ธมฺมานุโลมปจฺจนียปฏฺฐาน

ปุจฺฉา – เตนาวุโส ภควตา…เป.… ตติยํ ธมฺมานุโลมปจฺจนียปฏฺฐานํ กถํ วิตฺถารโต วิภชิตฺวา เทสิตํฯ

วิสฺสชฺชนา – อภิธมฺมปิฏเก…เป.… ตติยํ ธมฺมานุโลมปจฺจนียปฏฺฐานํ ‘‘กุสลํ ธมฺมํ ปฏิจฺจ นกุสโล ธมฺโม อุปฺปชฺชติ เหตุปจฺจยาฯ กุสเล ขนฺเธ ปฏิจฺจ จิตฺตสมุฏฺฐานรูปํฯ กุสลํ ธมฺมํ ปฏิจฺจ นอกุสโล ธมฺโม อุปฺปชฺชติ เหตุปจฺจยาฯ กุสลํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํฯ ตโย ขนฺเธ ปฏิจฺจ เอโก ขนฺโธ จิตฺตสมุฏฺฐานญฺจ รูปํฯ ทฺเว ขนฺเธ ปฏิจฺจ ทฺเว ขนฺธา จิตฺตสมุฏฺฐานญฺจ รูปํฯ กุสลํ ธมฺมํ ปฏิจฺจ นอพฺยากโต ธมฺโม อุปฺปชฺชติ เหตุปจฺจยาฯ กุสลํ เอกํ ขนฺธํ ปฏิจฺจ ตโย ขนฺธา, ตโย ขนฺเธ ปฏิจฺจ เอโก ขนฺโธ, ทฺเว ขนฺเธ ปฏิจฺจ ทฺเว ขนฺธาฯ กุสลํ ธมฺมํ ปฏิจฺจ นอกุสโล จ นอพฺยากโต จ ธมฺมา อุปฺปชฺชนฺติ เหตุปจฺจยาฯ

กุสลํ เอกํ ขนฺธํ ปฏิจฺจ ตโย ขนฺธา…เป.… ทฺเว ขนฺเธ ปฏิจฺจ ทฺเว ขนฺธาฯ กุสลํ ธมฺมํ ปฏิจฺจ นกุสโล จ นอกุสโล จ ธมฺมา อุปฺปชฺชนฺติ เหตุปจฺจยาฯ กุสเล ขนฺเธ ปฏิจฺจ จิตฺตสมุฏฺฐานรูป’’นฺติ เอวมาทินา ภนฺเต ติกปฏฺฐานาทีหิ ฉหิ อนฺโตคธปฏฺฐาเนหิ เอเกกสฺมิญฺจ ติกปฏฺฐาเน ทุกปฏฺฐาเน ติกทุกปฏฺฐาเน ทุกติกปฏฺฐาเน ติกติกปฏฺฐาเน ทุกทุกปฏฺฐาเน สตฺตหิ สตฺตหิ มหาวาเรหิ เอเกกสฺมิญฺจ มหาวาเร จตูหิ จตูหิ นเยหิ ภควตา วิตฺถารโต วิภชิตฺวา เทสิตํฯ

ธมฺมปจฺจนียานุโลมปฏฺฐาน

ปุจฺฉา – เตนาวุโส ภควตา…เป.… ธมฺมานุโลมาทีสุ ปธานภูเตสุ จตูสุ ปฏฺฐาเนสุ จตุตฺถํ ปริโยสานภูตํ ธมฺมปจฺจนียานุโลมปฏฺฐานํ กถํ วิตฺถารโต วิภชิตฺวา เทสิตํฯ

วิสฺสชฺชนา – อภิธมฺมปิฏเก ภนฺเต…เป.… ธมฺมานุโลมปฏฺฐานาทีสุ จตูสุ ปธานภูเตสุ มหาปฏฺฐาเนสุ จตุตฺถํ ปริโยสานภูตํ ธมฺมปจฺจนียานุโลมปฏฺฐานํ ‘‘นกุสลํ ธมฺมํ ปฏิจฺจ อกุสโล ธมฺโม อุปฺปชฺชติ เหตุปจฺจยา, อกุสลํ เอกํ ขนฺธํ ปฏิจฺจ ตโย ขนฺธา, ตโย ขนฺเธ ปฏิจฺจ เอโก ขนฺโธ, ทฺเว ขนฺเธ ปฏิจฺจ ทฺเว ขนฺธาฯ นกุสลํ ธมฺมํ ปฏิจฺจ นอกุสโล ธมฺโม อุปฺปชฺชติ เหตุปจฺจยาฯ อกุสเล ขนฺเธ ปฏิจฺจ จิตฺตสมุฏฺฐานรูปํ, วิปากาพฺยากตํ กฺริยาพฺยากตํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป.… ทฺเว ขนฺเธ ปฏิจฺจ ทฺเว ขนฺธา จิตฺตสมุฏฺฐานญฺจ รูปํฯ ขนฺเธ ปฏิจฺจ วตฺถุ, วตฺถุํ ปฏิจฺจ ขนฺธาฯ นกุสลํ ธมฺมํ ปฏิจฺจ นอพฺยากโต ธมฺโม อุปฺปชฺชติ เหตุปจฺจยา, อกุสลํ เอกํ ขนฺธํ ปฏิจฺจ ตโย ขนฺธา, ตโย ขนฺเธ ปฏิจฺจ เอโก ขนฺโธ, ทฺเว ขนฺเธ ปฏิจฺจ ทฺเว ขนฺธา’’ติ เอวมาทินา ติกปฏฺฐานาทีหิ จาติ อนฺโตคธปเภทปฏฺฐาเนหิ เอเกกสฺมิญฺจ ติกปฏฺฐาเน ทุกปฏฺฐาเน ทุกติกติกทุกติกติกทุกทุกปฏฺฐาเน ปฏิจฺจวาราทีหิ สตฺตหิ มหาวาเรหิ เอเกกสฺมิญฺจ มหาวาเร ปจฺจยานุโลมาทีหิ จตูหิ จตูหิ นเยหิ ภควตา วิตฺถารโต วิภชิตฺวา เทสิตํฯ