อญฺญาณกถา

ปุจฺฉา – อภิธมฺมปิฏเก อาวุโส กถาวตฺถุปฺปกรเณ ทุติยวคฺเค ทุติยา อญฺญาณกถา อายสฺมตา มหาโมคฺคลิปุตฺตติสฺสตฺเถเรน กถํ วิตฺถารโต วิภชิตฺวา กถิตาฯ

วิสฺสชฺชนา – อภิธมฺมปิฏเก ภนฺเต ปญฺจเม กถาวตฺถุปฺปกรเณ ทุติยวคฺเค ทุติยา อญฺญาณกถา ‘‘อตฺถิ อรหโต อญฺญาณนฺติ, อามนฺตาฯ อตฺถิ อรหโต อวิชฺชา อวิชฺโชโฆ อวิชฺชาโยโค อวิชฺชานุสโย อวิชฺชาปริยุฏฺฐานํ อวิชฺชาสํโยชนํ อวิชฺชานีวรณนฺติ, น เหวํ วตฺตพฺเพฯ นตฺถิ อรหโต อวิชฺชา อวิชฺโชโฆ อวิชฺชาโยโค อวิชฺชานุสโย อวิชฺชาปริยุฏฺฐานํ อวิชฺชาสํโยชนํ อวิชฺชานิวรณนฺติ, อามนฺตาฯ หญฺจิ นตฺถิ อรหโต อวิชฺชา อวิชฺโชโฆ อวิชฺชาโยโค อวิชฺชานุสโย อวิชฺชาปริยุฏฺฐานํ อวิชฺชาสํโยชนํ อวิชฺชานีวรณํ, โน จ วต เร วตฺตพฺเพ ‘‘อตฺถิ อรหโต อญฺญาณ’’นฺติ เอวมาทินา อายสฺมตา มหาโมคฺคลิปุตฺตติสฺสตฺเถเรน วิตฺถารโต วิภชิตฺวา ภาสิตาฯ

อสญฺญกถา

ปุจฺฉา – อภิธมฺมปิฏเก อาวุโส ปญฺจเม กถาวตฺถุปฺปกรเณ ตติยวคฺเค เอกาทสมา อสญฺญกถา อายสฺมตา มหาโมคฺคลิปุตฺตติสฺสตฺเถเรน กถํ วิตฺถารโต วิภชิตฺวา กถิตาฯ

วิสฺสชฺชนา – อภิธมฺมปิฏเก ภนฺเต ปญฺจเม กถาวตฺถุปฺปกรเณ ตติยวคฺเค เอกาทสมา อสญฺญกถา ‘‘อสญฺญสตฺเตสุ สญฺญา อตฺถีติ, อามนฺตาฯ สญฺญาภโว สญฺญาคติ สญฺญาสตฺตาวาโส สญฺญาสํสาโร สญฺญาโยนิ สญฺญตฺตภาวปฏิลาโภติ, น เหวํ วตฺตพฺเพ’’ติ เอวมาทินา อายสฺมตา มหาโมคฺคลิปุตฺตติสฺสตฺเถเรน วิตฺถารโต วิภชิตฺวา กถิตาฯ