เอวํ วีโส, ตีโส, จตฺตาลีโส, ปญฺญาโส, สหสฺโส พฺรหฺมา, ทฺวิสหสฺโส พฺรหฺมา, ทสสหสฺโส พฺรหฺมาฯ เอตฺถ จ ‘‘สหสฺสปริมาณํ จกฺกวาฬํ อสฺสาติ สหสฺโส’’-อิจฺจาทินา ณปจฺจเยน สิชฺฌติฯ

ปริมาณราสิ นิฏฺฐิโตฯ

สงฺขฺยาราสิ

[504] เอกา กากฺยสหาเย [ก. 391; รู. 423; นี. 835; จํ. 4.2.67; ปา. 5.3.52]ฯ

อสหายตฺเถ เอกมฺหา ก, อากี โหนฺติ วาฯ

อสหาโย เอโก, เอกโก, เอกากี, เอโก วาฯ

อิตฺถิยํ เอกิกา, เอกากินี, เอกา วา, ‘อธาตุสฺส เก’ติ สุตฺเตน อิตฺถิยํ กมฺหิ ปเร อสฺส อิตฺตํฯ

[505] ทฺวิติ จตูหิ ตียตฺถา [ก. 385; รู. 409; นี. 817; ติสตฺถา?]ฯ

เตหิ ตสฺส ปูรณนฺติ อตฺเถ ตีโย จ ตฺโถ จ โหนฺติฯ

[506] ทฺวิตีนํ ทุตา ตีเย [ก. 386, 410; นี. 818; ติเย?]ฯ

ตีเย ปเร ทฺวิ, ติสทฺทานํ ทุ, ตาเทสา โหนฺติฯ

ทฺวินฺนํ ปูรโณ ทุตีโย [ฉฏฺฐสํคีติ ปาเฐสุ ทุติโยตฺยาทินา ทิสฺสนฺติ], ทฺวินฺนํ ปูรณี ทุตียา, ทฺวินฺนํ ปูรณํ ทุตียํฯ เอวํ ตตีโย, ตตียา, ตตียํฯ จตุนฺนํ ปูรโณ จตุตฺโถ, จตุตฺถี, จตุตฺถํฯ

[507] ม ปญฺจาทิกติหิ [ก. 373; รู. 406; นี. 802; จํ. 4.2.55; ปา. 5.2.49]ฯ