อูการนฺตปุลฺลิงฺคราสิ

‘คสีน’นฺติ โลโป, สยมฺภู คจฺฉติฯ ‘โลโป’ติ โยนํ โลโป, สยมฺภู คจฺฉนฺติฯ

ปกฺเข –

‘ชนฺตาทิโต โน จา’ติ โยนํ โว, โน, สยมฺภุโว, สยมฺภุโนฯ

‘เค วา’ติ เค ปเร วิกปฺเปน รสฺโส, โภ สยมฺภุ, โภ สยมฺภู, โภนฺโต สยมฺภู, สยมฺภุโว, สยมฺภุโนฯ

‘เอกวจนโยสฺวโฆน’นฺติ อมาทีสุ เอกวจเนสุ นิจฺจํ รสฺโส, สยมฺภุํ, คาถายํ ‘สยมฺภุน’นฺติปิ ยุชฺชติฯ

สยมฺภู, สยมฺภุโว, สยมฺภุโนฯ สยมฺภุนา, สยมฺภูหิ, สยมฺภูภิ, สยมฺภุสฺส, สยมฺภุโน, สยมฺภูนํฯ สยมฺภุสฺมา, สยมฺภุมฺหา, สยมฺภุนา, สยมฺภูหิ, สยมฺภูภิ, สยมฺภุสฺส, สยมฺภุโน, สยมฺภูนํฯ สยมฺภุสฺมิํ, สยมฺภุมฺหิ, สยมฺภูสุฯ

เอวํ อภิภู, ปราภิภู, เวสฺสภู, โคตฺรภู, วตฺรภู อิจฺจาทิฯ เสเสสุ ปน โยนํ โน เอว ลพฺภติ, จิตฺตสหภุโน ธมฺมา [ธ. ส. ทุกมาติกา 61]ฯ

[194] กูโต [ก. 119; รู. 155; นี. 294]ฯ

ปุเม กูปจฺจยนฺเตหิ โยนํ โน โหติ วาฯ

สพฺพญฺญู, สพฺพญฺญุโนฯ เสสํ สุวิญฺเญยฺยํฯ

วิญฺญู , วทญฺญู, อตฺถญฺญู, ธมฺมญฺญู, มตฺตญฺญู, วิทูฯ อิธ กูสทฺเทน รูปจฺจยนฺตาปิ คยฺหนฺติ, เวทคู, ปารคูฯ ตถา ภีรู, ปภงฺคู, วิราคูอิจฺจาทิ จฯ

อูการนฺตปุลฺลิงฺคราสิ นิฏฺฐิโตฯ

โอการนฺโต ปน โคสทฺโท เอว, โส ปุพฺเพ วุตฺโตเยวฯ

ปุลฺลิงฺคราสิ นิฏฺฐิโตฯ

นปุํสกลิงฺคราสิ

อการนฺตนปุํสก จิตฺตาทิราสิ

อถ นปุํสกลิงฺคํ ทีปิยเตฯ ตํ ปน ปญฺจวิธํ อทนฺตํ, อิทนฺตํ อีทนฺตํ, อุทนฺตํ, อูทนฺตนฺติฯ

[195] อํ นปุํสเก [ก. 125; รู. 198; นี. 300]ฯ

นปุํสเก อโต สิสฺส อํ โหติฯ

จิตฺตํฯ

[196] โยนํ นิ [ก. 218; รู. 196; นี. 445]ฯ

นปุํสเก อโต โยนํ นิ โหติฯ ‘โยโลปนีสู’ติ นิมฺหิ ทีโฆฯ

จิตฺตานิฯ

[197] นีนํ วา [ก. 107; รู. 69; นี. 275; ‘นีน วา’ (พหูสุ)]ฯ

อโต นีนํ ฏา, เฏ โหนฺติ วาฯ

จิตฺตา, เห จิตฺต, เห จิตฺตา, เห จิตฺตานิ, เห จิตฺตา วา, จิตฺตํ, จิตฺตานิ, จิตฺเต, จิตฺเตนฯ เสสํ ปุริสสมํฯ