น กามโต เนวติทุกฺกรมฺหิ, สพฺพญฺญุตา สิชฺฌติ มชฺฌิมาย; ญตฺวาน ตํ ปุพฺพคุโณปลทฺธํ, ธมฺมํ สมาเนตุมคา สุโพธิํฯ มารปราชยทีปนีคาถา ติพุทฺธเขตฺตมฺหิ ติเสตฉตฺตํ, ลทฺธาน โลกาธิปตี ภเวยฺย; คนฺตฺวาน โพธิมฺหิปราชิตาสเน, ยุทฺธาย มาเรนจโล นิสีทิฯ ทตฺวาน มํสํ รชฺชํ ปิตา สุทฺโธทโน ตทา, นมสฺสมาโน สิรสา เสตฉตฺเตน ปูชยิฯ สยํ นารายนพโล อภิญฺญาพลปารคู, เชตุํ สพฺพสฺส โลกสฺส โพธิมณฺฑํอุปาคมิฯ ตทา วสวตฺตีราชา ฉกามวจริสฺสโร, สเสนาวาหโน โพธิมณฺฑํ ยุทฺธายุปาคมิฯ เอถ คณฺคถ พนฺธถ ฉฏฺเฏถ เจฏกํ อิมํ, มนุสฺสกลเล ชาโต กิมิหนฺติ น มญฺญติฯ ชลนฺตํ นววิธํ วสฺสํ วสฺสาเปติ อนปฺปกํ, ธูมนฺธการํ กตฺวาน ปาเตสิ อสินํ พหุํฯ จกฺกาวุธํ ขิเปนฺโต ปิ นาสกฺขิ กิญฺจิ กาตเว, คเหตพฺพํ หิ คหณํ อปสฺสนฺโต อิติพฺรวิฯ สิทฺธตฺถ กสฺมา อาสิ นุ อาสเน มม สนฺตเก, อุฏฺเฐหิ อาสนา โน เจ ผาเลมิ หทยํ ตวฯ สปาทมูเล กีฬนฺตํ ปสฺสนฺโต ตรุณํ สุตํ, ปิตา วุทิกฺขิ ตํ มารํ เมตฺตายนฺโต ทยปโรฯ ตทา โส อสมฺภิวาจํ สีหนาทํ นที มุนิ, น ชานาติ สยํ มยฺหํ ทาสภาวปิยํ ขโฬฯ เยน เกนจิ กมฺเมน ชาโต เทวปุเร วเร, สกํ คติํ อชานนฺโต โลกเชฏฺโฐติ มญฺญติฯ อนนฺตโลกขาตุมฺหิ สตฺตานํ หิ กตํ สุภํ, มยฺเหกปารมิยา ปิ กลํ นคฺฆติ โสฬสิํฯ ติรจฺฉาโน สโส หุตฺวา ทิสฺวา ยาจกมาคตํ, ปจิตฺวาน สกํ มํสํ ปติอิโอคฺคิมฺหิ ทาตเวฯ เอวํ อนนฺตกาเลสุ กตํ ทุกฺกรการิกํ, โก หิ นาม กเรยฺยญฺโญ อนุมฺมตฺโต สเจตโนฯ เอวํ อนนฺตปุญฺเญหิ สิทฺธํ เทหมิมํ ปน, ยถาภุตํ อชานนฺโต มนุสฺโสสี ติ มญฺญติฯ นาหํ มนุสฺโสมนุสฺโส น พฺรหฺมา น จ เทวตา, ชรามรณํ โลกสฺส ทสฺเสตุํ ปนิธาคโตฯ อนุปลิตฺโต โลเกน ชาโตนนฺตชิโน อหํ, พุทฺโธ โพธิตเล หุตฺวา ตาเรมิ ชนตํ พหุํฯ สมนฺตา ธชินํ ทิสฺวา ยุทฺธํ มารํ สวาหนํ, ยุทฺธาย ปจฺจุคจฺฉามิ มา มํ ฐานา อจาวยิฯ ยนฺเต ตํ นปฺปสหติ เสนํ โลโก สเทวโก, ตนฺเต ปญฺญาย คจฺฉามิ อามํ ปตฺตํ ว อสฺมนาฯ อิจฺฉนฺโต สาสเป คพฺเภ จงฺกมามิ อิโต จิโต, อิจฺฉนฺโต โลกธาตุมฺหิ อตฺตภาเวน ฉาทยิฯ เอเต สพฺเพ คเหตฺวาน จุณฺเณตุํ อจฺฉรายปิ, อตฺถิ ถามํ พลํ มยฺหํ ปาณฆาโต น วฏฺฏติฯ อิมสฺส คณฺฑุปฺปาทสฺส อายุเธน พเลน กิํ, มยฺหํ หิ เตน ปาเปน สลฺลาโป ปิ น ยุชฺชติฯ ปลฺลงฺกํ มม ภาวาย กิมตฺถญฺเญน สกฺขินา, กมฺปิตา มทฺทิยา ทานา สกฺขิ โหติ อยํ มหีฯ อิติ วตฺวา ทกฺขิณํ พาหุํ ปถวิยา ปณมยิ, ตทา กมฺปิตฺถ ปถวี มหาโฆโส อชายถฯ ปถวีโฆเสน อากาเส คชฺชนฺโต อสนิ ผลิ, ตสฺมิํ มชฺเฌ คโต มาโร สปริโส ภยตชฺชิโตฯ มหาวาตสมุทฺธตภสฺมํ ว วิกิริยฺยถ, มหาโฆโส อชายิตฺถ สิทฺธตสฺส ชโย อิติฯ อภิสมฺโพธิทีปนีคาถา |