วนฺทนาสุตฺต

ปุจฺฉา – มงฺคลวคฺเค ปนาวุโส นวมํ วนฺทนาสุตฺตํ ภควตา กถํ ภาสิตํฯ

วิสฺสชฺชนา – มงฺคลวคฺเค ภนฺเต นวมํ วนฺทนาสุตฺตํ ‘‘ติสฺโส อิมา ภิกฺขเว วนฺทนาฯ กตมา ติสฺโส, กาเยน วาจาย มนสาฯ อิมา โข ภิกฺขเว ติสฺโส วนฺทนา’’ติ, เอวํ โข ภนฺเต ภควตา ภาสิตํฯ

‘‘ติสฺโส อิมา ภิกฺขเว วนฺทนาฯ กตมา ติสฺโส, กาเยน วาจาย มนสาฯ อิมา โข ภิกฺขเว ติสฺโส วนฺทนา’’ฯ

ปุพฺพณฺหสุตฺต

ปุจฺฉา – ตตฺโถ อาวุโส ทสมํ ปุพฺพณฺหสุตฺตํ ภควตา กถํ ภาสิตํฯ

วิสฺสชฺชนา – ทสมํ ภนฺเต ปุพฺพณฺหสุตฺตํ ‘‘เย ภิกฺขเว สตฺตา ปุพฺพณฺหสมยํ กาเยน สุจริตํ จรนฺติ, วาจาย สุจริตํ จรนฺติ, มนสา สุจริตํ จรนฺติฯ สุปุพฺพณฺโห ภิกฺขเว เตสํ สตฺตานํฯ เย ภิกฺขเว สตฺตา มชฺฌนฺหิกสมยํ…เป.… สายนฺหสมยํ กาเยน สุจริตํ จรนฺติ, วาจาย สุจริตํ จรนฺติ, มนสา สุจริตํ จรนฺติฯ สุสายนฺโห ภิกฺขเว เตสํ สตฺตาน’’นฺติ เอวมาทินา ภนฺเต ภควตา ภาสิตํฯ