ฯ นโม ตสฺส ภควโต อรหโต สมฺมาสมฺพุทฺธสฺสฯ
นมกฺการปาฬิ
[1]
สุคตํ สุคตํ เสฏฺฐํ, กุสลํกุสลํ ชหํ;
อมตํ อมตํ สนฺตํ, อสมํ อสมํ ททํฯ
สรณํ สรณํ โลกํ, อรณํ อรณํ กรํ;
อภยํ อภยํ ฐานํ, นายกํ นายกํ นเมฯ
[2]
นยนสุภคกายงฺคํ,
มธุรวรสโรเปตํ;
อมิตคุณคณาธารํ,
ทสพลมตุลํ วนฺเทฯ
[3]
โย พุทฺโธ ธิติมาญฺญธารโก,
สํสาเร อนุโภสิ กายิกํ;
ทุกฺขํ เจตสิกญฺจ โลกโต,
ตํ วนฺเท นรเทวมงฺคลํฯ
[4]
พาตฺติํสติลกฺขณจิตฺรเทหํ,
เทหชฺชุตินิคฺคตปชฺชลนฺตํ;
ปญฺญาธิติสีลคุโณฆวินฺทํ,
วนฺเท มุนิมนฺติมชาติยุตฺตํฯ
[5]
ปาโตทยํ พาลทิวากรํว,
มชฺเฌ ยตีนํ ลลิตํ สิรีหิ;
ปุณฺณินฺทุสงฺกาสมุขํ อเนชํ,
วนฺทามิ สพฺพญฺญุมหํ มุนินฺทํฯ
[6]
อุเปตปุญฺโญ วรโพธิมูเล,
สเสนมารํ สุคโต ชินิตฺวา;
อโพชฺฌิ โพธิํ อรุโณทยมฺหิ,
นมามิ ตํ มารชินํ อภงฺคํฯ
[7]
ราคาทิเฉทามลญาณขคฺคํ,
สตีสมญฺญาผลกาภิคาหํ;
สีโลฆลงฺการวิภูสิตํ ตํ,
นมามิภิญฺญาวรมิทฺธุเปตํฯ
[8]
ทยาลยํ สพฺพธิ ทุกฺกรํ กรํ,
ภวณฺณวาติกฺกมมคฺคตํ คตํ;
ติโลกนาถํ สุสมาหิตํ หิตํ,
สมนฺตจกฺขุํ ปณมามิ ตํมิตํฯ
[9]
ตหิํ ตหิํ ปารมิสญฺจยํ จยํ,
คตํ คตํ สพฺภิ สุขปฺปทํ ปทํ;
นรานรานํ สุขสมฺภวํ ภวํ,
นมานมานํ ชินปุงฺควํ ควํฯ
[10]
มคฺคงฺคนาวํ มุนิทกฺขนาวิโก,
อีหาผิยํ ญาณกเรน คาหโก;
อารุยฺห โย ตาย พหู ภวณฺณวา,
ตาเรสิ ตํ พุทฺธมฆปฺปหํ นเมฯ
[11]
สมติํสติปารมิสมฺภรณํ,
วรโพธิทุเม จตุสจฺจทสํ;
วรมิทฺธิคตํ นรเทวหิตํ,
ติภวูปสมํ ปณมามิ ชินํฯ
[12]
สตปุญฺญชลกฺขณิกํ วิรชํ,
คคนูปมธิํ ธิติเมรุสมํ;
ชลชูปมสีตลสีลยุตํ,
ปถวีสหนํ ปณมามิ ชินํฯ
[13]