2. วิธาสุตฺตํ

[162] ‘‘ติสฺโส อิมา, ภิกฺขเว, วิธาฯ กตมา ติสฺโส? ‘เสยฺโยหมสฺมี’ติ วิธา, ‘สทิโสหมสฺมี’ติ วิธา, ‘หีโนหมสฺมี’ติ วิธา – อิมา โข, ภิกฺขเว, ติสฺโส วิธาฯ อิมาสํ โข, ภิกฺขเว, ติสฺสนฺนํ วิธานํ อภิญฺญาย ปริญฺญาย ปริกฺขยาย ปหานาย อริโย อฏฺฐงฺคิโก มคฺโค ภาเวตพฺโพฯ กตโม อริโย อฏฺฐงฺคิโก มคฺโค? อิธ, ภิกฺขเว, ภิกฺขุ สมฺมาทิฏฺฐิํ ภาเวติ…เป.… สมฺมาสมาธิํ ภาเวติ วิเวกนิสฺสิตํ วิราคนิสฺสิตํ นิโรธนิสฺสิตํ โวสฺสคฺคปริณามิํ…เป.… อิมาสํ โข, ภิกฺขเว ติสฺสนฺนํ วิธานํ อภิญฺญาย ปริญฺญาย ปริกฺขยาย ปหานาย อยํ อริโย อฏฺฐงฺคิโก มคฺโค ภาเวตพฺโพ’’ติฯ (ยถา เอสนา, เอวํ วิตฺถาเรตพฺพํ)ฯ ทุติยํฯ

3. อาสวสุตฺตํ

[163] ‘‘ตโยเม, ภิกฺขเว, อาสวาฯ กตเม ตโย? กามาสโว, ภวาสโว, อวิชฺชาสโว – อิเม โข, ภิกฺขเว, ตโย อาสวาฯ อิเมสํ โข, ภิกฺขเว, ติณฺณนฺนํ อาสวานํ อภิญฺญาย ปริญฺญาย ปริกฺขยาย ปหานาย…เป.… อยํ อริโย อฏฺฐงฺคิโก มคฺโค ภาเวตพฺโพ’’ติฯ ตติยํฯ

4. ภวสุตฺตํ

[164] ‘‘ตโยเม, ภิกฺขเว, ภวาฯ กตเม ตโย? กามภโว , รูปภโว, อรูปภโว – อิเม โข, ภิกฺขเว, ตโย ภวาฯ อิเมสํ โข, ภิกฺขเว, ติณฺณนฺนํ ภวานํ อภิญฺญาย ปริญฺญาย ปริกฺขยาย ปหานาย…เป.… อยํ อริโย อฏฺฐงฺคิโก มคฺโค ภาเวตพฺโพ’’ติฯ จตุตฺถํฯ

5. ทุกฺขตาสุตฺตํ

[165] ‘‘ติสฺโส อิมา, ภิกฺขเว, ทุกฺขตาฯ กตมา ติสฺโส? ทุกฺขทุกฺขตา, สงฺขารทุกฺขตา, วิปริณามทุกฺขตา – อิมา โข, ภิกฺขเว, ติสฺโส ทุกฺขตาฯ อิมาสํ โข, ภิกฺขเว, ติสฺสนฺนํ ทุกฺขตานํ อภิญฺญาย ปริญฺญาย ปริกฺขยาย ปหานาย…เป.… อฏฺฐงฺคิโก มคฺโค ภาเวตพฺโพ’’ติฯ ปญฺจมํฯ

6. ขิลสุตฺตํ

[166] ‘‘ตโยเม , ภิกฺขเว, ขิลาฯ กตเม ตโย? ราโค ขิโล, โทโส ขิโล, โมโห ขิโล – อิเม โข, ภิกฺขเว, ตโย ขิลาฯ อิเมสํ โข, ภิกฺขเว, ติณฺณนฺนํ ขิลานํ อภิญฺญาย ปริญฺญาย ปริกฺขยาย ปหานาย…เป.… อยํ อริโย อฏฺฐงฺคิโก มคฺโค ภาเวตพฺโพ’’ติฯ ฉฏฺฐํฯ

7. มลสุตฺตํ

[167] ‘‘ตีณิมานิ, ภิกฺขเว, มลานิฯ กตมานิ ตีณิ? ราโค มลํ, โทโส มลํ, โมโห มลํ – อิมานิ โข, ภิกฺขเว, ตีณิ มลานิฯ อิเมสํ โข, ภิกฺขเว, ติณฺณนฺนํ มลานํ อภิญฺญาย ปริญฺญาย ปริกฺขยาย ปหานาย…เป.… อยํ อริโย อฏฺฐงฺคิโก มคฺโค ภาเวตพฺโพ’’ติฯ สตฺตมํฯ

8. นีฆสุตฺตํ

[168] ‘‘ตโยเม, ภิกฺขเว, นีฆาฯ กตเม ตโย? ราโค นีโฆ, โทโส นีโฆ, โมโห นีโฆ – อิเม โข, ภิกฺขเว, ตโย นีฆาฯ อิเมสํ โข, ภิกฺขเว, ติณฺณนฺนํ นีฆานํ อภิญฺญาย ปริญฺญาย ปริกฺขยาย ปหานาย…เป.… อยํ อริโย อฏฺฐงฺคิโก มคฺโค ภาเวตพฺโพ’’ติฯ อฏฺฐมํฯ

9. เวทนาสุตฺตํ

[169] ‘‘ติสฺโส อิมา, ภิกฺขเว, เวทนาฯ กตมา ติสฺโส? สุขา เวทนา, ทุกฺขา เวทนา, อทุกฺขมสุขา เวทนา – อิมา โข, ภิกฺขเว, ติสฺโส เวทนาฯ อิมาสํ โข, ภิกฺขเว, ติสฺสนฺนํ เวทนานํ อภิญฺญาย ปริญฺญาย ปริกฺขยาย ปหานาย…เป.… อยํ อริโย อฏฺฐงฺคิโก มคฺโค ภาเวตพฺโพ’’ติฯ นวมํฯ

10. ตณฺหาสุตฺตํ

[170] ‘‘ติสฺโส อิมา, ภิกฺขเว, ตณฺหาฯ กตมา ติสฺโส? กามตณฺหา, ภวตณฺหา, วิภวตณฺหา – อิมา โข, ภิกฺขเว, ติสฺโส ตณฺหาฯ อิมาสํ โข, ภิกฺขเว, ติสฺสนฺนํ ตณฺหานํ อภิญฺญาย ปริญฺญาย ปริกฺขยาย ปหานาย…เป.… อยํ อริโย อฏฺฐงฺคิโก มคฺโค ภาเวตพฺโพฯ กตโม อริโย อฏฺฐงฺคิโก มคฺโค? อิธ, ภิกฺขเว , ภิกฺขุ สมฺมาทิฏฺฐิํ ภาเวติ วิเวกนิสฺสิตํ วิราคนิสฺสิตํ นิโรธนิสฺสิตํ โวสฺสคฺคปริณามิํ…เป.… สมฺมาสมาธิํ ภาเวติ วิเวกนิสฺสิตํ วิราคนิสฺสิตํ นิโรธนิสฺสิตํ โวสฺสคฺคปริณามิํฯ อิมาสํ โข, ภิกฺขเว, ติสฺสนฺนํ ตณฺหานํ อภิญฺญาย ปริญฺญาย ปริกฺขยาย ปหานาย…เป.… อยํ อริโย อฏฺฐงฺคิโก มคฺโค ภาเวตพฺโพ’’ติฯ ทสมํฯ