อเวทิ โส โลกมิมํ ปรญฺจ, อมุตฺตโร สารถิทมฺมสตฺเต; สเทวกานํ วรสตฺถุกิจฺจํ, อกาสิ พุทฺโธ ภควา วิสุทฺโธฯ คุณทีปนีคาถา น ตสฺส อทิฏฺฐนมิธตฺถิ กิญฺจิ, อโต อวิญฺญาตมชานิตพฺพํ; สพฺพํ อภิญฺญาสิ ยทตฺถิ เญยฺยํ, ตถาคโต เตน สมนฺตจกฺขุฯ อิติ มหิตมนนฺตากิตฺติสมฺภารสารํ, สกลทสสหสฺสีโลกธาตุมฺหิ นิจฺจํ; อุปจิตสุภเหตุปยุตานนฺตกาลํ, ตทิห สุคตโพธิสาธุกํ จินฺตนียํ; ตกฺกพฺยากรณญฺจ ธมฺมวินยํ สุตฺวา ปิ โย ปญฺญวา, เตนายํ สุจิสารภูตวจนํ วิญฺญายเต เกวลํ; เหตุญฺจาปิ ผเลน เตน สผลํ สมฺปสฺสมาโน ตโต โพธิํ สทฺทหเตว ตสฺส มหตาวายมโต สมฺภวํฯ โย สทฺทหนฺโต ปน ตสฺส โพธิํ, วุตฺตานุสาเรน คุเณรหาที; กเถติ จินฺเตนฺติ จ โส มุหุตฺตํ, โอหาย ปาปานิ อุเปติ สนฺติํฯ สทฺเธยฺยา เต จินฺเตยฺยา เต, วนฺเทยฺยา เต ปูเชยฺยาเต; พุทฺโธโลกาโลเก โลเก, ชาเต เนตํ ปตฺเถนฺเตนฯ ปูชานิธานทีปนีคาถา |