1. เอกธมฺมสุตฺตํ

[977] สาวตฺถินิทานํ ฯ ตตฺร โข…เป.… เอตทโวจ – ‘‘เอกธมฺโม, ภิกฺขเว, ภาวิโต พหุลีกโต มหปฺผโล โหติ มหานิสํโสฯ กตโม เอกธมฺโม? อานาปานสฺสติ [อานาปานสติ (สี. ปี.)]ฯ กถํ ภาวิตา จ, ภิกฺขเว, อานาปานสฺสติ กถํ พหุลีกตา มหปฺผลา โหติ มหานิสํสา? อิธ, ภิกฺขเว, ภิกฺขุ อรญฺญคโต วา รุกฺขมูลคโต วา สุญฺญาคารคโต วา นิสีทติ ปลฺลงฺกํ อาภุชิตฺวา อุชุํ กายํ ปณิธาย ปริมุขํ สติํ อุปฏฺฐเปตฺวาฯ โส สโตว อสฺสสติ, สโตว [สโต (พหูสุ) ตติยปาราชิเกปิ] ปสฺสสติฯ