เมนู

‘‘นิพฺพาภิวา เอเตน ราคคฺคิอาทิโกติ นิพฺพาน’’นฺติปิ วุตฺตํฯ ตํ น สุนฺทรํฯ

น หิ มคฺเควิย นิพฺพาเน กตฺถจิ กรณสาธนํ ทิฏฺฐํ, นจ นิพฺพานํ นิพฺพูติ กฺริยาสาธเน ราคาทิกสฺส กตฺตุโน สห การิปจฺจโย โหตีติฯ [นิพฺพานํ]

ทุตียคาถาย ปรมตฺถทีปนา นิฏฺฐิตาฯ

จิตฺตสงฺคห-ปรมตฺถทีปนี

[17] อิทานิ อุทฺเทสกฺกเมน จิตฺตํ ตาว นิทฺทิสนฺโต ตตฺถ จิตฺตนฺติอาทิมาหฯ ตตฺถาติ เตสุ จตูสุ อภิธมฺมตฺเถสุฯ ตาว ปถมํฯ จตฺตาโร วิธา ปการา ยสฺส ตํ จตุพฺพิธํ

[18] กามาวจรนฺติ เอตฺถ กามียตีติ กาโมฯ กาเมนฺติวา เอตฺถ สตฺตา อวิกฺขมฺภิตกามราคตฺตา กามรติยาเอว รมนฺติฯ น อุปริภูมีสุ วิย ฌานรติยาติ กาโมฯ เอกาทสวิธา กามภูมิฯ นนุ เจตฺถ ฌานลาภิโนปิ สนฺตีติฯ น น สนฺติฯ เตปน กทาจิ เทวาติ นตฺเถตฺถ โทโสฯ อวีจินิรยาทโย กถํ กามียนฺติฯ กถญฺจ ตตฺถ สตฺตา กามรติยา รมนฺตีติฯ นิมิตฺตสฺสาทวเสนวา ภวนิกนฺติวเสนวาติฯ มรณกาเล หิ อุปฏฺฐิตา นิรยคฺคิชาลา สุวณฺณวณฺณาวิย ขายนฺติฯ เอโก กิร มิจฺฉาทิฏฺฐิโก พฺราหฺมโณ มรณมญฺเจ นิปฺปนฺโน โหติฯ ตสฺส อาจริยพฺราหฺมณา สมีเป ฐตฺวา พฺรหฺมโลกํ โภ คจฺฉาติ วทนฺติฯ ตสฺสปน อวีจินิรเย อคฺคิชาลา อุปฏฺฐหนฺติฯ ตทา โส โภ อาจริยา สุวณฺณวณฺณา ปญฺญายนฺตีติ อาหฯ เอส โภ พฺรหฺมโลโกฯ ตตฺถ คจฺฉาติ วทนฺติฯ โส กาลงฺกตฺวา อวีจิมฺหิ อุปฺปชฺชิฯ เอวํ นิมิตฺตสฺสาทวเสน เต กามียนฺติฯ ตตฺถ อุปฺปนฺนานํปิ ภวนิกนฺตินาม โหตีติฯ อปิจ, ตตฺถ อุปฺปนฺนา อวิกฺขมฺภิตกามราคาเอว โหนฺติ, โอกาเส สติ กามรติยา รมิสฺสนฺติ เยวาติฯ ตสฺมิํ กาเม อวจรตีติ กามาวจรํฯ