4. สุญฺญตสมาธิสุตฺตํ

[369] ‘‘กตโม จ, ภิกฺขเว, อสงฺขตคามิมคฺโค? สุญฺญโต สมาธิ, อนิมิตฺโต สมาธิ, อปฺปณิหิโต สมาธิ – อยํ วุจฺจติ, ภิกฺขเว, อสงฺขตคามิมคฺโค…เป.…ฯ จตุตฺถํฯ

5. สติปฏฺฐานสุตฺตํ

[370] ‘‘กตโม จ, ภิกฺขเว, อสงฺขตคามิมคฺโค? จตฺตาโร สติปฏฺฐานาฯ อยํ วุจฺจติ, ภิกฺขเว, อสงฺขตคามิมคฺโค…เป.…ฯ ปญฺจมํฯ

6. สมฺมปฺปธานสุตฺตํ

[371] ‘‘กตโม จ, ภิกฺขเว, อสงฺขตคามิมคฺโค? จตฺตาโร สมฺมปฺปธานาฯ อยํ วุจฺจติ, ภิกฺขเว, อสงฺขตคามิมคฺโค…เป.…ฯ ฉฏฺฐํฯ

7. อิทฺธิปาทสุตฺตํ

[372] ‘‘กตโม จ, ภิกฺขเว, อสงฺขตคามิมคฺโค? จตฺตาโร อิทฺธิปาทาฯ อยํ วุจฺจติ, ภิกฺขเว, อสงฺขตคามิมคฺโค…เป.…ฯ สตฺตมํฯ

8. อินฺทฺริยสุตฺตํ

[373] ‘‘กตโม จ, ภิกฺขเว, อสงฺขตคามิมคฺโค? ปญฺจินฺทฺริยานิฯ อยํ วุจฺจติ, ภิกฺขเว, อสงฺขตคามิมคฺโค…เป.…ฯ อฏฺฐมํฯ

9. พลสุตฺตํ

[374] ‘‘กตโม จ, ภิกฺขเว, อสงฺขตคามิมคฺโค? ปญฺจ พลานิฯ อยํ วุจฺจติ, ภิกฺขเว, อสงฺขตคามิมคฺโค…เป.…ฯ นวมํฯ

10. โพชฺฌงฺคสุตฺตํ

[375] ‘‘กตโม จ, ภิกฺขเว, อสงฺขตคามิมคฺโค? สตฺต โพชฺฌงฺคาฯ อยํ วุจฺจติ, ภิกฺขเว, อสงฺขตคามิมคฺโค…เป.…ฯ ทสมํฯ

11. มคฺคงฺคสุตฺตํ

[376] ‘‘กตโม จ, ภิกฺขเว, อสงฺขตคามิมคฺโค? อริโย อฏฺฐงฺคิโก มคฺโคฯ อยํ วุจฺจติ, ภิกฺขเว, อสงฺขตคามิมคฺโคฯ อิติ โข, ภิกฺขเว , เทสิตํ โว มยา อสงฺขตํ, เทสิโต อสงฺขตคามิมคฺโคฯ ยํ, ภิกฺขเว, สตฺถารา กรณียํ สาวกานํ หิเตสินา อนุกมฺปเกน อนุกมฺปํ อุปาทาย กตํ โว ตํ มยาฯ เอตานิ, ภิกฺขเว, รุกฺขมูลานิ, เอตานิ สุญฺญาคารานิฯ ฌายถ, ภิกฺขเว, มา ปมาทตฺถ; มา ปจฺฉา วิปฺปฏิสาริโน อหุวตฺถฯ อยํ โว อมฺหากํ อนุสาสนี’’ติฯ เอกาทสมํฯ

ปฐโม วคฺโคฯ

ตสฺสุทฺทานํ –

กาโย สมโถ สวิตกฺโก, สุญฺญโต สติปฏฺฐานา;

สมฺมปฺปธานา อิทฺธิปาทา, อินฺทฺริยพลโพชฺฌงฺคา;

มคฺเคน เอกาทสมํ, ตสฺสุทฺทานํ ปวุจฺจติฯ

2. ทุติยวคฺโค

1. อสงฺขตสุตฺตํ

[377] ‘‘อสงฺขตญฺจ โว, ภิกฺขเว, เทเสสฺสามิ อสงฺขตคามิญฺจ มคฺคํฯ ตํ สุณาถฯ กตมญฺจ, ภิกฺขเว, อสงฺขตํ? โย, ภิกฺขเว, ราคกฺขโย โทสกฺขโย โมหกฺขโย – อิทํ วุจฺจติ, ภิกฺขเว, อสงฺขตํฯ กตโม จ, ภิกฺขเว, อสงฺขตคามิมคฺโค? สมโถฯ อยํ วุจฺจติ, ภิกฺขเว, อสงฺขตคามิมคฺโคฯ อิติ โข, ภิกฺขเว, เทสิตํ โว มยา อสงฺขตํ, เทสิโต อสงฺขตคามิมคฺโคฯ ยํ, ภิกฺขเว, สตฺถารา กรณียํ สาวกานํ หิเตสินา อนุกมฺปเกน อนุกมฺปํ อุปาทาย, กตํ โว ตํ มยาฯ เอตานิ, ภิกฺขเว, รุกฺขมูลานิ, เอตานิ สุญฺญาคารานิฯ ฌายถ, ภิกฺขเว, มา ปมาทตฺถ; มา ปจฺฉา วิปฺปฏิสาริโน อหุวตฺถฯ อยํ โว อมฺหากํ อนุสาสนีติฯ