ตติยธมฺมสํคีติ

[1]

ยา มหากสฺสปาทีหิ , มหาเถเรหิ อาทิโต;

กตา สทฺธมฺม สํคีติ, เถริยา’ติ ปวุจฺจติฯ

[2]

เอโก’ว เถรวาโท โส, อาทิวสฺสสเต อหุ;

อญฺญาจริยวาทาตุ, ตโต โอรํ อชายิสุํฯ

[3]

เตหิ สํคีติกาเรหิ, เถเรหิ ทุติเยหิ เต;

นิคฺคหิตา ปาปภิกฺขู, สพฺเพ ทสสหสฺสกาฯ

[4]

อกํสา’จริยวาทํ เต, มหาสํคีตินามกา;

ตโต โคกุลิกา ชาตา, เอกพฺโพหาริกาปิ จฯ

[5]

โคกุลิเกหิ ปณฺณตฺติ-วาทา พาหุลิกาปิ จ;

เจติยวาทา เตสฺเวว, สมตาสงฺฆิกา ฉ เตฯ

[6]

ปุนาปิ เถรวาเทหิ, มหิํสาสกภิกฺขโว;

วชฺชีปุตฺตกภิกฺขู จ, ทุเว ชาตา อิเม ขลุฯ

[7]

ชาตา’ถ ธมฺมุตฺตริยา, ภทฺรยานิกภิกฺขโว;

ฉนฺนาคารา สมฺมิติยา, วชฺชีปุตฺติยภิกฺขูติฯ

[8]

มหิํสาสกภิกฺขูหิ, ภิกฺขู สพฺพตฺถ วาทิโน;

ธมฺมคุตฺติยภิกฺขู จ, ชาตา ขลุ อิเม ทุเวฯ

[9]

ชาตา สพฺพตฺถิวาทีหิ, กสฺสปิยา ตโต ปน;

ชาตา สงฺกนฺติกา ภิกฺขู, สุตฺตวาทา ตโต ปนฯ

[10]

เถรวาเทน สห เต, โหนฺติ ทฺวาทสิ’เมปิ จ;

ปุพฺเพ วุตฺตฉวาทา จ, อิติ อฏฺฐารสา ขิลาฯ

[11]

สตฺตรสาปิ ทุติเย, ชาตา วสสฺสเต อิติ;

อญฺญาจริยวาทา ตุ, ตโต โอรมชายิสุํฯ

[12]

เหมตา ราชคิริยา, ตถา สิทฺธตฺถิกาปิ จ;

ปุพฺพเสลิยภิกฺขู จ, ตถา อปรเสลิยาฯ

[13]

วาชิริยา ฉ เอเตหิ, ชมฺพุทีปมฺหิ ภินฺนกา;

ธมฺมรุจิ จ สาคลิยา, ลํกาทีปมฺหิ ภินฺนกาฯ

อาจริยกุลวาทกถา นิฏฺฐิตาฯ

ธมฺมาโสกาภิเสก

[14]

กาฬาโสกสฺส ปุตฺตา ตุ, อเหสุํ ทสภาติกา;

พาวีสติํ เต วสฺสานิ, รชฺชํ สมนุสาสิสุํฯ

[15]

นว นนฺทา ตโต อาสุํ, กเมเนว นราธิปา;

เต’ปิ พาวีสวสฺสานิ, รชฺชํ สมนุสาสิสุํฯ

[16]

โมริยานํ ขตฺติยานํ, วํเส ชาตํ สิริธรํ;

จนฺทคุตฺโตติ ปญฺญาตํ, จาณกฺโก พฺราหฺมโณ ตโตฯ

[17]

นวมํ ธนนนฺทํ ตํ, ฆาเตตฺวา จณฺฑโกธสา;

สกเล ชมฺพุทีปสฺมิํ, รชฺเช สมภิสิญฺจี โสฯ

[18]

โส จตุวีสวสฺสานิํ, ราชา รชฺชมการยิ;

ตสฺส ปุตฺโต พินฺทุสาโร, อฏฺฐวีสติ การยิฯ

[19]

พินฺทุสารสุตา อาสุํ, สตํ เอโก จ วิสฺสุตา;

อโสโก อาสิ เตสํ ตุ, ปุญฺญเตโชพลิทฺธิโกฯ

[20]

เวมาติเก ภาตโร โส, หนฺตฺวา เอกูนกํ สตํ;

สกเล ชมฺพุทีปสฺมิํ, เอกรชฺชมปาปุณิฯ

[21]

ชินนิพฺพานโต ปจฺฉา, ปุเร ตสฺสาภิเสกโต;

สาฏฺฐารสํ วสฺสสต-ทฺวยเมวํ วิชานิยฯ

[22]

ปตฺวา จตูหิ วสฺเสหิ, เอกรชฺชํ มหายโส;

ปุเร ปาฏลิปุตฺตสฺมิํ, อตฺตานมภิเสจยิฯ

[23]