อกาสิ กิจฺจานิ ทิเนสุ ปญฺจ, ปสาทยญฺจิทฺธิพเลน เสน; ชนานเสสํ จริยานุกูลํ, ญตฺวานโวจานุสยปฺปหานํฯ อนญฺญสาธารณทีปนีคาถา อพฺภุคฺคตา ยสฺส คุณา อนนฺตา, ติพุทฺธเขตฺเตกทิวากโรติ; ชานาติ โส โลกมิมํ ปรญฺจ, สเจตนญฺเจว อเจตนญฺจ; สกสฺส สนฺตานคตํ ปเรสํ, พฺยตีตมปฺปตฺตกมตฺรภูตํฯ อนนฺตสตฺเตสุ จ โลกธาตุสุ, เอโกว สพฺเพปิ สมา น เตน; ทิสาสุ ปุพฺพาทิสุ จกฺกวาฬา, สหสฺสสงฺขายปิ อปฺปเมยฺยา; เย เตสุ เทวา มนุชา จ พฺรหฺมา, เอกตฺถ สงฺคมฺม หิ มนฺตยนฺตาฯ อนาทิกาลาคตนามรูปินํ, ยถาสกํ เหตุผลตฺตวุตฺตินํ; ตพฺภาวภาวิตฺตมสมฺภุณนฺตา, นานาวิปลฺลาสมนุปวิฏฺฐาฯ กมฺมปฺปวตฺติญฺจ ผลปฺปวตฺติํ, เอกตฺตนานตฺตนิรีหธมฺมตํ; วิญฺญตฺติสนฺตานฆเนน ฉนฺนโต, สิวญฺชสํ โน ภณิตุํ สมตฺถาฯ เอโก ว โส สนฺติกโร ปภงฺกโร, สงฺขาย เญยฺยานิ อเสสิตานิ; เตสญฺหิ มชฺเฌ ปรมาสมฺภีวทํ, สิวญฺชสํ ทีปยิตุํ สมตฺโถฯ โส โคตโม สกฺยสุโต มุนินฺโท, สพฺพสฺส โลกสฺส ปทีปภูโต; อนนฺตสตฺเต ภวพนฺธนมฺหา, โมเจสิ การุญฺญผลานุเปกฺขีฯ อภินีหารทีปนีคาถา |