มหาวาตสมุทฺธตภสฺมํ ว วิกิริยฺยถ, มหาโฆโส อชายิตฺถ สิทฺธตสฺส ชโย อิติฯ อภิสมฺโพธิทีปนีคาถา ปุรโต คจฺฉติ จนฺโท รชตจกฺกํ ว อมฺพเร, สหสฺสรํสิ สุริโย ปจฺฉิเมนุปคจฺฉติฯ มชฺเฌ โพธิทุมจฺฉตฺเต ปลฺลงฺเก อปฺปราชิเต, ปลฺลงฺเกน นิสีทิตฺวา ธมฺมํ สมฺมสเต มุนิฯ สกฺโก ตสฺมิํ ขเณ สงฺขํ ธมนฺโต อภิธาวติ, พฺรหฺมา ติโยชนํ ฉตฺตํ ธาเรติ มุนิมุทฺธนิฯ มณิตาลวณฺฏํ ตุสีโต สุยาโม วาฬพีชนิํ, นานามงฺคลภณฺฑานิ คหิโต เสสเทวตาฯ เอวํ ทสสหสฺสมฺหิ สกฺโก พฺรหฺมา จ เทวตา, สงฺขาทีนี ธมนฺตา จ จกฺกวาฬมฺหิ ปูรยุํฯ มณฺคลานิ คเหตฺวาน ติฏฺฐนฺติ กาจิ เทวตา, ธชมาล คเหตฺวาน ตถา ปุณฺณฆฏาทโยฯ ตตฺถ นจฺจนฺติ คายนฺติ เสเฬนฺติ วาทยนฺติ จ, เทวา ทสสหสฺสมฺหิ ตุฏฺฐหฏฺฐา ปโมทิตาฯ ธมฺมามตรสสฺสาทํ ลภิสฺสามสฺส สนฺติเก, นยนามตรสสฺสาทํ ปาฏิหาริยญฺจ ปสฺสิตุํฯ ชารมรณกนฺตารา โสโกปายาสสลฺลโต, โมเจสิ กามปาสมฺหา เทเสนฺโต อมตํ ปทํฯ อิติ ตุฏฺเฐหิ เทเวหิ ปูชิยนฺโต นราสโภ, กิญฺจิ ปูชํ อจินฺเตนฺโต จินฺเตนฺโต ธมฺมมุตฺตมํฯ สพฺพตฺถสาธิโต สนฺโต สิทฺธตฺโถ อปฺปราชิโต, จกฺกวาฬสิลาสาณิปากาเรหิ มโนรเมฯ ตารามณิขจิตากาสวิตาเน จนฺททีปเก, มานารตมปชฺโชเต มาลาคนฺธาทิปูชิเตฯ ทิพฺเพหิ ฉณเภรีหิ ฆุฏฺเฐ มงฺคลคีติยา, จกฺกวาเฬ สุปฺปาสาเท โพธิมณฺฑมหาตเลฯ โพธิรุกฺขมณิจฺฉตฺเต ปลฺลงฺเก อปฺปราชิเต, นิสฺสินฺโน ปฐเม ยาเม ปุริมํ ชาติมนุสฺสริฯ นมรูปามนุปฺปตฺติ สุทิฏฺฐา โหติ เตนิธา, สกฺกาตทิฏฺฐิ เตนสฺส ปหีนา โหติ สพฺพโสฯ ตโต หิ ทุติเย ยาเม ยถายมฺมุปเค สริ, สุทิฏฺฐํ โหติ เตนสฺส กมฺมกฺเกฺลเสหิ สมฺภวํฯ กงฺขาวิตรณี นาม ญาณนฺตํ สมุปาคตํ, เตนเสส ปหียิตฺถ กงฺขา โสฬสธา ฐิตาฯ ตโต โส ตติเย ยาเม ทฺวาทสงฺเค อเสสโต, โส ปฏิจฺจสมุปฺปาเท ญาณโมตารยี มุนิฯ อวิชฺชวาทฺยานุโลเมน ชราทิปฏิโลมโต, สมฺมสนฺโต ยถาภูตํ ญาณทสฺสนมาคมิฯ กปฺปโกฏิสเตนาปิ อปฺปเมยฺเยสุ ชาติสุ, โลภํ อเสสทาเนน วินาเสนฺโต ปุนปฺปุนํฯ สีเลน ขนฺติเมตฺตาย โกขโทสํ นิวาเรสิ, ปญฺญาย โมหํ เฉตฺวาน มิจฺฉาทิฏฺฐิ ตเถว จฯ ครูปเสวนาทีหิ วิจิกิจฺฉํ วิโนทยํ, มานุทฺธจฺจํ วิโนเทนฺโต กุเล เชฏฺโฐปจายินาฯ เนกฺขมฺเมน วินาเสนฺโต กามราคํ ปุนปฺปุนํ, สจฺเจน วิสํวาทํ โกสชฺชํ วีริเยน จฯ เอวํ ทานาทินา ตํ ตํ กิเลสณฺคํ วิโนทยํ, สุวฑฺฒิตา มหาปญฺญา กถํ สนฺติํ น รูหติฯ สุทุกฺกรํ กริตฺวาน ทานาทิปจฺจยํ ปุเร, น กิญฺจิ ภวสมฺปตฺติํ ปตฺเถสิ โพธิมุตฺตมํฯ ปณิธานมฺหา ปฏฺฐาย กตํ ปุญฺญญฺจ ปตฺถนํ, เอกฺกตฺถ ทานิ สมฺปตฺติํ เทติ โพธิํ อสํสยํฯ ตโต โส สพฺพสงฺขาเร อนิจฺจทุกฺขนตฺตโต, สมฺมสนฺโตนุโลเมน นิพฺพานํ สมุปาคมิฯ สวาสเน กิเลเส โส ฌาเปนฺโตนุมตฺตํ ปิ จ, อรหตฺตปฺปตฺติยา สุทฺโธ พุทฺโธ โพธิตเล อหุฯ ปตฺโต วิเมตฺติํ วรเสตฉตฺตํ, โส ปีติเวเคน อุทานุทีรยิ; เฉตฺวาน มาเร วิชิตาริสงฺโฆ, ติพุทฺธเขตฺเตกทิวากโร อหุฯ ราชาธิราชา วรเมวมาสิ, ติฉตฺตธาริ วรธมฺมราชา; มหาสหสฺสํ ปิ จ โลกธาตุํ, สเรน วิญฺญาปยิตุํ สมตฺโถฯ พุทฺโธ โลกาโลเก โลเก, ชาโต สตฺโต โกนุมฺมตฺโต; สุทฺธํ พุทฺธํ โอฆา ติณฺณํ, สทฺโธ ปญฺโญ โก โน วนฺเทฯ ภชิตํ จชิตํ ปวนํ ภวนํ, ชหิตํ คหิตํ สมลํ อมลํ; สุคตํ อคตํ สุคติํ อคติํ, นมิตํ อมิตํ นมติํ สุมติํฯ ธมฺมจกฺกปวตฺตนทีปนีคาถา |