รตี รตี กามคุเณ วิเวเก, อลํ อลนฺเตว วิจินฺตยนฺโต; มนํ มนงฺคาลยสมฺปทาลยํ, ตหิํ ตหิํ ทิฏฺฐพาลา ว ปกฺกมิฯ ปาทุทฺธารวิมฺหยทีปนีคาถา ยาวญฺจยํ รวิ จรตฺยจเลน รุทฺเธ, ยาวญฺจ จกฺกรตนญฺจ ปยาติ โลเก; ตาวิสฺสโร นภจโร ชิตจาตุรนฺโต, หิตฺวา กถํ นุ ปทมุทฺธริ โส นิราโสฯ ทีเป มหา จ จตุราธิกทฺเวสหสฺเส, ตตฺราปิ เสฏฺฐภชิตํ วรชมฺพุทีปํ; ภูนาภิกํ กปิลวตฺถุปุรํ สุรมฺมํ, หิตฺวา กถํ นุ ปทมุทฺธริ โส นิราโสฯ ญาตีนสีติ กุลโต หิ สหสฺส สากฺเย, หตฺถิสฺสธญฺญธนิโน วิชิตาริสณฺเฆ; โคตฺเตน โคตมภวํ ปิตรญฺชนคฺคํ, หิตฺวา กถํ นุ ปทมุทฺธริ โส นิราโสฯ รมฺมํ สุรมฺมวสติํ รตนุชฺชลนฺตํ, คิมฺเหปิ วิมฺหยกรํ สุรมนฺทิราภํ; อุสฺสาปิตทฺธชปฏากสิตาตปตฺตํ, หิตฺวา กถํ นุ ปทมุทฺธริ โส นิราโสฯ สโปกฺขรา โปกฺขรณี จตสฺโส, สุปุปฺผิตา มนฺทิรโต สมนฺตา; โกกา นทนฺตูปริ โกกนาเท, หิตฺวา กถํ นุ ปทมุทฺธริ โส นิราโสฯ สเร สโรเช รุทิตาฬิปาฬิ, สมนฺตโต ปสฺสติ ปญฺชรญฺชสา; ทิสฺวารวินฺทานิ มุขารวินฺทํ นาถสฺส ลชฺชา วิย สํกุชนฺติฯ มธุรา มธุราภิรุตา, จริตา ปทุเม ปทุเมฬิคณา; วสติํ อธุนา มธุนา, อกรุํ ชหิตํ กิมิทํ ปตินาฯ ตมฺหา รสํ มธุกรา ภวนํ หริตฺวา, นินฺนาทิโน สมธุรํ มธุรํ กโรนฺติ; นาเทน นาทมติริจฺจุปวีณยนฺติ, นจฺจนฺติ ตา สุรปุเร วณิตา ว ตาวฯ สญฺโจทิตา ปีณปโยธราธรา, วิราชิตานงฺคชเมขลาขลา; สุรงฺคณา วงฺคชผสฺสทา สทา, รมา รมาเปนฺติ วรงฺคทาคทาฯ กราติรตฺตา รติรตฺตรามา, ตาเฬนฺติ ตาฬาวจเร สมนฺตา; นจฺจุคฺคตาเนกสหสฺสหตฺถา, สกฺโกปิ กิํ สกฺยสโมติ โจทยุํฯ วิสาลเนตฺตา หสุลา สุมชฺฌา, นิมฺพตฺถนี วิมฺหยคีตสทฺทา; อลงฺกตา มลฺลธรา สุวตฺถา, นจฺจนฺติ ตาฬาวจเรหิ ฆุฏฺฐาฯ ยาสํ หิ โลเก อุปมา นตฺถิ, ตาสํ หิ ผสฺเสสุ กถาวกาสา; ตํ ตาทิสํ กามรติํนุโภนฺโต, หิตฺวา กถํ นุ ปทมุทฺธริ โส นิราโสฯ ปาเทปาเท วลยวิรวาเมขลาวีณานาทา, คีตํคีตํ ปติรติกรํ คายตี คายตี สา; หตฺเถหตฺเถ วลยจลิตา สมฺภมํ สมฺภมนฺติ, ทิสฺวาทิสฺวา อิติ รติกรํ ยาติ หาหา กิมีหาฯ อปุนราวตฺติคมนทีปนียมกคาถา |