เมนู

ฆาเตตุํ อรหตีติ ฆาเตตาโย, ชาเปตุํ อรหตีติ ชาเปตาโย, ‘ชาเปตุ’นฺติ หาเปตุํ, ปพฺพาเชตุํ อรหตีติ ปพฺพาเชตาโย, มหาวุตฺตินา อายมฺหิ สพินฺทุโน อุสฺส โลโปฯ

อิติ หิต, สาธุ, อรหราสิฯ

วิกติราสิ

[536] ตสฺส วิการาวยเวสุ ณ ณิก เณยฺยมยา [ก. 352, 351, 372; รู. 376, 374, 385; นี. 765, 764, 798; จํ. 3.3.103; ปา. 4.3.134]

ตสฺส วิกาโร, ตสฺส อวยโวติ อตฺเถสุ ณาทโย โหนฺติ, ปกติยา อุตฺตริ อวตฺถนฺตราปตฺติ วิกาโรฯ

อุทุมฺพรสฺส วิกติ โอทุมฺพรํ, ภสฺมา, อุทุมฺพรสฺส อวยโว โอทุมฺพรํ, ปณฺณาทิฯ กโปตาวยโว กาโปตํ, มํสโลหิตปตฺตาทิฯ

ณิกมฺหิ-กปฺปาสสฺส วิกติ กปฺปาสิกํ, สุตฺตํ วตฺถญฺจฯ

เณยฺยมฺหิ-เอณิสฺส อวยโว เอเณยฺยํ, มํสํฯ โกสกิมีนํ วิกติ โกเสยฺยํ, สุตฺตํ วตฺถญฺจฯ

มยมฺหิ-ติณานํ วิกติ ติณมยํฯ เอวํ ทารุมยํ, นฬมยํ, มตฺติกามยํ, คุนฺนํ วิกติ โคมยํ, กรีสํฯ

[537] ชตุโต มยณ วา [ก. 372; รู. 385; นี. 798; จํ. 3.3.108; ปา. 4.3.138; ชตุโต สณ วา (พหูสุ)]

ตสฺส วิการาวยเวสุ ชตุโต มยณ โหติ วาฯ

ชตุโน วิกาโร ชตุมยํฯ

อิติ วิกติราสิฯ

วิเสสราสิ

[538] ตรตมิสฺสิกิยิฏฺฐาติสเย [ก. 363; รู. 390; นี. 786; จํ. 4.3.45; ปา. 5.3.55, 57]

อติสยตฺเถ เอเต ปจฺจยา ภวนฺติฯ

ปาปานํ อติสเยน ปาโปติ ปาปตโร, ปาปตโม, ปาปิสฺสิโก, ปาปิโย, ปาปิฏฺโฐ, อิตฺถิยํ ปาปตรา, อติสยโตปิ อติสยปจฺจโย โหติ, อติสเยน ปาปิฏฺโฐ ปาปิฏฺฐตโรฯ

[539] วจฺฉาทีหิ ตนุตฺเต ตโร [ก. 363; รู. 390; นี. 786; จํ. 4.3.74; ปา. 5.3.91]

วจฺฉาทีหิ สพฺพตนุภาเว ตโร โหติฯ

อติตรุโณ วจฺโฉ วจฺฉตโร, อิตฺถิยํ วจฺฉตรีฯ โยพฺพนสฺส ตนุตฺเต โยพฺพนปตฺตานํ สุสุตฺตสฺส ตนุตฺเต อติตรุโณ อุสโภ อุกฺขตโร, อสฺสภาวสฺส ตนุตฺเต ตรุณอสฺโส อสฺสตโร, อิตฺถิยํ อสฺสตรีฯ สามตฺถิยสฺส ตนุตฺเต ตรุณอุสโภ อุสภตโรฯ

[540] กิํมฺหา นิทฺธารเณ ตรตมา [ก. 363; รู. 390; นี. 786; จํ. 4.3.77; ปา. 5.3.92, 93; ‘…รตร รตมา’ (พหูสุ)]

กิํสทฺทา นิทฺธารเณ คมฺยมาเน ตร, ตมา โหนฺติฯ

กตโร ภวตํ เทวทตฺโต, กตโร ภวตํ ยญฺญทตฺโต, กตโม ภวตํ เทวทตฺโต, กตโม ภวตํ ยญฺญทตฺโต, ‘กิสฺส โก’ติ สุตฺเตน ตร, ตเมสุ กิสฺส กตฺตํฯ

อิติ วิเสสราสิฯ

สมูหราสิ

[541] สมูเห กณณณิกา [ก. 354; รู. 379; นี. 771; จํ. 3.1.43-47; ปา. 4.2.37-42]

ตสฺส สมูโหติ อตฺเถ กณ, ณ, ณิกา โหนฺติฯ

โคตฺตปจฺจยนฺเตหิ ตาว – ราชญฺญานํ สมูโห ราชญฺญกํ, มานุสฺสกํฯ

อุกฺขาทีหิ-อุกฺขานํ อุสภานํ สมูโห โอกฺขกํ, โอฏฺฐานํ สมูโห โอฏฺฐกํ, อุรพฺภานํ สมูโห โอรพฺภกํฯ เอวํ ราชกํ, ราชปุตฺตกํ, หตฺถิกํ, เธนุกํ, สสํ อเทนฺติ ภกฺขนฺตีติ สสาทกา, เตสํ สมูโห สสาทกกํฯ อิกฺขณิกํฯ

ณมฺหิ-อมิตฺตานํ สมูโห อมิตฺตํฯ

ณิกมฺหิ-อปูปานํ สมูโห อาปูปิกํ, สกุณานํ สมูโห สากุณิโก [สํกุลานํ สมูโห สํกุลิกํ?]

[542] ชนาทีหิ ตา [ก. 355; รู. 380; นี. 771; จํ. 3.1.69; ปา. 4.2.43]

ตสฺส สมูโหติ อตฺเถ ตา โหติฯ

ชนตา, ราชตา, พนฺธุตา, คามตา, สหายตา, นครวาสีนํ สมูโห นาครตา อิจฺจาทิฯ

[543] อยูภทฺวิตีหํเส [ก. 354; รู. 379; นี. 771; จํ. 4.2.47, 48; ปา. 5.2.43, 44]

อุภ, ทฺวิ, ตีหิ ตสฺส อํสตฺเถ อโย โหติฯ

อุโภ อํสา ภาคา อสฺสาติ อุภยํ, ทฺเว อํสา อสฺสาติ ทฺวยํ, ตโย อํสา อสฺสาติ ตยํ, วตฺถุตฺตยํ, รตนตฺตยํ, ทฺเว วา ตโย วา อํสา อสฺสาติ ทฺวตฺตยํฯ

อิติ สมูหราสิฯ