ปาเทปาเท วลยวิรวาเมขลาวีณานาทา, คีตํคีตํ ปติรติกรํ คายตี คายตี สา; หตฺเถหตฺเถ วลยจลิตา สมฺภมํ สมฺภมนฺติ, ทิสฺวาทิสฺวา อิติ รติกรํ ยาติ หาหา กิมีหาฯ อปุนราวตฺติคมนทีปนียมกคาถา อนนฺตกาโลปจิเตน เตน, ปุญฺเญน นิพฺพตฺตวิมานยาเน; ตสฺมิํ ทิเน ชาตสุตํ ปชาปติํ, หิตฺวา คโต โส สุคโต คโต วฯ ตํ ชีวมานํ ปิตรญฺจ มาตรํ, เต ญาตเก ตาทิสิโย จ อิตฺถิโย; เต ตาทิเส รมฺมกเร นิเกเต, หิตฺวา คโต โส สุคโต คโต วฯ โขมญฺจ ปตฺตุณฺณทุกูลจีนํ, สกาสิกํ สาธุสุคนฺธวาสิตํ; นิวาสิโต โสภติ วาสโว ว, หิตฺวา คโต โส สุคโต คโต วฯ วิธิปฺปกาสา นิธิโย จตสฺโส, สมุคฺคตา ภูตธรา วสุนฺธรา; สตฺตาวสตฺตาวสุธา สุธาสา, หิตฺวา คโต โส สุคโต คโต วฯ สุวณฺณถาเล สตราชิเก สุเภ, สาธุํ สุคนฺธํ สุจิสาลิโภชนํ; ภุตฺวา สวาสีหิ วิลาสินีหิ, หิตฺวา คต โส สุคโต คโต วฯ มนุญฺญคนฺเธน อสุญฺญคนฺโธ, สุคนฺธคนฺเธน วิลิตฺตคตฺโต; สุคนฺธวาเตน สุวิชฺชิตงฺโค, หิตฺวา คโต โส สุคโต คโต วฯ สุลกฺขเณ เหวภิลกฺขิตงฺโค, ปสาธิโต เทวปสาธเนน; วิโรจมาโน สมราชินีหิ, หิตฺวา คโต โส สุคโต คโต วฯ นานาสนานิ สยนานิ นิเวสนานิ, ภาภานิภานิ รตนากรสนฺนิภานิ; ตตฺรุสฺสิตานิ รตนทฺธชภูสิตานิ, หิตฺวา ว ตานิ หิมพินฺทุสมานิ ตานิฯ นานาวิเธหิ รตเนหิ สมุชฺชเลหิ, นารีหิ นิจฺจมุปคายิตหมฺมิเยหิ; รชฺเชหิ จกฺกรตนาทิวิภูสิเตหิ, ยาโต ตโต หิ มหิโต ปุริสสฺสเรหิฯ ทฺวิปาทพฺยาสยมกคาถา |