เมนู

[175-186] ‘‘เอกปุคฺคลสฺส , ภิกฺขเว, ปาตุภาวา มหโต จกฺขุสฺส ปาตุภาโว โหติ, มหโต อาโลกสฺส ปาตุภาโว โหติ, มหโต โอภาสสฺส ปาตุภาโว โหติ, ฉนฺนํ อนุตฺตริยานํ ปาตุภาโว โหติ, จตุนฺนํ ปฏิสมฺภิทานํ สจฺฉิกิริยา โหติ, อเนกธาตุปฏิเวโธ โหติ, นานาธาตุปฏิเวโธ โหติ, วิชฺชาวิมุตฺติผลสจฺฉิกิริยา โหติ, โสตาปตฺติผลสจฺฉิกิริยา โหติ, สกทาคามิผลสจฺฉิกิริยา โหติ, อนาคามิผลสจฺฉิกิริยา โหติ, อรหตฺตผลสจฺฉิกิริยา โหติฯ กตมสฺส เอกปุคฺคลสฺส? ตถาคตสฺส อรหโต สมฺมาสมฺพุทฺธสฺสฯ อิมสฺส โข, ภิกฺขเว, เอกปุคฺคลสฺส ปาตุภาวา มหโต จกฺขุสฺส ปาตุภาโว โหติ, มหโต อาโลกสฺส ปาตุภาโว โหติ, มหโต โอภาสสฺส ปาตุภาโว โหติ, ฉนฺนํ อนุตฺตริยานํ ปาตุภาโว โหติ, จตุนฺนํ ปฏิสมฺภิทานํ สจฺฉิกิริยา โหติ, อเนกธาตุปฏิเวโธ โหติ, นานาธาตุปฏิเวโธ โหติ, วิชฺชาวิมุตฺติผลสจฺฉิกิริยา โหติ, โสตาปตฺติผลสจฺฉิกิริยา โหติ, สกทาคามิผลสจฺฉิกิริยา โหติ, อนาคามิผลสจฺฉิกิริยา โหติ, อรหตฺตผลสจฺฉิกิริยา โหตี’’ติฯ

[187] ‘‘นาหํ ภิกฺขเว, อญฺญํ เอกปุคฺคลมฺปิ สมนุปสฺสามิ โย เอวํ ตถาคเตน อนุตฺตรํ ธมฺมจกฺกํ ปวตฺติตํ สมฺมเทว อนุปฺปวตฺเตติ ยถยิทํ, ภิกฺขเว, สาริปุตฺโตฯ สาริปุตฺโต, ภิกฺขเว, ตถาคเตน อนุตฺตรํ ธมฺมจกฺกํ ปวตฺติตํ สมฺมเทว อนุปฺปวตฺเตตี’’ติฯ

เอกปุคฺคลวคฺโค เตรสโมฯ

14. เอตทคฺควคฺโค

1. ปฐมวคฺโค

[188] ‘‘เอตทคฺคํ , ภิกฺขเว, มม สาวกานํ ภิกฺขูนํ รตฺตญฺญูนํ ยทิทํ อญฺญาสิโกณฺฑญฺโญ’’ [อญฺญาตโกณฺฑญฺโญติ (ก.), อญฺญาโกณฺฑญฺโญ (สี. สฺยา. กํ. ปี.)]

[189] … มหาปญฺญานํ ยทิทํ สาริปุตฺโตฯ

[190] … อิทฺธิมนฺตานํ ยทิทํ มหาโมคฺคลฺลาโนฯ

[191] … ธุตวาทานํ [ธุตงฺคธรานํ (กตฺถจิ)] ยทิทํ มหากสฺสโปฯ

[192] … ทิพฺพจกฺขุกานํ ยทิทํ อนุรุทฺโธฯ

[193] … อุจฺจากุลิกานํ ยทิทํ ภทฺทิโย กาฬิโคธายปุตฺโตฯ

[194] … มญฺชุสฺสรานํ ยทิทํ ลกุณฺฑก [ลกุณฺฏก (สฺยา. กํ.)] ภทฺทิโยฯ

[195] … สีหนาทิกานํ ยทิทํ ปิณฺโฑลภารทฺวาโชฯ

[196] … ธมฺมกถิกานํ ยทิทํ ปุณฺโณ มนฺตาณิปุตฺโตฯ

[197] … สํขิตฺเตน ภาสิตสฺส วิตฺถาเรน อตฺถํ วิภชนฺตานํ ยทิทํ มหากจฺจาโนติฯ

วคฺโค ปฐโมฯ

2. ทุติยวคฺโค

[198] ‘‘เอตทคฺคํ , ภิกฺขเว, มม สาวกานํ ภิกฺขูนํ มโนมยํ กายํ อภินิมฺมินนฺตานํ ยทิทํ จูฬปนฺถโก’’ [จุลฺลปนฺถโก (สี. สฺยา. กํ. ปี.)]

[199] … เจโตวิวฏฺฏกุสลานํ ยทิทํ จูฬปนฺถโกฯ

[200] … สญฺญาวิวฏฺฏกุสลานํ ยทิทํ มหาปนฺถโกฯ

[201] … อรณวิหารีนํ ยทิทํ สุภูติฯ

[202] … ทกฺขิเณยฺยานํ ยทิทํ สุภูติฯ

[203] … อารญฺญกานํ ยทิทํ เรวโต ขทิรวนิโยฯ

[204] … ฌายีนํ ยทิทํ กงฺขาเรวโตฯ

[205] … อารทฺธวีริยานํ ยทิทํ โสโณ โกฬิวิโสฯ

[206] … กลฺยาณวากฺกรณานํ ยทิทํ โสโณ กุฏิกณฺโณฯ

[207] … ลาภีนํ ยทิทํ สีวลิฯ

[208] … สทฺธาธิมุตฺตานํ ยทิทํ วกฺกลีติฯ

วคฺโค ทุติโยฯ

3. ตติยวคฺโค

[209] ‘‘เอตทคฺคํ , ภิกฺขเว, มม สาวกานํ ภิกฺขูนํ สิกฺขากามานํ ยทิทํ ราหุโล’’ฯ