ปุญฺญานิ เอวมมลานิ สยญฺจสนฺโต,

กุพฺพนฺติ สพฺพวิภวุตฺตมปตฺติ เหตุ;

กาเรนฺติ จาปิหิ’ขิลา ปริสุทฺธจิตฺตา,

นานาวิเสสชานตา ปริวารเหตู’’ติฯ

สุชนปฺปสาท สํเวคตฺถาย กเต มหาวํเส

ธาตุนิธานํ นาม

เอกติํสติโม ปริจฺเฉโทฯ

ทฺวตฺติํสติม ปริจฺเฉท

ตุสิตปุรคมนํ

[1]

อนิฏฺฐิเต ฉตฺตกมฺเม, สุธากมฺเม จ เจติเย;

มารณนฺติกโรเคน, ราชา อาสิ คิลานโกฯ

[2]

ติสฺสํ ปกฺโกสยิตฺวา โส, กนิฏฺฐํ ทีฆวาปิโต;

‘‘ถูเป อนิฏฺฐิตํ กมฺมํ, นิฏฺฐาเปหีติ อพฺรวิฯ

[3]

ภาตุโน ทุพฺพลตฺตาโส, ตุนฺนวาเยหิ การิย;

กญฺจุกํ สุทฺธวตฺเถหิ, เตน ฉาทิย เจติยํฯ

[4]

จิตฺตกาเรหิ กาเรสิ, เวทิกํ ตตฺถ สาธุกํ;

ปนฺติปุณฺณฆฏานญฺจ, ปญฺจงฺคุลกปนฺติกํฯ

[5]

ฉตฺตากาเรหิ กาเรสิ, ฉตฺตํ เวฬุมยํ ตถา;

ขรปตฺตมเย จนฺท-สูริเย มุทฺธเวทิยํฯ

[6]

ลาขากุงฺกุมเกเห’ตํ, จิตฺตยิตฺวา สุจิตฺติตํ;

รญฺโญ นิเวทยิ’’ถูเป, กตฺตพฺพํ นิฏฺฐิตํ’’อิติฯ

[7]

สิวิกาย นิปชฺชิตฺวา, อิธาคนฺตฺวา มหีปติ;

ปทกฺขิณํ กริตฺวาน, สิวิกาเย’ว เจติยํฯ

[8]