นานาวิเธหิ รตเนหิ สมุชฺชเลหิ, นารีหิ นิจฺจมุปคายิตหมฺมิเยหิ; รชฺเชหิ จกฺกรตนาทิวิภูสิเตหิ, ยาโต ตโต หิ มหิโต ปุริสสฺสเรหิฯ ทฺวิปาทพฺยาสยมกคาถา ยโสธรํ ปีณปโยธราธรํ, อนงฺครงฺคทฺธชภูตมงฺคํ; เทวจฺฉราวุชฺชลิตํ ปติพฺพตํ, หิตฺวา คโต โส สุคโต ว นูนฯ สภาวนิจฺฉนฺทมติํ ปภาวติํ, ภตฺโต กุโส สํหริ ภตฺตกาชํ; ตายาภิรูปํ ปิ ยโสธรํ วรํ, หิตฺวา คโต โส สุคโต ว นูนฯ ปุเร ปุเร สณฺจริ ขคฺคหตฺโถ, วรํ ปริตฺถีนํ อนิตฺถิคนฺโธ; สิริญฺจ ริญฺจาปิ น ริญฺจิ นาริํ, หิตฺวานิมนฺทานิ คโต ตถาคโตฯ หริตฺตโจ ราคพเลน เทวิยา, อวตฺถลิงฺเคน น ลิงฺคนุสฺสริ; อเสวิ กามํ ตมิทานิ กามํ, หิตฺวา คโต โส สุคโต ว นูนฯ อปเมยฺยกปฺเปสุ วิเวกเสวี, หิตฺวา คโต รชฺชสิริํ วริตฺถิํ; อณุํ กลิํ วณฺณยิ ตํ ปุราณํ, วตฺถมฺหิ ฉิทฺทํ วิย ตุนฺนกาโรฯ ตถาติ มนฺตฺวาน อิทานินงฺโค, ยโสธรํ ปคฺคหิโต ธชํ ว; มตฺโต ชิโตมฺหี ติ ปมตฺตพนฺธุ, น ปสฺสิ ญาณาสนิปาตมนฺตรํฯ ทิสฺวาน ทุกฺขานลสมฺภวํภวํ, กตฺวา ตทุปฺปาทกนงฺคภงฺคํ; ยโสธรํ ปีณปโยธราธรํ, หิตฺวา คโต พุทฺธพลปฺปทํ ปทํฯ อนนฺตสตฺตานมนนฺตกาเล, มนงฺคเหตฺวาน ชิโต อนงฺโค; ปราชิโต นูน หิ เอกกสฺส, ตถาคโต โส น ปุนาคโต วฯ ทิสฺวาน ญาณาสนิปาตมนฺตรํ, ตถาคโต โส น ปุนาคโต ว; ตถาคโต โส น ปุนาคโต ว, ทิสฺวานญาณาสนิปาตมนฺตรํฯ ติปาทพฺยาสยมกคาถา |