เมนู

กมฺเม – ‘‘ปาเทหิ ปหรียตีติ ปาทปหารโก’’ติ วุตฺติยํ วุตฺตํฯ ติติกฺขตีติ ติติกฺขโก, ติกิจฺฉตีติ ติกิจฺฉโก, วีมํสตีติ วีมํสโก, พุภุกฺขตีติ พุภุกฺขโก, ปพฺพตายตีติ ปพฺพตายโก อิจฺจาทิฯ

อิติ อกปจฺจยราสิฯ

อิวณฺณนฺตรูปราสิ

อถ อิวณฺณนฺตรูปานิ วุจฺจนฺเตฯ

[792] ทาธาตฺวิ [ก. 551; รู. 598; นี. 1138]

ทา, ธาหิ ภาวการเกสุ อิปจฺจโย โหติฯ

ปฐมํ จิตฺเตน อาทียตีติอาทิ, ตณฺหาทิฏฺฐีหิ อุปาทียตีติ อุปาทิ, ขนฺธุปาทิ, กิเลสุปาทิ, วิธานํ วิธิ, วิธิยฺยติ เอเตนาติ วิธิ, นิธิยฺยตีติ นิธิ, สนฺธิยเต สนฺธิ, อภิสนฺธิ, ปฏิสนฺธิ, สนฺนิทหนํ สนฺนิธิ, สมาธานํ สมาธิ, สมาทหนฺติ เอเตนาติ สมาธิ, ปณิทหนํ ปณิธิ, โอธิ, อวธิ, อุปนิธิ, ปฏินิธิ, อุทกํ ทหติ ติฏฺฐติ เอตฺถาติ อุทธิ, มหนฺโต อุทธิ มโหทธิ, วาลานิ ทหนฺติ ติฏฺฐนฺติ เอตฺถาติ วาลธิฯ

[793] อิกิตี สรูเป [ก. 669; รู. 679; นี. 1315]

ธาตูนํ สุติสงฺขาเต สรูเป วตฺตพฺเพ กฺริยตฺถา ปรํ อิ, กิ, ติปจฺจยา โหนฺติฯ

อวณฺณุปนฺเตหิ อิ, คมิ, ปจิ อิจฺจาทิฯ

อุวณฺณุปนฺเตหิ กิ, พุธิ, รุธิ อิจฺจาทิฯ

เกหิจิติ, กโรติสฺส, อตฺถิสฺส อิจฺจาทิฯ

[794] สีลาภิกฺขญฺญาวสฺสเกสุ ณี [ก. 532, 636; รู. 590, 659; นี. 1114, 1245]