เมนู

[35]

ตโต ปุพฺพนิมิตฺตานิ ทฺวตฺติํสานิ ตทา สิยุํ;

ตุฏฺฐหฏฺฐา ว สา มาตา ปุตฺตํ ปสฺสติ กุจฺฉิยํฯ

วิชายนมงฺคลทีปนีคาถา

[36]

สา ปุณฺณคพฺภา ทสมาสโต ปรํ,

คนฺตฺวาน ผุลฺลํ วรลุมฺพินีวนํ;

ฐิตา คเหตฺวา วรสาลสาขํ,

วิชายิ ตํ ปุตฺตวรํ สุเขนฯ

[37]

ตทา สหสฺสีทสโลกธาตุสุ,

เทวา จ นาคา อสุรา จ ยกฺขา;

นานาทิสา มงฺคลจกฺกวาฬํ,

สุมงฺคลํ มงฺคลมาคมิํสุฯ

[38]

อเนกสาขญฺจ สหสฺสมณฺฑลํ,

ฉตฺตํ มรู ธารยุมนฺตลิกฺเข;

สุวณฺณทณฺฑา วิปตนฺติ จามรา,

ขชฺชิํสุ เภรี จ นทิํสุ สงฺขาฯ

[39]

มเลนเกนาปิ อนูปลิตฺโต,

ฐิโต ว ปาทานิ ปสารยนฺโต;

กถี ว ธมฺมาสนโตตรนฺโต,

ชาโต ยถาทิจฺจวโร นภมฺหาฯ

[40]

ขีณาสวา พฺรหฺมคโณปคนฺตฺวา,

สุวณฺณชาเลน ปฏิคฺคเหสุํ;

ตโต จ เทวาชินจมฺมเกน,

ตโต ทุกูเลน จ ตํ มนุสฺสาฯ

[41]

เตสํ ปิ หตฺถา วรภูมิยํ ฐิโต,

ทิสา วิโลเกสิ สพฺพา สมนฺตโต;

วทิํสุ เทวา ปิ จ พฺรหฺมกายิกา,

ตยา สโม กตฺถจิ นตฺถิ อุตฺตโรฯ

[42]

คนฺตฺวาน อุตฺตรํ สตฺต ปทวาเรหิ วิกฺกโม,

สีหนาทํ นที เตสํ เทวตานํ หิ สาวยํฯ

[43]

ตโต ปุตฺตํ คเหตฺวาน คตา มาตา สกงฺฆรํ,

มาตา สตฺตมิยํ คนฺตฺวา เทอปุตฺตตฺตมาคมิฯ

[44]

เต พฺรหฺมณา ปญฺจมิยํ สุภุตฺตา,

นามํ คเหตุํ วรลกฺขณานิ;

ทิสฺวาน เอกงฺคุลิมุกฺขิปิํสุ,

พุทฺโธ อยํ เหสฺสติ วีตราโคฯ

[45]

ชิณฺณญฺจ ทิสฺวา พฺยาธิกํ มตญฺจ,

อวฺหายิตํ ปพฺพชิตญฺจ ทิสฺวา;

โอหาย ปพฺพชฺชมุเปติ กาเม,

พุทฺโธ อยํ เหสฺสติ วีตราโคฯ

อคาริยสมฺปตฺติทีปนีคาถา