สทฺเธยฺยา เต จินฺเตยฺยา เต, วนฺเทยฺยา เต ปูเชยฺยาเต; พุทฺโธโลกาโลเก โลเก, ชาเต เนตํ ปตฺเถนฺเตนฯ ปูชานิธานทีปนีคาถา ตสมา หิ ชาโตวรกมฺหิ ตสฺส, อายตฺตเก มงฺคลจกฺกวาเฬ; ภูเตหิ วตฺถูหิ มโนรเมหิ, ปูเชมิ ตํ ปูชิตฺปูชิตํ ปุเรฯ โสหํ อชฺช ปเนตสฺมิํ จกฺกวาฬมฺหิ ปุปฺผิเต, ถลเช ชลเช วาปิ สุคนฺเธ จ อคนฺธเกฯ มนุสฺเสสุ อเนกตฺถ ตฬากุยฺยานวาปิสุ, ปวเน หิมวนฺตสฺมิํ ตตฺถ สตฺต มหาสเรฯ ปริตฺตทีเป ทฺวิสหสฺเส มหาทีเป สุปุปฺผิเต, สตฺตปริภณฺฑเสเลสุ สิเนรุปพฺพตุตฺตเมฯ กุมุทุปฺปลกาทีนิ นาคานํ ภวเนสุปิ, ปาฏลาทีนิ ปุปฺผานิ อสุรานํ หิ อาลเยฯ โกวิฬาราทิกานิ ตุ เทวตานํ หิ อาลเย, เอวมาที อเนกตฺถ ปุปฺผิเต ธรณีรุเหฯ จมฺปกา สลลา นิมฺพา นาคปุนฺนาคเกตกา, วสฺสิกา มลฺลิกา สาลา โกวิฬารา จ ปาฏลิฯ อินฺทีวรา อโสกา จ กณิการา จ มกุลา, ปทุมา ปุณฺฑริกา จ โสคนฺธิกุมุทุปฺปลาฯ เอเต จญฺเญ จ รุกฺขา จ วลฺลิโย จาปิ ปุปฺผิตา, สุคนฺธา สุขสมฺผสฺสา นานาวณฺณนิภา สุภาฯ วิจฺตฺรา นีลาเนกานิ ปีตา โลหิตกานิ จ, กาฬา เสตา จ มญฺชฏฺฐ เนกวณฺณา สุปุปฺผิตาฯ โสภเต ปพฺพเต เหฏฺฐา สเรหิ วนราชิหิ, สนฺทมานาหิ คงฺคาหิ หิมวา รตนากโรฯ ปตฺตกิญฺชกฺขเรณูหิ โอกิณฺณํ โหติ ตํ วนํ, ภมรา ปุปฺผฺคนฺเธหิ สมนฺตา อภินาทิตาฯ อเถตฺต สกุณา สนฺติ ทิชา มญฺชุสฺสรา สุภา, กูชนฺตมุปกูชนฺติ อุตุสมฺปุปฺผิเต ทุเมฯ นิจฺฉรานํ นิปาเตน ปพฺพตา อภินาทิตา, ปญฺจงฺคิกานิ ตูริยานิ ทิพฺพานิ วิย สุยฺยเรฯ ตตฺถ นจฺจนฺติ ตสฺมิํ ชลนฺตคฺคิสิขูปมา, ตสฺมิํ หิ กินฺนรา กิจฺจํ ปทีเปน กรียติฯ มุตฺตาชาลาว ทิสฺสนฺติ นิจฺฉรานํ หิ ปาตกา, ปชฺชลนฺตา ว ติฏฺฐนฺติ มณิเวฬุริยาทโยฯ กาฬานุสาริ ตคฺครํ กปฺปูรํ หริจนฺทนํ, สกุณานํ หิ สทฺเทน มยูรานํ หิ เกกยาฯ ภมรานํ หิ นินฺนาทา โกญฺจนาเทน หตฺถินํ, วิชมฺภิเตน วาฬานํ กินฺนรานํ หิ คีติยา; ปพฺพตานํ หิ โอภาสา มณีนํ โชติยาปิ จ, วิจิตฺรพฺภวิตาเนหิ ทุมานํ ปุปฺผธูปิยา; เอวํ สพฺพงฺคสมฺปนฺนํ กิํ สิยา นนฺทนํ วนํฯ เอวํ สุสมฺผุลฺลวนํ หิ ยํ ยํ, ตหิํ ตหิํ ปุปฺผิตปุปฺผิตํ สุภํ; มาลํ สุสทฺทญฺจ มนุญฺญคนฺธํ, ปูเชมิ ตํ ปูชิตปูชิตํ ปุราฯ นาคโลเก มนุสฺเส จ เทเว พฺรหฺเม จ ยํ สิยา, สามุทฺทิกํ ภูมิคตํ อากาสฏฺฐญฺจ ยํ ธมํฯ รชตํ ชาตรูปญฺจ มุตฺตา เวฬุริยา มณิ, มสารคลฺลํ ผลิกํ โลหิตงฺคํ ปวาฬกํฯ โย โส อนนฺตกปฺเปสุ ปูเรตฺวา ทสปารมี, พุทฺโธ โพเธสิ สตฺตานํ ตสฺส ปูเชมิ ตํ ธนํฯ โขมํ โกเสยฺยํ กปฺปาสํ สาณํ ภงฺคญฺจ กมฺพลํ, ทุกูลานิ จ ทิพฺพานิ ทุสฺสานิ วิวิธานิ เตฯ อนนฺตวตฺถทาเนน หิโรตฺตปฺปาทิสํวรํ, ยสฺส สิทฺธํ สิยา ตสฺส ทุสฺสานิ ปุชยามหํฯ ปวเน ชาตรุกฺขานํ นานาผลรสุตฺตมํ, อมฺพา กปิฏฺฐา ปนฺสา โจจโมจาทินปฺปกาฯ ตสฺมิํ คนฺธรสํ โอชํ พุทฺธเสฏฺฐสฺส ปูชิตํ, วนฺทามิ สิรสา นิจฺจํ วิปฺปสนฺเนน เจตสาฯ ปูเชมิ ปฐมํ ตสฺส ปณิธานํ อจินฺติยํ, จกฺกวาฬมฺหิ สพฺเพหิ วิชฺชมาเนหิ วตฺถุหิฯ ทสนฺนํ ปารมีนนฺตุ ปูริตฏฺฐานมุตฺตมํ, ตโต สาลวเน รมฺเม ชาตฏฺฐานํ จริมกํฯ ฉพฺพสานิ ปธานสฺมิํ กรณํ ทุกฺกรการิกํ, อปฺปราชิตปลฺลงฺกํ พุทฺธํ พุทฺธคุณํ นเมฯ จุทฺทส พุทฺธญาณานิ อฏฺฐรฺส อาเวณิกํ, ปูเชมิ ทสพลญาณํ จตุเวสารชฺชมุตฺตมํฯ อาสยานุสยญาณํ อินฺทฺริยานํ ปโรปรํ, ยมกปาฏิหีรญฺจ ญาณํ สพฺพญฺญุตํ ปิ จฯ มหากรุณาปตฺติญาณํ อนาวรณฺมิติ จ, ฉ อสาธารณาเนเต ญตฺวาน ปูชยามหํฯ ตโต จ สตฺตสตฺตาเห ธมฺมสมฺมสิตํ นเม, พฺรหฺมุนา ยาจิตฏฺฐานํ ธมฺมํ เทสยิตุํ วรํฯ อิสิปตเน มิคทาเย ธมฺมจกฺกปวตฺตนํ, ตโต เวฬุวนาราเม วสิตฐานญฺจ ปูชเยฯ ตโต เชตวนํ รมฺมํ จิรวุตฺถํ มเหสินา, อสาธารณมญฺเญสํ ยมกปาฏิหริยํฯ ปาริจฺฉตฺตกมูลมฺหิ อภิธมฺมญฺจ เทสนํ, สงฺกสฺสนครทฺวาเร เทโวโรหณกํ ปิ จฯ ตโต จ หิมวนฺตสฺมิํ มหาสมยเทสนํ, วุตฺตาเนตานิ ฐานานิ นตฺวาน ปุชยามหํฯ จตุราสีติสหสฺเสหิ ธมฺมกฺขนฺเธหิ สงฺคหํ, ปิฏกตฺตยํ ยถาวุตฺตวิธินา ปูชยามหํฯ มารสฺส อตฺตโน อายุสงฺขาโรสชฺชนํ นเม, กุสินาราย มลฺลานํ ยมกสาลมนฺตเรฯ ปณิธานมฺหิ ปฏฺฐาย กตํ กิจฺจํ อเสสโต, นิฏฺฐเปตฺวาน โส สพฺพํ ปรินิพฺพายินาสโวฯ เอวํ นิพฺพายมานสฺส กตกิจฺจสฺส ตาทิโน, จิรคตา มหากรุณา น นิพฺพายิตฺถ กิญฺจิปิฯ สฺวายํ ธมฺโม วินโย จ เทสิโต สาธุกํ มยา, มมจฺจเยน โส สตฺถา ธาตุ จาปิ สรีรชาฯ อปฺปราชิตปลฺลงฺกํ โพธิรุกฺขญฺจ อุตฺตมํ, มมจฺจเยน สตฺถา ติ อนุชานิ มหามุนิฯ มม ฐเน ฐเปตฺวาน ธาตุโพธิญฺจ ปูชิตํ, อนุชานามิ ตุมฺหากํ สาธนตฺถํ สิวญฺชสํฯ ตสฺมา หิ ตสฺส สทฺธมฺมํ อุคฺคณฺหิตฺวา ยถาตถํ, โย เทเสติ สมฺพุทฺโธ ติ นตฺวาน ปูชยามหํฯ ตสฺมา สาสปมตฺตํ ปิ ชินธาตุํ อเสสิย, วิตฺถินฺนจกฺกวาฬมฺหิ นตฺวาน ปูชยามหํฯ ปรมฺปราภตานํ หิ อิมมฺหา โพทฺธิรุกฺขโต, สพฺเพสํ โพธิรุกฺขานํ นตฺวาน ปูชยามหํฯ ยํ ยํ ปริภุญฺชิ ภควา ปตฺตจีวรมาทิกํ, สพฺพํ ปริโภคธาตุํ นตฺวาน ปูชยามหํฯ ยตฺถ กตฺถจิ สยิโต อาสินฺโน จงฺกเมปิ วา, ปาทลญฺฉนฺกํ กตฺวา ฐิโต นตฺวาน ปูชเยฯ น สญฺชานนฺติ เย พุทฺธํ เอวรูโป ติ ญาตฺเว, กตํ ตํ ปฏิมํ สพฺพํ นตฺวาน ปูชยามหํฯ เอวํ พุทฺธญฺจ ธมฺมญฺจ สณฺฆญฺจ อนุตฺตรํ, จกฺกวาฬมฺหิ สพฺเพหิ วตฺถูหิ ปูชยามหํฯ ปตฺถนาทีปนีคาถา |