เมนู

มหาปรินิพฺพานสุตฺต

ปุจฺฉา – มหาปรินิพฺพานสุตฺตํ ปนาวุโส พหุอนุสนฺธิกํ, พหุเทสนา สงฺคหํ, พุทฺธสฺส ภควโต ปรินิพฺพานาสนฺนวสฺเส ปวตฺตอฏฺฐุปฺปตฺติทีปกวจนปพนฺธภูตํ, ตสฺมา ตํ อนฺตราเภทวเสน วิภชฺช ปริจฺฉิชฺช ปริจฺฉิชฺช ปุจฺฉิสฺสามิ, ตตฺถาวุโส ภควตา ปฐมํ

ราชูนํ อปริหานิยธมฺมเทสนา กตฺถ กํ อารพฺภ กิสฺมิํ วตฺถุสฺมิํ ภาสิตาฯ

วิสฺสชฺชนา – ราชคเห ภนฺเต วสฺสการํ พฺราหฺมณํ มคธมหามตฺตํ อารพฺภ ภาสิตา, วสฺสกาโร ภนฺเต พฺราหฺมโณ มคธมหามตฺโต ภควนฺตํ อุปสงฺกมิตฺวา เอตทโวจ ‘‘ราชา โภ โคตม มาคโธ อชาตสตฺตุ เวเทหิปุตฺโต วชฺชี อภิยาตุกาโม โส เอวมาห อหํ หิเม วชฺชี เอวํ มหิทฺธิเก เอวํ มหานุภาเว อุจฺเฉจฺฉามิ วชฺชี วินาเสสฺสามิ วชฺชี อนยพฺยสนํ อาปาเทสฺสามี วชฺชี’’ติ ตสฺมิํ ภนฺเต วตฺถุสฺมิํ ภาสิตาฯ

ปุจฺฉา – ภิกฺขูนํ ปนาวุโส อปริหานิยธมฺมเทสนา ภควตา กตฺถ กิสฺมิํ วตฺถุสฺมิํ ภาสิตาฯ

วิสฺสชฺชนา – ตสฺมิํเยว ภนฺเต ราชคเห ตสฺมิํเยว วตฺถุสฺมิํ ภาสิตาฯ

ชราสุตฺต

ปุจฺฉา – ธมฺมาทาโส อาวุโส ธมฺมปริยาโย ภควตา กตฺถ กํ อารพฺภ กิสฺมิํ วตฺถุสฺมิํ ภาสิโตฯ

วิสฺสชฺชนา – นาติเก ภนฺเต คิญฺชกาวสเถ อายสฺมนฺตํ อานนฺท อารพฺภ ภาสิโต, อายสฺมา ภนฺเต อานนฺโท ภควนฺตํ อุปสงฺกมิตฺวา นาติกิยานํ ทฺวาทสนฺนํ ปุคฺคลานํ คติอภิสมฺปรายํ ปุจฺฉิ, ตสฺมิํ ภนฺเต วตฺถุสฺมิํ ภาสิโตฯ