‘‘โยนิโส อุปายโส, ฐานโส, เหตุโส, อตฺถโส, ธมฺมโส, สุตฺตโส, อนุพฺยญฺชนโส’’ อิจฺจาทีสุ ปน มหาวุตฺตินา ตติเยกวจนสฺส โสตฺตํฯ ตถา ทีฆโส, โอรโส อิจฺจาทิฯ
อิติ ปการราสิฯ
กุลราสิ
[524] ปิติโต ภาตริ เรยฺยณ [ก. 352; รู. 376; นี. 765]ฯ
ปิตุสทฺทมฺหา ตสฺส ภาตาติ อตฺเถ เรยฺยณ โหติฯ
ปิตุ ภาตา เปตฺเตยฺโย [อ. นิ. 6.44]ฯ ‘รานุพนฺเธนฺตสราทิสฺสา’ติ อุสฺส โลโป, ตสฺส ทฺวิตฺตํฯ
[525] มาติโต จ ภคินิยํ โฉ [ก. 352; รู. 376; นี. 765]ฯ
มาติโต ปิติโต จ ภคินิยํ โฉ โหติฯ
มาตุ ภคินี มาตุจฺฉา [อุทา. 22], ปิตุ ภคินี ปิตุจฺฉา [สํ. นิ. 2.243]ฯ
[526] มาตาปิตูสฺวามโห [ก. 352; รู. 376; นี. 765; จํ. 3.1.60; ปา. 4.2.36]ฯ
มาตาปิตูหิ เตสํ มาตาปิตูสุ อามโห โหติฯ
มาตุ มาตา มาตามหี, มาตุ ปิตา มาตามโห [ม. นิ. 2.411], ปิตุ มาตา ปิตามหี, ปิตุ ปิตา ปิตามโหฯ
อิติ กุลราสิฯ