, อทา อจฺฉาทนานิ จ;

ทฺวาทสนฺนํ สหสฺสานํ, ภิกฺขูนีนํ ตเถว จฯ

[7]

การยิตฺวา มหีปาโล, วิหารํ สุปฺปติฏฺฐิตํ;

สฏฺฐิภิกฺขุ สหสฺสสฺส, ติจีวรมทาปยิฯ

[8]

ติํส สหสฺส สงฺขานํ, ภิกฺขุนีนญฺจ ทาปยิ;

มณฺฑวาปิ วิหารํ โส, ตถา อภยคลฺลกํฯ

[9]

วงฺคุปฏฺฏงฺคคลฺลญฺจ, ทีฆพาหุกคลฺลกํ;

วาลคาม วิหารญฺจ, ราชา โสเยว การยิฯ

[10]

เอวํ สทฺธาย โส ราชา, กตฺวา ปุญฺญานิเนกธา;

จตุทฺทสนฺนํ วสฺสานํ, อจฺจเยน ทิวํ อคาฯ

[11]

วฏฺฏคามณิโน ปุตฺโต, โจรนาโคติ วิสฺสุโต;

มหาจูฬิสฺสรชฺชมฺหิ, โจโร หุตฺวา จริตทาฯ

[12]

มหาจูเฬ อุปรเต, รชฺชํ การยิ อาคโต;

อตฺตโน โจรกาเล โส, นิวาสํ เยสุนาลภิฯ

[13]

อฏฺฐรสวิหาเร เต, วิทฺธํสาเปสิ ทุมฺมติ;

รชฺชํ ทฺวาทสวสฺสานิ, โจรนาโค อการยิฯ

[14]

โลกนฺตริก นิรยํ, ปาโปโสอุปปชฺชถ;

ตทจฺจเย มหาจูฬฺหิ-รญฺโญ ปุตฺโต อการยิฯ

[15]

รชฺชํ ตีเณว วสฺสานิ, ราชาติสฺโส’ติ วิสฺสุโต;

โจรนาคสฺส เทวีตุ, วีสมํ วีสมานุลาฯ

[16]

วีสํ ทตฺวาน มาเรสิ, พลตฺเถรตฺตมานสา;

ตสฺมิํเยวพลตฺเถสา, อนุลารตฺตมานสาฯ

[17]

ติสฺสํ วีเสนฆาเตตฺวา, ตสฺส รชฺชมทาสิสา;

สีโว นาม พลตฺโถโส, เชฏฺฐโทวาริโก ตหิํฯ

[18]

กตฺวา มเหสิํ อนุลํ, วสฺสํ มาสทฺวยา’จิกํ;

รชฺชํ กาเรสิ นคเร, วฏุเก ทมิเฬ’นุลาฯ

[19]

รตฺตา วีเสน ตํ หนฺตฺวา, วฏุเก รชฺชมปฺปยิ;

วฏุโก ทมิโฬ โส หิ, ปุเร นครวฑฺฒกีฯ

[20]

มเหสิํ อนุลํ กตฺวา, วสฺสํ มาสทฺวยาธิกํ;

รชฺชํ กาเรสิ นคเร, อนุลา ตตฺถ อาคตํฯ

[21]

ปสฺสิตฺวา ทารุภติกํ, ตสฺมิํ สารตฺตมานสา;

หนฺตฺวา วิเสน วฏุกํ, ตสฺส รชฺชํ สมปฺปยิฯ

[22]

ทารุภติกติสฺโส โส, มเหสิํ กริยานุลํ;

เอกมาสาธิกํ วสฺสํ, ปุเร รชฺชมการยิฯ

[23]

กาเรสิ โส โปกฺขรณิํ, มหาเมฆวเน ลหุํ;

นิลีเย นาม ทมิเฬ, สา ปุโรหิตพฺราหฺมเณฯ

[24]

ราเคน รตฺตา อนุลา, เตน สํวาสกามินี;

ทารุภติกติสฺสํตํ, วีสํ ทตฺวาน ฆาติยฯ

[25]

นิลียสฺส อทา รชฺชํ, โสปิ นิลียพฺราหฺมโณ;

ตํ มเหสิํ กริตฺวาน, นิจฺจํ ตาย อุปฏฺฐิโตฯ

[26]

รชฺชํ กาเรสิ ฉมฺมาสํ, อนุราธปุเร อิธ;

ทฺวตฺติํสาย พลตฺเถหิ, วตฺถุกามา ยถารุจิํฯ

[27]

วีเสน ตํ ฆาตยิตฺวา, นิลียํ ขตฺติยานุลา;

รชฺชํ สา อนุลาเทวี, จตุมาสมการยิฯ

[28]

มหาจูฬิกราชสฺส, ปุตฺโต ทุติยโก ปน;

กูฏกณฺณติสฺโส นาม, ภีโต โส’นุลเทวิยาฯ

[29]

ปลายิตฺวา ปพฺพชิตฺวา, กาเล ปตฺตพโล อิธ;

อาคนฺตฺวา ฆาตยิตฺวา, ตํ อนุลํ ทุฏฺฐมานสํฯ

[30]

รชฺชํ กาเรสิ ทฺวาวีสํ, วสฺสานิ มนุชาธิโป;

มหาอุโปสถาคารํ, อกา เจติยปพฺพเตฯ

[31]

ฆรสฺส ตสฺส ปุรโต, สิลาถูปมการยิ;

โพธิํ โรเปสิ ตตฺเถว, โสว เจติเยปพฺพเตฯ

[32]

เปลคามวิหารญฺจ, อนฺตรคงฺคาย การยิ;

ตตฺเถว วณฺณกํ นาม, มหามาติกเมว จฯ

[33]

อมฺพทุคฺคมหาวาปิํ, ภโยลุปฺปลเมว จ;

สตฺตหตฺถุจฺจปาการํ, ปุรสฺส ปริขํ ตถาฯ

[34]

มหาวตฺถุมฺหิ อนุลํ, ฌาปยิตฺวา อสญฺญตํ;

อปนีย ตโต โถกํ, มหาวตฺถุมการยิฯ

[35]

ปทุมสฺสรวนุยฺยานํ, นคเรเยว การยิ;

มตา’สฺส ทนฺเต โธวิตฺวา, ปพฺพชิ ชินสาสเนฯ

[36]

กุลสนฺตเก ฆรฏฺฐาเน, มาตุภิกฺขุนุปสฺสยํ;

กาเรสิ ทนฺตเคหนฺติ, วิสฺสโต อาสิ เตน โสฯ

[37]

ตทจฺจเย ตสฺส ปุตฺโต, นามโก ภาติกาภโย;

อฏฺฐวีสติวสฺสานิ, รชฺชํ กาเรสิ ขตฺติโยฯ

[38]

มหาทาฏฺฐิกราชสฺส, ภาติกตฺตามหีปติ;

ทีเป ‘‘ภาติกราชา’’ติ, ปากโฏ อาสิ ธมฺมิโกฯ

[39]

กาเรสิ โลหปาสาเท, ปฏิสงฺขารเมตฺถโส;

มหาถูเป เวทิกา ทฺเว, ถูปวฺเห’โปสถวฺหยํฯ

[40]

อตฺตโน พลิมุชฺฌิตฺวา, นครสฺส สมนฺตโต;

โรปาเปตฺวา โยชนมฺหิ, สุมนาน’ชฺชุกานิ จฯ

[41]

ปาทเวจิกโต ยาว, ธุรจฺฉตฺตานราธิโป;

จตุรงฺคลพหเลน, คนฺเธน อุรุเจติยํฯ

[42]

ลิมฺปาเปตฺวาน ปุปฺผานิ, วณฺเฏหิ ตตฺถ สาธุกํ;

นิเวสิตฺวาน โกเรสิ, ถูปํ มาลาคุโลปมํฯ

[43]

ปุนทฺวงฺคุลพหลาย, มโนสิลาย เจติยํ;

ลิมฺปาเปตฺวาน กาเรสิ, ตเถว กุสุมาจิตํฯ

[44]

ปุน โสปานโต ยาว, ธุรจฺฉตฺตาว เจติยํ;

ปุปฺเผหิ โอกิราเปตฺวา, ฉาเทสิ ปุปฺผราสิโนฯ

[45]

อุฏฺฐาเปตฺวาน ยนฺเตหิ, ชลํ อภยวาปิโต;

ชเลหิ ถูปํ เสวนฺโต, พลปูชมการยิฯ

[46]

สกฏสเตน มุตฺตานํ, สทฺธิํ เตเลน สาธุกํ;

มทฺทาเปตฺวา สุธาปิณฺฑํ, สุธากมฺมมการยิฯ

[47]

ปวาลชาลํ กาเรตฺวา, ตํ ขิปาปิย เจติเย;

โสวณฺณานิ ปทุมานิ, จกฺกมตฺตานิ สนฺธิสุฯ

[48]

ลคฺคาเปตฺวา ตโต มุตฺตา-กลาเป ยาว เหฏฺฐิมา;

ปทุมา’ลมฺพยิตฺวาน, มหาถูปมปูชยิฯ

[49]

คณสชฺฌายสทฺทํ โส, ธาตุคพฺภมฺหิตาทินิ;

สุตฺวา ‘‘อทิสฺวา ตํนา’หํ, วุฏฺฐหิสฺสนฺติ นิจฺฉิโตฯ

[50]

ปาจินาทิกมูลมฺหิ, อนาหาโร นิปชฺชถ;

เถรา ทฺวารํ มาปยิตฺวา, ธาตุคพฺภํ นยิํสุ ตํฯ

[51]

ธาตุคพฺภวิภูติํโส, สพฺพํ ทิสฺวา มหีปติ;

นิกฺขนฺโต ตาทิเสเหว, โปตฺถรูเปหิ ปูชยิฯ

[52]

มธุคนฺเธหิ คนฺเธหิ, ฆเฏหิ สรเสหิ จ;

อญฺชนหริตาเลหิ, ตถามโนสิลาหิ จฯ

[53]

มโนสิลาสุ วสฺเสน, ภสฺสิตฺวา เจติยงฺคเณ;

ฐิตาสุ โคปฺผมตฺตาสุ, รจิเต ปุ’ปฺปเลหิ จฯ

[54]

ถูปงฺคณมฺหิ สกเล, ปุริเต คนฺธกทฺทเม;

จิตฺตกิลญฺชฉิทฺเทสุ, รจิเต ปุ’ปฺปเลหิ จฯ

[55]

วารยิตฺวา วาริมคฺคํ, ตเถว ปุริเต ฆเฏ;

ทีปวฏฺฏิหิ เนกานิ, กตวฏฺฏิสิขาหิ จฯ

[56]

มธุกเตลมฺหิ ตถา, ติลเตเล ตเถว จ;

ตเถว ปฏฺฏวฏฺฏีนํ, สุ พหูหิ สิขาหิ จฯ

[57]

ยถาวุตฺเตหิ เอเตหิ, มหาถูปสฺส ขตฺติโย;

สตฺตกฺขตฺตุํ สตฺตกฺขตฺตุํ, ปูชา’กาสิ วิสุํ วิสุํฯ

[58]

อนุวสฺสญฺจ นิยตํ, สุธามงฺคลมุตฺตมํ;

โพธิสินานปูชา จ, ตเถว อุรุโพธิยาฯ

[59]

มหาเวสาข ปูชา จ, อุฬารา อฏฺฐวีสติ;

จตุราสีติ สหสฺสานิ, ปูชา จ อนุฬาริกาฯ

[60]

วิวิธํ นฏนจฺจญฺจ, นานาตูริยวาทิตํ;

มหาถูเป มหาปูชํ, สทฺธานุนฺโน อการยิฯ

[61]

ทิวสสฺส จ ติกฺขตฺตุํ, พุทฺธุปฺปฏฺฐานมาคมา;

ทฺวิกฺขตฺตุํ, ปุปฺผเภริญฺจ, นิยตํ โส อการยิฯ

[62]

นิยตญฺจนทานญฺจ, ปวารณาทานเมว จ;

เตลผาณิตวตฺถาทิ-ปริกฺขารํ สมณารหํฯ

[63]

พหุํ ปาทาสิ สงฺฆสฺส, เจติยเขตฺตเมว จ;

เจติเย ปริกมฺมตฺถํ, อทาสิ ตตฺถ ขตฺติโยฯ

[64]

สทา ภิกฺขุสหสฺสสฺส, วิหาเร เจติยปพฺพเต;

สลากวตฺตภตฺตญฺจ, โส ทาเปสิ จ ภูปติฯ

[65]

จินฺตามณิมุเจลวฺเห, อุปฏฺฐานตฺตเย จ โส;

ตถา ปทุมฆเร ฉตฺต-ปาสาเท จ มโนรเมฯ

[66]

โภเชนฺโต ปญฺจฐานมฺหิ, ภิกฺขูคนฺถธุเร ยุเต;

ปจฺจเยหิ อุปฏฺฐาสิ, สทา ธมฺเม สคารโวฯ

[67]

โปราณราชนิยาตํ, ยํกิญฺจิ สาสนสฺสิตํ;

อกาสิ ปุญฺญกมฺมํโส, สพฺพํ ภาติกภูปติฯ

[68]

ตสฺส ภาภกราชสฺส, อจฺจเย ตํ กนิฏฺฐโก;

มหาทาฐิมหานาค-นาโม รชฺชมการยิฯ

[69]

ทฺวาทสํเยว วสฺสานิ, นานาปุญฺญปรายโน;

มหาถูปมฺหิ กิญฺชกฺข- ปาสาเณ อตฺถราปยิฯ

[70]

วาลิกามริยาทญฺจ, กาเรสิ วิตฺถตงฺคณํ;

ทีเป สพฺพวิหาเรสุ, ธมฺมาสนมทาปยิฯ

[71]

อมฺพตฺถล มหาถูปํ, การาเปสิ มหีปติ;

จ เยอนิฏฺฐมานมฺหิ, สริตฺวา มุนิโน คุณํฯ

[72]

จชิตฺวาน สกํ ปาณํ, นิปชฺชิตฺวา สยํ ตหิํ;

ฐปยิตฺวา จยํ ตสฺส, นิฏฺฐาเปตฺวาน เจติยํฯ

[73]

จตุทฺวาเร ฐปาเปสิ, จตุโร รตนคฺฆิเก;

สุสิปฺปิเกหิ สุวิภตฺเต, นานารตนโชติเตฯ

[74]

เจติเย ปฏิโมเจตฺวา, นานารตนกญฺจุกํ;

กญฺจน พุพฺพุลญฺเจตฺถ, มุตฺโตลมฺพญฺจ ทาปยิฯ

[75]

เจติย ปพฺพตาวฏฺเฏ, อลงฺกริย โยชนํ;

โยชาเปตฺวา จตุทฺวารํ, สมนฺตา จารุวีถิกํฯ

[76]

วีถิยา อุภโต ปสฺเส, อาปณานิ ปสาริย;

ธชคฺฆิก โต รณานิ, มณฺฑยิตฺวา ตหิํ ตหิํฯ

[77]

ทีปมาลา สมุชฺโชตํ, การยิตฺวา สมนฺตโต;

นฏนจฺจานิ คีตานิ, วาทิตานิ จ การยิฯ

[78]

มคฺเค กทมฺพนทิโต, ยาวเจติย ปพฺพตา;

คนฺตุํ โธเตหิ ปาเทหิ, การยิ’ตฺถรณตฺถตํฯ

[79]

สนจฺจคีตวาเทหิ, สมชฺชมกรุํ ตหิํ;

นครสฺส จตุทฺวาเร, มหา ทานญฺจ ทาปยิฯ

[80]

อกาสิ สกเล ทีเป, ทีปมาลานิรนฺตรํ;

สลิเลปิ สมุทฺทสฺส, สมนฺตา โยชนนฺตเรฯ

[81]

เจติยสฺส มเหเตน, ปูชา สา การิตา สุภา;

คิริภณฺฑา มหาปูชา, อุฬารา วุจฺจเต อิธฯ

[82]

สมาคตานํ ภิกฺขูนํ, ตสฺมิํ ปูชา สมาคเม;

ทานํ อฏฺฐสุ ฐาเนสุ, ฐปาเปตฺวา มหีปติฯ

[83]

ตาฬยิตฺวาน ตตฺรฏฺฐา, อฏฺฐโสวณฺณเภริโย;

จตุวีสสหสฺสานํ, มหาทานํ ปวตฺตยิฯ

[84]

ฉจีวรานิ ปาทาสิ, พนฺธโมกฺขญฺจ การยิ;

จตุทฺวาเรนฺวาปิเตหิ, สทา กมฺมมการยิฯ

[85]

ปุพฺพราชูหิ ฐปิตํ, ภาตรํ ฐปิตํ ตถา;

ปุญฺญกมฺมํ อหาเปตฺวา, สพฺพํ การยิภูปติฯ

[86]

อตฺตานํ เทวิํปุตฺเต ทฺเว, หตฺถิํ อสฺสญฺจ มงฺคลํ;

วาริยนฺโต’ปิ สงฺเฆน, สงฺฆสฺสา’ทาสิ ภูปติฯ

[87]

ฉสต สหสฺสคฺฆกํ, ภิกฺขุสงฺฆสฺส โส อทา;

สตสหสฺสคฺฆนกํ, ภิกฺขูนีนํ คณสฺส ตุฯ

[88]

ทตฺวาน กปฺปิยํ ภณฺฑํ, วิวิธํ วิธิโกวิโท;

อตฺตานญฺจ’ว เสเส จ, สงฺฆโต อภินีหริฯ

[89]

กาลายน กณฺณิกมฺหิ, มณินาค ปพฺพตวฺหยํ;

วิหารญฺจ กฬวฺหยํ, กาเรสิ มนุชาธิโปฯ

[90]

กุพุ พนฺธนทีตีเร, สมุทฺทวิหารเมว จ;

หุวาวกณฺณิเก จูฬ, นคปพฺพตสวฺหยํฯ

[91]

ปาสาณทีปกวฺหมฺหิ, วิหาเร การิเต สยํ;

ปานิยํ อุปนิตสฺส, สามเณรสฺส ขตฺติโยฯ

[92]

อุปจาเร ปสีทิตฺวา, สมนฺตา อฏฺฐโยชนํ;

สงฺฆโภคมทาตสฺส, วิหารสฺส มหีปติฯ

[93]

มณฺฑวาปิ วิหาเร จ, สามเณรสฺส ขตฺติโย;

ตุฏฺโฐ วิหารํ ทาเปสิ, สงฺเฆ โภคํ ตเถว โสฯ

[94]

อิติ วิภวมนปฺปํ สาธุปญฺญา ลภิตฺวา,

วิคตมทปมาทาจตฺต กามปสงฺคา;

อกริยชนเขทํ ปุญฺญกมฺมาภิรามา,

วิปุลวิวิธปุญฺญํ สุปฺปนฺนากโรนฺตีติฯ

สุชนปฺปสาทสํเวคตฺถาย กเต มหาวํเส

เอกาทสราชทีปโน นาม

จตุตฺติํสติโม ปริจฺเฉโทฯ

ปญฺจติํสติมปริจฺเฉท

ทฺวาทสราชโก

[1]

อามณฺฑคามณฺยภโย, มหาทาฐิกอจฺจเย;

นววสฺสนฏฺฐมาเส, รชฺชํ กาเรสิ ตํ สุโตฯ

[2]

ฉตฺตาติ ฉตฺตํ กาเรสิ, มหาถูเป มโนรเม;

ตเถว ปาทเวทิญฺจ, มุทฺธเวทิญฺจ การยิฯ

[3]

ตเถว โลหปาสาท, ถูปวฺเห โปสถวฺหเย;

กาเรสิ กุจฺฉิอาชิรํ, กุจฺฉิอาฬินฺทเมว จฯ

[4]